गठबन्धनसँगको पेचिलो प्रतिस्पर्धाका बीच ओलीको दुई दिने गृहजिल्ला दौडाहा

A+ A A-

मंगलबार नेकपा एमाले अध्यक्ष ओली झापा आए । स्थानीय चुनावमा एमालेका लागि पेचिलो बन्दै गएको झापामा ओली गर्जिए । उनले भने, ‘एमाले हराउने ल्याकत भएको झापामा कुनै पार्टी नै छैन ।’

सामान्य अबस्थामा पनि अध्यक्ष ओली कमजोर बोल्दैनन् । यसपटकको झापा दौडाहामा पनि ओलीको प्रस्तुति कमजोर रहेन । एकातिर भिडको मनोविज्ञानले एमालेलाई क्रमशः कमजोर देखाउँदैछ । अर्कातिर एमाले अध्यक्ष ओलीको हुँकार सामान्य छैन ।

झापाका एक एमाले नेताले कमजोर ठाउँमा पुलोसो बन्न अध्यक्ष ओली झापा आएको सुनाए । उनले भद्रपुर, हल्दिबारी, बिर्तामोड र मेचीनगरमा एमालेको स्थान राम्रो अनुमान गरिएको भए पनि भिडले त्यस्तो नदेखाएको बताए । यसअघि जितेको केही ठाउँमा पनि एमालेलाई चुनाव पेचिलो बन्दै गइरहेको छ । पेचिलाे बन्दै गएकाे प्रतिस्पर्धामा एमालेका लागि मुख्य भरोसाका केन्द्र हुन्, अध्यक्ष ओली ।

भिडले ओलीलाई ‘पावर हाउस’ महसुस गराउँछ । जहाँ–जहाँ ओली जान्छन्, भिड जम्मा हुन्छ । भिडले ‘केपी ओली जिन्दावाद’ गुन्जाउँछ । ओलीको दौडाहालाई एमाले कार्यकर्ता भिडलाई व्यालेटसम्म पुर्‍याउन सक्ने आधार मान्छन् । ओली कमजोर ठाउँमा बलियो भाषण गरेर फर्किन्छन् ।

यसपटक ओली भद्रपुरबाट सुरु भए । भद्रपुर कांग्रेस पूर्वमहामन्त्री कृष्ण सिटौलाको गृहनगर पनि हो । ओलीले हजारौँको भिडलाई सम्बोधन गर्दै असारु राजवंशीलाई जिताउन आह्वान गरे । उनले भने, ‘असारु काम गर्ने मान्छे हो, उसलाई जसरी भए पनि जिताऔँ ।’ दर्शकले हुन्छ भनेजसरी ताली, सिटी बजाए । राजंवंशीकाे पनि भद्रपुरमा कमजोर धराताल छैन । अध्यक्ष ओलीले थप माहौल बनाउन कोसिस गरे ।

ओली भद्रपुरपछि सोझै हल्दिबारी हानिए । हल्दिबारी राप्रपा अध्यक्ष राजेन्द्र लिङ्देनको गृहनगर हो । हल्दिबारीमा यसअघिको स्थानीय चुनावमा लिङ्देनकै भाई रविन्द्र लिङ्देनले अध्यक्ष जितेका थिए ।

यसपटक एमालेले हल्दिबारीमा डम्बर गिरीलाई अध्यक्ष उठाएको छ । गिरी राप्रप्राले जित्दा उप–प्रमुख जितेका जनप्रतिनिधि हुन् । अहिले पनि हल्दिबारीमा राप्रपाको माहौल राम्रै भएको मानिन्छ । यद्यपि, गिरी कमजोर उम्मेदवार होइनन् । गिरीका पक्षमा थप माहौल बनाउन ओलीले सघाए । उनले विकासको जिम्मा आफ्नै काँधमा लिएर गिरी जिताउन भिडलाई आग्रह गरे ।

मेचिनगर पुगेपछि ओलीले पुरानै कुरा दोहोर्‍याए । मेचिनगर कांग्रेस महामन्त्री विश्वप्रकाश शर्माको गृहनगर पनि हो । शर्माकै नगर भए पनि यसपटक एमाले नतिजा हत्याउने प्रयत्नमा छ । एमालेले मेचिनगरमा गोपाल बुढाथोकीलाई उम्मेदवार उठाएको छ । कांग्रेस जसरी भए पनि मेचिनगर जित्नुपर्ने दवावमा छ । एमाले भिड हेरेर आशावादी छ । अध्यक्ष ओलीले मेचिनगर पुगेर झापा एमालेको लालकिल्ला भएको बताए । विकास र समृद्धिका लागि एमाले एक मात्र दल भएको ओलीले दावी गरे ।

मंगलबार साँझ बिर्तामोड आइपुगेका ओली पूरै ‘फर्म’मा देखिए । बिर्तामोड एमालेले जितेको क्षेत्र हो । मेयरको भन्दा बढी मतले जितेकी उपमेयर पवित्रा महतारा यसपटक बिर्तामोडमा मेयरको उम्मेदवा छिन् । सोझो वा अघिल्लो निर्वाचनको परिणाम खोट्याउने हो भने, यसपटकको मेयर पनि स्वतः एमाले हुनुपर्ने हो । तर, भिडले भने बिर्तामोड एमालेको लोकप्रियताको ग्राफ घटेको देखाउँछ ।

पाँच वर्षअघि एमालेले जारी गरेको घोषणापत्रका धेरै काम बिर्तामोडमा अलपत्र भए । यति हुँदा पनि कार्यकाल सकिनै लाग्दा एकपटक बिर्तामोडको एमाले फर्ममा आयो । जनताले सम्झने केही काम भए । बनिसकेको पिच भत्काएर फेरि बनाउन लगाए प्रमुख ध्रुबकुमार शिवाकोटीले । यो चुनावको मुखैमा भएको घटना हो । यति छिटो स्थानीयले बिर्सिएका छैनन् ।

बिर्तामोडमा अध्यक्ष ओलीले खुलेरै गठवन्धनलाई एमाले हराएर देखाउन चुनौती दिए । ओलीले यतिमा चित्त बुझाएनन् । बिर्तामोडको भिडलाई सम्बोधन गर्दै उनले भने, ‘एमाले एक्लै हराउने ल्याकत चार जनासँग पनि छैन, पाँच जना मिलेर आउनु पर्छ ।’

बुधबार करिब १२ बजे ओली माङ्सेबुङ पुगे । माङ्सेवुङस्थित लारुम्बा किराँत धर्मको आस्था केन्द्र हो । इलामको माई नगरपालिकामा राखिएको चुनावीसभामा सम्बोधन गर्नुअघि ओली र एमाले उपाध्यक्ष सुवास नेम्वाङले आत्मानन्द लिङ्देनसँग आर्शिवाद लिएर गए । यसअघि पनि बिभिन्न नेताले लिङ्देनसँग आर्शिवाद लिने गरेका थिए । राष्ट्रपति विद्यादेवी भण्डारी, अध्यक्ष ओली र उपाध्यक्ष नेम्बाङ पनि त्यसमै पर्छन् ।

त्यसपछि एमाले उपाध्यक्ष सुवास नेम्वाङसँगै माई पुगेका अध्यक्ष ओलीले सबैलाई पालैपालो रिस पोखे । ‘झलनाथ खानाललाई टिकट दिएर गल्ति गरेछु’ बाट सुरु भएका ओली सरकारलाई गाली गरेर विदा भए ।

अध्यक्ष ओली माईमा भने केही ढुक्क देखिन्थे । माई नगरपालिका यसअघि एमालेले जितेको क्षेत्र हो । स्थानीय चुनाव २०७९ को संघारमा पनि माईमा एमाले नै बलियो मानिन्छ । यसैकारण पनि कमजोर क्षेत्रमा खुल्न नसकेका ओली माई नगरपालिकामा भने मज्जैले खुले ।

ओलीले गठनन्धन दललाई चुनावमा बाँडिचुडी खान गएको टिप्पणी मात्र गरेनन्, पत्तासाफ नै हुने घोषणा गरे । परमादेशले बनाएको सरकार भन्दै आलोचना गरेका ओलीले जनताले एमाले सरकार बनाउनेमा ढुक्क देखिन्थे । ओलीले माईमा गरेको सम्बोधनमा विकास गर्न एमाले नै चाहिन्छ भन्न छुटाएनन् । सुकुम्बासीको समस्या समाधान गर्न एमालेले नै सुरु गरेको भन्दै ओलीले अब एमाले सरकारमा पुगेपछि समस्या पूर्ण रुपमा सकिने उनको दावी छ ।

अध्यक्ष ओली माई नगरपालिकाको सम्बोधन सकेर झापाको सुरुङ्गा आए । सुरुङ्गा कनकाई नगरपालिका पर्छ । कनकाई यसअघिको चुनावमा एमालेले जितेको क्षेत्र हो । तर, कनकाईको पछिल्लो समय कोरियामा कामदार लैजाने विषयमा एमालेको ओलोचना हुन थालेको छ । ओलीले कनकाईमा छोटो सम्बोधन गरेर भिड आफूतिर खिच्न कोसिस गरे । गलत भएको भए सुधार्ने प्रतिवद्धता जनाए, विकासको मुल फुटाउन लागि पर्ने दोहोर्‍याए ।

ओलीले सधैँ लगाउने विकास र समृद्धिको नारा कनकाईमा पनि छुटेन । उनले भने, ‘एमालेको घोषणापत्रमा विकासै बिकास मात्र देखिन्छ ।’ कनकाईमा यसपटक एमालेले राजेन्द्र पोखरेललाई दोहोर्‍याउँदै छ । पोखरेल उनै मेयर हुन्, जो कोरिया काण्डबाट चुनावको संघारमा आलोचनाको सिकार भए ।

साँझ ६ बजे ओली काठमाडौँ फर्किए ।

यसपटकको दुई दिने गृह जिल्ला दौडाहामा एमाले अध्यक्ष ओलीले भिडसँग खेल्ने कोसिस गरे । एमाले कमजोर भएको ठाउँमा मज्जाले आफ्ना कुरा राखे । भिडलाई आफूतिर खिचे, उम्मेदवारको गतिलो टेको भए । सामान्यतया ओली भिडको मनोविज्ञान अनुरुप प्रस्तुत हुन्छन् । खुलेर आफ्ना कुरा राख्छन्, भिडमा स्थापित हुने कोसिस गर्छन् । यसपटकको गृहजिल्लामा भएका चुनावी भेलामा ओलीले त्यही कोसिस गरे । कार्यकर्ता ओलीको आगमनपछिको अबस्थामा आशावादी छन् ।

भिडको मनोविज्ञान अध्ययन गर्ने हो भने यसपटकको चुनाव उति सजिलो छैन, जति अध्यक्ष ओली भन्छन् । झापामा जहाँ एमाले बलियो छ, त्यहाँ गठवन्धनसँग एमाले एक्लै भिड्दैछ । जहाँ कमजोर छ, एमालेको तालमेल देखिँदैन । मंगलबार झापा आएका ओली केही कमजोर क्षेत्रमा चुनाव केन्द्रित भएर सम्बोधन गरे । उनले भिडमा एमाले र ओलीले मात्रै विकास गर्न सक्ने तर्क स्थापित गर्ने कोसिस गरे ।

ओलीले पटक–पटक झापालाई लालकिल्ला दाबी गरिरहेका छन् । उनीसँग कमजोर क्षेत्र जितिहाल्ने केही हतियार वा जादुको छडि देखिँदैन । उनका मुख्य हतियार भनेकै उनको ओझपूर्ण वाककला, उनको अडान, भिडसँग खेल्ने तरिका र उनको व्यक्तित्व हो ।

प्रकाशित मिति: बुधबार, वैशाख २१, २०७९ १९:०१