चुनावको मुखमा भारत जानेको लर्को, भन्छन्- हाम्रो परिवार कसले पाल्दिन्छ ?

A+ A A-

स्थानीय तहको चुनाव आउन अब नौ दिन बाँकी छ । तर, मंगलबार बेलुका गौरिफण्टा नाकामा भारत जाने नेपाली लामबद्ध थिए ।

देश चुनावमय भइरहेका बेला भारत गइरहेकाहरू आफू रहरले नभइ बाध्यताले भारत हिँडेको बताउँछन् । घरमा ऋणको भार थपिनु र स्वदेशमा रोजगारी नहुँदा चुनावको मुखमा पनि भारत जानुपर्ने बाध्यता रहेको उनीहरू सुनाउँछन् ।

‘गाउँघरमा चुनाव लागेको छ,’ अछामको तुर्माखाँद गाउँपलिका–२ का विशाल रावलले भने, ‘तर हामीलाई ऋणले च्यापेको छ । घरमा बसेर परिवार पाल्न नसकिने देखिएपछि बाध्य भएर भारत जानुपरेको हो ।’

नेताको पछि लागेर फाइदा लिनेलाई मात्र चुनाव लागेको रावल बताउँछन् । ‘घरघरमा नेता आएर चुनावमा सहयोग गर्नुपर्छ भन्दै थिए,’ रावलले भने, ‘हाम्रो परिवार कसले पाल्छ भन्दा कसैले भरोसा दिन सकेनन्, जनताको गाँसबासको सुनिश्चितता गर्न नसक्ने उम्मेदवारलाई भोट दिनुको औचित्य नै देखिएन । यो चुनाव नेता र आसेपासेका लागि मात्रै आएको हो ।’

सोही ठाउँका हिमाल रावल नयाँ वर्ष मनाउन भारतको दिल्लीबाट घर फर्केका थिए । चुनावको मुखैमा उनी फेरि रोजगारीका लागि भारत नै फर्केका छन् । भारतबाट कमाएर ल्याएको पैसा घरको ऋण तिर्नमै ठिक भएको भन्दै उनले छोराछोरीलाई स्कुल पढाउन स्मस्या हुने देखिएपछि पुनः भारत हिँडेको बताए ।

‘आफूले पढ्न नसके पनि छोराछोरीलाई पढाउने रहर छ,’ हिमालले भने, ‘नयाँ भर्नाको समय आउँदा आफूसँग पैसा नभएपछि कामको खोजीमा भारत गइरहेको छु ।’

चुनावका बेला मात्रै नेताहरू आफ्ना हुने गरेको हिमालको गुनासो छ । ‘चुनावपछि कसैले हामीलाई चिन्दैनन् । चुनावमा गाउँ बस्नुभन्दा दुई चार पैसा कमाउन सकिन्छ भनेर भारत जाँदैछु,’ उनले भने । नयाँ वर्ष मनाउन चैत अन्तिम साता नेपाल आएका उनी एक महिना घरमा बसेर पुनः भारत फर्कन लागेका हुन् ।

'म भारत हुँदा घरखर्च चलाउन परिवारले गाउँमा निकालेको ऋण तिर्नमै सकियो ल्याएको पैसा,’ उनले भने, ‘बचेको पैसा नयाँ वर्ष मनाउनमै सकियो, लामो समय घरमा बस्दा फेरि ऋण पर्ने भएपछि भारत फर्केको हुँ ।’

यसअघि चुनावको समयमा नेताहरूले थुप्रै आश्वास दिए पनि जनताको जीवनमा परिवर्तन नआएको हिमाल बताउँछन् । ‘०७४ को चुनावमा स्थानीय स्तरमै रोजगारीको व्यवस्था गर्ने सबै उम्मेदवारले भन्थे,’ उनले भने, ‘पाँच वर्षसम्म गाउँमा कुनै रोजगारी पाइएन । अहिले पनि त्यही नारा लिएर गाउँ आइरहेका छन्, अब पत्याउँन सकिएन ।’

भारत जान लागेका बझाङको छबिस पाथिभेरा गाउँपालिका- ३ का नवराज जोशीले अघिल्लो स्थानीय तहको चुनावमा उत्साहका साथ उम्मेदवारको पछि लागेको बताए । 'गाउँगाउँमा विकासको लहर ल्याउँछौँ, भारत जानुपर्ने बाध्यताको अन्त्य गर्छौं, नि:शुल्क शिक्षा प्रदान गर्छौं, डाक्टरसहितको स्वास्थ्य चौकी बनाउँछौँ भन्दै अघिल्लो चुनावमा नेताहरूले नारा लगाएका थिए,’ जोशीले भने, ‘ती नारा चुनावपछि हराए । त्यसैले यस पटकको चुनावप्रति कुनै उत्साह जागेन । गाउँमा हल्लिएर बस्नुभन्दा भारततर्फ जान ठिक लाग्यो ।’

प्रकाशित मिति: बुधबार, वैशाख २१, २०७९ १४:४३