भरतपुरमा कांग्रेसका बागी उम्मेदवार पौडेलले फिर्ता लिएनन् उम्मेदवारी

A+ A A-

भरतपुरको मेयरमा बागी उम्मेदवारी दिएका कांग्रेसका जगन्नाथ पौडेलले उम्मेदवारी फिर्ता लिएनन् । निर्वाचन आयोगले शुक्रबार साँझ ५ बजेसम्म मनोनयन फिर्ताका लागि समय दिएको थियो । तर, उक्त समय पौडेलले गुजारेका छन् ।

पौडेलले आफू धेरै अघि बढिसकेकाले उम्मेदवारी फिर्ता नलिएको बताए । शिलापत्रसँग कुराकानी गर्दै उनले भने, 'मलाई सबै कांग्रेसी कार्यकर्ता र जनताको साथ छ । त्यसैले उम्मेदवारी कायम राखेर चुनावी अभियानमा होमिने निर्णय लिएँ ।'

पौडेललाई उम्मेदवारी फिर्ता गराउन गृहमन्त्री बालकृष्ण खाँणले भरतपुरमै आएर तीन दिनसम्म कसरत गरेका थिए । खाँण मात्रै नभएर प्रधानमन्त्री एवं पार्टी सभापति शेरबहादुर देउवा, माओवादी केन्द्रका अध्यक्ष पुष्पकमल दाहाल, कांग्रेस वरिष्ठ नेता रामचन्द्र पौडेललगायतका नेताहरूले उनलाई फोनमार्फत उम्मेदवारी फिर्ताका लागि चर्को दबाब दिएका थिए ।

बागी उम्मेदवारी दिएका पूर्वसांसद समेत रहेका पौडेलले कांग्रेस जोगाउन भन्दै आफूले उम्मेदवारी दिएकाले फिर्ता नलिएको बताए । गृहमन्त्री खाणँसँगको भेटमा पौडेलले आफू धेरै अगाडि बढिसकेकाले पार्टीले कारबाही गरे पनि कुनै पनि हालतमा उम्मेदवारी फिर्ता नलिने अडान लिएका थिए । अनन्त: उनी आफ्नो अडानमा दृढ रहे । सत्ता गठबन्धनले भरतपुरको मेयर माओवादीलाई दिएपछि कांग्रेसभित्रको असन्तुष्ट समूहले पौडेललाई उम्मेदवार बनाएको हो ।

पौडेलले उम्मेदवारी दिएपछि सत्ता गठबन्धनलाई धक्का पुग्ने आकलन गर्दै उनको उम्मेदवारी फिर्ता गराउन केन्द्रीय तहका नेता दौडधुप गरे पनि अन्तत: प्रयास विफल भयो । भरतपुरमा सत्ता गठबन्धनबाट भरतपुरको मेयरमा रेनु दाहाल र उपमेयरमा कांग्रेसका चित्रसेन अधिकारीले उम्मेदवारी दिएका छन् ।