चुनावले शैक्षिकसत्र नरोकिने, १ जेठबाट नयाँ कक्षा, ४५ लाख किताब छाप्नै बाँकी

A+ A A-

२०७९ सालको नयाँ शैक्षिकसत्र १ जेठबाट सुरु हुने भएको छ । निर्वाचन आयोगले मतदान केन्द्र रहेका विद्यालय २८ वैशाखदेखि ३० सम्म तीन दिन बन्द गर्न सरकारलाई सिफारिस गरेपछि १ जेठबाट पठनपाठन सुरु गर्ने निर्णयमा शिक्षा विज्ञान तथा प्रविधि मन्त्रालय पुगेको हो ।

‘चुनावले विद्यालयलाई असर गर्दैन । वैशाख महिनाभित्र परीक्षा सकाएर भर्ना अभियान पनि सँगै चल्छ,’ शिक्षा तथा मानवस्रोत विकास केन्द्रका प्रवक्ता डिल्ली लुइँटेलले भने, ‘१ जेठबाट कक्षा सञ्चालन गर्न विद्यालयहरूलाई निर्देशन दिएका छौँ ।’

वैशाखबाट नै नयाँ शैक्षिकसत्र सुरु हुनु पर्ने हो तर कोरोना माहामारीका कारण धकेलिएर जेठमा पुगेको हो । चुनावका कारण शैक्षिकसत्र पछि धकेल्ने पक्षमा मन्त्रालय छैन । ‘विद्यालय मतदान केन्द्रमात्र रहन्छ । ३० वैशाखमा चुनाव सकिन्छ । गणनाको काम स्थानीय पालिकामै हुन्छ,’ प्रवक्ता लुइँटेलले भने, ‘शैक्षिकसत्रको पूर्व तयारीलाई परिवर्तन गरेका छैनौँ ।’ हाल विद्यालय तहको परीक्षा धमाधम भइरहेको छ ।

कतिपय विद्यालयले परीक्षा सकाएर भर्नाको तयारी गरिरहेको उनले बताए । ‘एसईई चलिरहेको छ । १ देखि ९ सम्मको धेरै विद्यालयमा परीक्षा सकिएको छ । केही विद्यालयले एसईईपछि गर्ने तयारी गरेका छन्,’ उनले भने ।

सम्बन्धित समाचार

मतदान केन्द्र रहेका विद्यालय तीन दिन बन्द गर्न सरकारलाई आयोगको सिफारिस

४५ लाख किताब छाप्नै बाँकी

नयाँ शैक्षिकसत्र सुरु हुन १५ दिन मात्र बाँकी छ । तर, किताब छपाइको काम सकिएको छैन । छपाइको जिम्मा पाएको जनक शिक्षा सामग्री केन्द्रले स्थानीय चुनावको मत्रपत्र छापिरहेको छ । मतपत्र छपाइको काम भइरहेकाले किताब छपाइमा ढिला भइरहेको केन्द्रले जनाएको छ ।

‘४५ लाख किताबको सेट छाप्न बाँकी छ । मतपत्र छपाइको काम भइरहेको छ,’ केन्द्रका प्रवक्ता चित्र आचार्यले भने, ‘२० वैशाखसम्म मतपत्र छपाइको काम सकिन्छ ।’ कागजको अभावका कारण पनि किताब छपाइ समयमा हुन नसकेको केन्द्रको भनाइ छ । ‘भारतबाट कागज नआउँदा छपाइमा प्रभावित भएको थियो । अब १५ जेठसम्म किताब छपाइको काम योजना छ,’ प्रवक्ता आचार्यले भने ।

चारदेखि दश कक्षासम्मका लागि १ करोड ९० लाख किताबको सेट केन्द्रले छाप्दै आएको छ । छपाइमा ढिलाइ भएकाले यसपटक पनि समयमै विद्यार्थीले पाठ्यपुस्तक नपाउने देखिएको छ । तर, छापिएका किताब हिमाली जिल्लामा पठाउन थालिएको बताउँछन् मानवस्रोत विकास केन्द्रका प्रवक्ता लुइँटेल ।

‘कागज नभएकाले बीचमा छपाइ रोकिएको थियो । अहिले छपाइको काम भइरहेको छ । जनक शिक्षाले १५ जेठसम्म विद्यार्थीको हातमा पुर्‍याउने प्रतिबद्धता जनाएको छ,’ उनले भने, ‘छपाइको नियमित अनुगमन पनि भइरहेको छ । छापिएका किताब दुर्गम जिल्लामा पठाउन थालिएको छ ।’

प्रकाशित मिति: बिहीबार, वैशाख १५, २०७९ १७:३५