बुटवलबाट प्रदेश राजधानी सर्दैमा एमालेलाई हराउँछौँ भन्ने नसोचे हुन्छ: बाबुराम भट्टराई (अन्तर्वार्ता)

बुटवलबाट प्रदेश राजधानी सर्दैमा एमालेलाई हराउँछौँ भन्ने नसोचे हुन्छ: बाबुराम भट्टराई (अन्तर्वार्ता)

A+ A A-

३० वैशाख हुने स्थानीय तहको निर्वाचनका लागि बुटवल उपमहानगरको मेयर को होला भन्ने चासोका साथ हेरिएको छ । बुटवल नेकपा (एमाले)का उपाध्यक्ष विष्णु पौडेलेको निर्वाचन क्षेत्र र गृहमन्त्री बालकृष्ण खाँणको छिमेकी शहर हो । एमालेले आफ्नो ‘लालकिल्ला’ दाबी गर्दै आएको बुटवलमा बाबुराम भट्टराईलाई मेयरको उम्मेदवार बनाएको छ ।

हाल राष्ट्रियसभा सदस्य रहेका उनका दाइ गोपाल भट्टराई स्याङ्जाबाट मधेस झरेर भूमिगत भई कम्युनिस्ट राजनीतिमा संलग्न हुनाले घरमा नेताहरूको आउजाउ भइरहन्थ्यो । त्यही संगतले उनी कम्युनिस्ट पार्टीमा लागेका हुन् । २०६१ सालमा लुम्बिनी प्रादेशिक अस्पतालको अध्यक्ष तथा औषधि व्यवसायी महासंघको केन्द्रीय अध्यक्ष पनि भइसकेका २०३७ सालदेखि पार्टीको पूर्णकालीन कार्यकर्ताका रूपमा सक्रिय छन् । मेयर उम्मेदवार भट्टराईसँग शिलापत्रले गरेको कुराकानीको सम्पादित अंश:

बहालवाला मेयरसहितका नेताहरू दाबेदार भएको बेला तपाईं मेयरको टिकट पाउनुभयो । त्यसले पार्टीमा विवाद छ भनिन्छ । कस्तो हुँदैछ, चुनावी माहौल ?

मेरो दाबेदारी पहिलेदेखि नै थियो । बहालवाला मेयरले दाबी गरे पनि सबैको सहयोगले मैले टिकट पाएँ । अर्को कुरा, पार्टीभित्र विवादका कुनै कुराहरू छैनन् । सबैको साथ सहयोग मलाई प्राप्त छ । नयाँ सोचका साथमा युवा नेतृत्वलाई साथ दिनुभएकोमा म खुसी छुु । यो माहौलमा जनताको साथ पाएर म जित्छु भन्नेमा विश्वस्त छु ।

जनताको साथ छ भन्नुभयो, के छ आधार ?

बुटवलका जनताका मन जित्ने खालका योजनाहरू मसँग छन् । बुटवललाई एउटा सुन्दर र सुविधायुक्त शहर बनाउने योजनाहरू मसँग छन् । म सरल छु । त्यसैले जनताले मन पराउनुहुनेछ भन्नेमा ढुक्क छु । मलाई पैसा कमाउन आफ्नै व्यवसाय छ, मलाई उपमहानगरबाट लगेर केही गर्नुपर्ने छैन । केही लोभलालच छैन । त्यसैले जनताले साथ दिनुहुनेछ ।

तपाईंका मुख्य योजनाहरू के–के छन् ?

भूमिहीनलाई लालपुर्जा, मजदुर र सडक मानव व्यवस्थापन, स्याटेलाइट नगर, सहज स्वास्थ्य सेवा, सडक र यातायातसँगै खानेपानीको समस्या समाधान गर्ने मेरो योजना छ । मैले मेरा योजनाहरू र प्रतिबद्धताका बारेमा दैनिक रूपमा घरदैलोमा पुगेर सुनाएको छु । खासगरी बुटवलमा ‘सडक मानवमुक्त’को व्यवस्थापनलाई ध्यान दिनेछु । मोतीपुर औद्योगिक क्षेत्रमा र सार्वजनिक जमिनमा अव्यवस्थित बसोबास हुन सक्ने सम्भावना छ । हामीले यसको व्यवस्थापनका लागि औद्योगिक क्षेत्रभित्र नै बहुतले संरचनाहरू निर्माण गर्नका लागि पहल गर्नेछौँ । मजदुरको आवासको व्यवस्था भए मोतिपुरक्षेत्रमा सम्भावित अव्यवस्थित बसोबासको समस्यालाई रोक्न सकिन्छ ।

मोतीपुर सेमलार क्षेत्रलाई स्याटेलाइट नगरका लागि अध्ययन भइरहेको छ । यो काम म विजयी भएसँगै हुनेछ । सबैलाई स्वास्थ्य सेवाको अनुभूत गराउन घर–घरमा ब्लड टेस्ट, एन्टिनेटल टेस्ट गरी उपचार सेवा दिने, सुत्केरी हुनेहरूका लागि उनीहरूकै घरदैलोमा टोली खटाएर विशेषज्ञ सेवा, स्वास्थ्य शिविर टोल–टोलमा दिने, अल्ट्रासाउन्डको सुविधा पनि दिने योजना बनाएका छौँ ।

बुटवलको सडक समस्यालाई हामीले नकार्न मिल्दैन । तर, समस्या के भने सडकको काम संघीय बजेटअनुसार भएको हो । एमालेको सरकार भरहेको भए यसको धेरै काम सकिन्थ्यो भन्ने मलाई लाग्छ । बुटवलको खानेपानी समस्यालाई सम्बोधन गर्ने विकल्प भनेको झुम्सा खानेपानी हो । बजेट छुट्टिइसकेको र टेन्डरमा गइसकेकाले निर्माण कार्य अगाडि बढ्छ भन्ने विश्वास पनि छ । ज्योतिनगरमा गएको पहिरोको व्यवस्थापनको काम पनि हामीले गर्नेछौँ । यो क्षेत्र राष्ट्रपति चुरे संरक्षण कार्यक्रमअन्तर्गत पर्छ । हाम्रो कार्यक्षेत्रभित्र पर्दैन । तर, पनि प्राविधिक रूपमा बस्ती जोगाउने काम भने हामीले गर्न सक्छौँ ।

एमालेले प्रदेश राजधानी बुटवलबाट दाङ पुर्‍यायो । यसले तपाईंको चुनावी नतिजामा असर पर्ने विश्लेषण गरिन्छ । तपाईंलाई त्यस्तो लाग्दैन ?

प्रदेश राजधानी यहाँबाट गयो, यो सत्य कुरा हो । यसमा हामीले झुट बोल्नुपर्ने कुरा केही छैन । भएको के हो भन्दा, कम्युनिस्ट पार्टी भनेका अनुशासित पार्टी हुन् । त्यतिबेला केन्द्रीय समितिले निर्णय गर्‍यो दाङ सार्ने, प्रदेशका सांसदहरूले ह्वीप उल्लंघन गर्न सक्नुभएन । दाङबाट चुनाव जितेका सांसदहरूले राजधानी दाङको नारा लगाउनुभयो, रुपन्देहीकाले रुपन्देहीमा र कपिलवस्तुकाले कपिलवस्तुमा । सबैले दाबी गरे पनि केन्द्रको निर्णय मानियो । यो कुरामा त हामीले यहाँका जनतासँग माफी माग्नुपर्ने हुन्छ । राजधानी जाँदैमा एमालेलाई बुटवलबाट हराउन सकिन्छ भन्ने सोच कसैले नराखे हुन्छ । हामीले बुटवललाई प्रदेश राजधानी बनाउन नसके पनि आर्थिक राजधानी पक्कै बनाउनेछौँ ।

प्रकाशित मिति: मंगलबार, वैशाख २०, २०७९ १६:२२