मलेसियामा १२ घण्टा काम गर्न बाध्य नेपाली, अब तलब १५ सय रिङ्गेट भए मात्र माग प्रमाणीकरण

मलेसियामा १२ घण्टा काम गर्न बाध्य नेपाली, अब तलब १५ सय रिङ्गेट भए मात्र माग प्रमाणीकरण

A+ A A-

मलेसियास्थित नेपाली दूतावासले मलेसिया रोजगारीमा जाने कामदारको तलब सुविधा न्यूनतम १५ सय रिङ्गेट भएको करारपत्रलाई मात्र मान्यता दिने भएको छ ।

दूतावासले साेमबार एक सूचना जारी गर्दै मलेसिया आउने कामदारको मासिक तलब सुविधा अनिवार्य १५ सय रिङ्गेट हुनुपर्ने सम्बन्धित पक्षलाई जानकारी गराएको छ । दूतावासले योभन्दा अगाडि आएका मागपत्रका हकमा पनि सोही नियम लागू हुने सूचनामा जनाइएको छ ।

मलेसियामा सुरक्षा गार्डको मासिक तलब न्यूनतम १५ सय रिङ्गेट नभएको र ओभरटाइमबापतको पारिश्रमिक स्पष्ट नभएको मागपत्र प्रमाणीकरण नगर्न यसअघि श्रम, रोजगार तथा सामाजिक सुरक्षामन्त्री कृष्णकुमार श्रेष्ठले मलेसियास्थित नेपाली दूतावासलाई निर्देशन दिएका थिए ।

हाल मलेसिया भ्रमणमा रहेका मन्त्री श्रेष्ठले दूतावासका कर्मचारीलाई दैनिक १२ घण्टा खटिने सुरक्षा गार्डको तलब मासिक १५ सय रिङ्गेटभन्दा कम भएमा मागपत्र प्रमाणीकरण नगर्न निर्देशन दिएका हुन् ।

मलेसियाका गृहमन्त्री जैनुदिनसँगको भेटघाटमा नेपाली सुरक्षा गार्डको मासिक तलब ३ हजार मलेसियन रिङ्गेट हुनुपर्ने प्रस्ताव र छलफल गरेको श्रममन्त्री श्रेष्ठले जानकारी दिए ।

मलेसिया सरकारसँग नेपाली कामदारसहित सुरक्षा गार्डको सुरक्षा, तलब र सामाजिक सुरक्षा कोषसँग तलब वृद्धिका विषयमा प्रस्ताव गरेको श्रममन्त्री श्रेष्ठले बताए ।

‘न्यूनतम तलब ५४६ रिङ्गेट हुँदा नै सुरक्षा गार्डले ओभरटाइमसमेत गरेर १०/१५ वर्षअगाडि नै १५ सय रिङ्गेट तलब थियो । अहिलेसम्म पनि त्यत्ति नै छ । काम भने जोखिम मोलेर दोब्बर गर्नुपर्छ तर तलब भने ११/१२ सय रिङ्गेट छ,’ श्रेष्ठले भने, ‘तलबमा ठगिएर काम गर्नुभन्दा नेपालमै कुटो–कोदालो गरेर कृषि गर्दा हुन्छ । बेरोजगार छु भन्दैमा अति नै ठगिनु त भएन नि । रोजगारीसँगै तलब र अन्य सुविधा समान त हुनुपर्‍यो । रोजगारी दिएँ भन्दै श्रम ऐन नै मिचेर ठग्नु त गलत हो नि ।’

१२ घण्टा ड्युटीमा खटिँदा हुने हृदयघात जस्ता जोखिमलाई ध्यानमा राखेर चौबीसघण्टे बीमा सुविधाको व्यवस्था हुनुपर्छ भन्ने विषयमा नेपालले मलेसियासँग प्रस्ट कुरा गरेको उनले बताए ।

मलेसियाली गृहमन्त्री जैनुदिनले नेपाली कामदार मिहिनेती र इमानदार भएको चर्चा गर्दै गोर्खा गार्ड्सका रूपमा मलेसियामा नेपालीहरूलाई जहिल्यै सम्मान गरिने भन्दै श्रममन्त्री श्रेष्ठसँग प्रशंसा गरेका थिए ।

मन्त्री श्रेष्ठले मलेसियामा नेपाली कामदारको कदर गरिनु राम्रो पक्ष भए पनि पारिश्रमिकमा ध्यान दिन आवश्यकसमेत रहेको औँल्याएका थिए । श्रेष्ठका अनुसार नेपाल र मलेसियाबीच संयुक्त कार्यदलको तेस्रो बैठक छिट्टै काठमाडौंमा गर्ने सहमति भएको छ ।

मलेसिया भ्रमणका क्रममा नेपाली कामदारहरूले १२ घण्टाभन्दा धेरै काम गर्न बाध्य हुनुपरेको गुनासो गरे । करार सम्झौताभन्दा धेरै समय काम गरे पनि तलब भने त्यही ११/१२ सय रिङ्गेट मात्र पाउने गरेको गुनासो उनीहरूले श्रममन्त्री श्रेष्ठलाई सुनाएका थिए ।

मलेसिया सरकारले मे महिनादेखि रोजगारीमा आउने विदेशी कामदारको मासिक तलब १५ सय रिङ्गेट बनाए पनि रोजगारदाता कम्पनीले तत्काल कार्यान्वयन नगर्ने भन्दै विरोध गरिरहेका छन् ।

२०७५ मा उत्पन्न भएको सिन्डिकेट विवादपछि म्यानपावर कम्पनीहरूले नेपाली कामदार मलेसिया पठाउन सकेका थिएनन् । चार वर्षयता असहज बन्दै गएको मलेसिया रोजगारी कोरोना महामारीका कारण थप संकटमा परेको थियो ।

चार वर्षअघि बायोमेट्रिक, भीएलएन, जीएसजी, वान स्टप सेन्टर र माइग्राम्सले मलेसिया जाने कामदारलाई स्वास्थ्य परीक्षण र अन्य प्रक्रियाका नाममा ठगी गरेको भन्दै तत्कालीन श्रम, रोजगार तथा सामाजिक सुरक्षामन्त्री गोकर्ण विष्टले बन्द गरिदिएका थिए ।

चार वर्षयता बन्द मलेसियाको रोजगारी आगामी डिसेम्बरबाट खुला भए पनि नेपाली कामदार पठाउन सकिएको छैन । हाल मलेसियामा साढे ५ लाख कामदार रहेको श्रम मन्त्रालयको अनुमानित तथ्यांक छ ।