दलका सभाले हुप्रचौर दुर्गन्धित भएपछि खेलाडीको प्रशिक्षण नै रोकियो

A+ A A-

केही दिनयता हेटौँडाको हुप्रचौरमा राजनीतिक दलहरूले आयोजना गरेको सभाले विभिन्न खेलका खेलाडीको प्रशिक्षण प्रभावित बनिरहेको छ । हरेक दिनजसो हुप्रचौरमा रानीतिक गतिविधि हुँदा उनीहरू प्रशिक्षणबाटै वञ्चित भएका हुन् ।

नेकपा एमालेले आइतबार गरेको सभाका क्रममा हुप्रचौरमा भएको फोहोर अझैसम्म पनि सफा गरिएको छैन । फोहोरकै कारण खेलाडीहरू खेल मैदानमा नगएको बताउँछन् । यहाँको फोहोरले हुप्रचौर आसपासमा समेत दुर्गन्ध फैलिएको छ ।

सभामा एमाले अध्यक्ष केपी शर्मा ओलीको समेत उपस्थिति थियो । यसअघि नगर विकास समितिले हुप्रचौरमा मेला, महोत्सव तथा राजनीतिक दलका कार्यक्रममा प्रतिबन्द लगाएको थियो ।

केही साताअघि राप्रपा मकवानपुरको आयोजनामा राजेन्द्र लिङ्देनको प्रमुख आतिथ्यतामा पनि हुप्रचौरमा सभा भएको थियो । यद्यपि, राप्रपाले भने कार्यक्रम भएको भोलिपल्टै हुप्रचौर सफा गरेको थियो । एमालेले भने कार्यक्रमपश्चात फोहोर सफाई र टेण्टका लागि बनाएको खाल्डोसमेत पुरेको छैन ।

हुप्रचौरमा नगर विकास समितिले सार्वजनिक कार्यक्रम, मेला महोत्सव र आमसभा आयोजना गर्न रोक लगाएको थियो ।

एमालेले हुप्रचौरमा गरेको फोहोर र खाल्डोको बारेमा सामाजिक सञ्जालमा आलोचना भइरहेको छ । हुप्रचौरमा भएको फोहोर एवं खाल्डाखुल्डीको तस्वीर सामाजिक सञ्जालमा पोष्ट गर्दै प्रयोगकर्ताहरूले कसले सरसफाई गर्ने भन्दै प्रश्न गरेका थिए । उक्त तस्वीरहरू सामाजिक सञ्जालमा भाइरल भएका छन् ।

स्थानीयले पनि हुप्रचौरमा खाल्डो तथा फोहोर गरेको भन्दै विरोध गरेका छन् । ‘यो हुप्रचौर हामी सबैको सम्पत्ति हो । यसको संरक्षण गर्नु हाम्रो दायित्व हो,’ एक स्थानीयले भने, ‘केही वर्ष यस्ता कार्यक्रम भएका थिएनन् । फेरि राजनीतिक दलले हुप्रचौरलाई दुरुपयोग गर्न थालेका छन् ।’

एमाले मकवानपुर अध्यक्ष एकलाल श्रेष्ठले आजै खाल्डो पुर्ने र सरसफाइ गर्ने कार्यक्रम रहेको बताए । कार्यक्रम सकिएपछि पनि सरसफाई गरेको र कतै खाल्डो र फोहोर बाँकी रहेकोमा त्यसलाई पनि सफा गरिने उनले बताए ।

प्रकाशित मिति: मंगलबार, वैशाख २०, २०७९ १५:५३