धुर्कोटमा एमाले-माओवादी तालमेल, अध्यक्षमा हँसिया हथाैडा र सूर्यबाट माओवादीकै दुई उम्मेदवार

धुर्कोटमा एमाले-माओवादी तालमेल, अध्यक्षमा हँसिया हथाैडा र सूर्यबाट माओवादीकै दुई उम्मेदवार

A+ A A-

गुल्मीका अधिकांश पालिकामा सत्तारुढ दलले तालमेल गरेका बेला धुर्कोट गाउँपालिकामा भने एमाले र माओवादीबीच अनौठो तालमेल भएको छ । ०७४ सालमा भएकाे निर्वाचनमा तालमेल गरेरै माओवादीले जितेकाे धुर्काेटमा यसपटक सत्ता गठबन्धनका तर्फबाट कांग्रेसका महेन्द्रप्रसाद भण्डारी अध्यक्षका उम्मेदवार बनेका छन् ।

तर विगतमा आफूले जितेकाे पालिकाकाे नेतृत्व छाड्न नसकिने बताउँदै माओवादी केन्द्रले एमालेसँग तालमेल गरेकाे देखिएकाे छ । बाहिरी रूपमा तालमेल नभनिए पनि एमाले र माओवादीबीच फरक शैलीमा तालमेल भएको पाइएपछि सत्ताधारी दलका नेताहरू नै चकित परेका छन् ।

अहिले यो पालिकाको अध्यक्षमा एमाले, कांग्रेस, माओवादीकासहित ६ जनाले उम्मेदवारी दिएका छन् । राेचक त के छ भने एमालेबाट उम्मेदवारी दिएका नेता गाेपाल कुवँर माओवादीका पालिका कमिटी अध्यक्ष हुन् ।

साथै माओवादीबाटै भुपाल पाेखरेलले पनि उम्मेदवारी दिएका छन् । उनी माओवादीकाे लुम्बिनी प्रदेश कमिटी सदस्य हुन् भने यसअघि कांग्रेससँगको तालमेलमा यो पालिकाको अध्यक्षमा निर्वाचित भएका थिए ।

माओवादीका दुवै नेताले अध्यक्षमा उम्मेदवारी दिँदा कुवँरले आफूलाई एमालेकाे उम्मेदवारकाे रूपमा प्रस्तुत गरेका छन् । तर उनी अहिले पनि माओवादी केन्द्रमै रहेकाे पार्टीका स्थानीय नेताहरूले बताएका छन् ।

माओवादीका उम्मेदवारले किन दिए दुवै चिह्नबाट उम्मेदवारी ?

धुर्कोट गाउँपालिकामा माओवादीको दाबी रहँदै आएको थियो । माओवादीका तर्फबाट एकमात्र दाबेदार थिए पोखरेल । एमालेबाट उम्मेदवारी दिएका माओवादीका कुवँरले भने दाबी प्रस्तुत नै गरेका थिएनन् । सत्ताधारी दलबीच गठबन्धनका लागि सहमति नजुटेपछि माओवादीले एमालेसँग तालमेलकाे कुरा अघि बढायाे । यहाँ सम्मकि माओवादीका दाबेदार पोखरेलले एमालेकाे सूर्य चिह्नबाट चुनाव लड्ने भित्रभित्रै सहमति पनि भयाे ।

अन्तत: एमालेले माओवादीकै चुनाव चिह्न हँसिया हथाैडाबाट चुनाव लड्दा पनि भुपाललाई सघाउन तयार भयो । तर, स्थानीय स्तरमा पर्न सक्ने समस्यालाई मध्यनजर गर्दै दुई दलबीचको अनौपचारिक छलफलकै आधारमा कुवँरले एमालेको तर्फबाट सुरुमै उम्मेदवारी दिए । माओवादीका एक नेताका अनुसार कुवँरकाे उम्मेदवारी पछि फिर्ता लिनकै लागि दर्ता गरिएकाे थियाे ।

'उहाँ (कुवँर) माओवादी पार्टीमै हुनुहुन्छ । एमालेसँग तालमेल गर्दा पालिकाकाे नेतृत्व अरुलाई नदिने भनेर हामीले याे रणनीति अपनाएका हाैँ', नाम नखुलाउने सर्तमा ती माओवादी नेताले भने ।

फिर्ता नलिए कारबाही हुन्छ

माओवादी केन्द्रका गुल्मी जिल्ला संयाेजक बुद्धि जिसीले कुवँरलाई उम्मेदवारी फिर्ताका लागि आग्रह गरिएकाे बताए । तर उनले अटेरी गरेर उम्मेदवारी फिर्ता नलिए कारबाही गरिने पनि उनले प्रष्ट पारे । उनले भने, ‘अहिले हामीले स्पष्टीरकण सोधेका छौँ, अवश्य उम्मेदवारी फिर्ता लिनुहुनेछ, नलिए पार्टीले कारबाही गर्छ ।’

अब कस-कसको रहला उम्मेदवारी ?

यदि १४ वैशाखमा सत्तारुढ गठबन्धनले गरेको निर्णयलाई कार्यान्वयन भएमा यो पालिकामा ६ मध्ये ३ जना मात्रै उम्मेदवार रहनेछन् । कांग्रेस, एमाले र माओवादीबाट एक जना मात्रै उम्मेदवार रहनेछन् । यस पालिकामा गठबन्धनका तर्फबाट कांग्रेसका भण्डारी र अन्य दलहरू राप्रपाबाट शेखरनाथ घिमिरे तथा मंगोल नेशनल अर्गनाइजेशनबाट धर्मराज दर्लामी उम्मेदवार कायम रहनेछन् ।

यहाँ सत्तारुढ दल जनता समाजवादी पार्टीबाट गणेश कुवँरले पनि उम्मेदवारी दिएका छन् । पाँच दलकाे निर्णय कार्यान्वयन भएको अवस्थामा उनले पनि उम्मेदवारी फिर्ता लिनु पर्नेछ ।

माओवादी गुल्मीका नेता जीसीले यो पालिकामा कांग्रेस र माओवादीका उम्मेदवारले उम्मेदवारी फिर्ता नलिने बताए । तर, एमालेकाे चुनाव चिह्नबाट उम्मेदवारी दिएका कुवँरले भने फिर्ता लिने उनले बताए । यदि यसाे भएमा यहाँ अध्यक्षमा एमालेका उम्मेदवार रहने छैनन् । कांग्रेस र माओवादीबीच प्रतिस्पर्धा हुनेछ ।

पाँच दलीय गठबन्धनले अन्य दलसँग तालमेल नगर्ने निर्णय गरेको अवस्थामा यो पालिकामा के हुन्छ भन्ने विषय चासोका साथ हेरिएकाे छ । यहाँ अध्यक्षमा माओवादीले आफ्नै चुनाव चिह्नबाट उम्मेदवार उठाएको छ । अन्य पदमा माओवादीको तर्फबाट उम्मेदवारी दिइएको छैन । तर सूर्य चिह्नबाट माओवादीले वडा नम्बर १ को अध्यक्षमा चेतमान कुवँरसहित ९ जना वडा सदस्य उठाएको छ । दुई दलबीचको सहमति अनुसार अध्यक्षमा एमालेले सहयोग गर्ने र अन्य पदमा सूर्य चिह्नबाट उठ्ने उम्मेदवारलाई माओवादीले सहयोग गर्नेछ ।

नेता जिसी भने यस्ताे कुरा पार्टीको निर्णय नभएको भन्दै माओवादी केन्द्रका सबै नेताले उम्मेदवारी फिर्ता लिनु पर्ने बताउँछन् ।धुर्कोटको समस्यालाई लिएर कांग्रेसले पार्टी केन्द्रीय कार्यालय सानेपामा पत्र पठाउने तयारी गरेको छ ।

सुर्य चिह्नबाट उम्मेदवारी दिएका माओवादी उम्मेदवाहरू

वडा १ (नयाँ गाउँ )
अध्यक्ष : चेतमान कुवँर
दलित महिला सदस्य : विमला सुनुवार

वडा. २ (पिपलधारा)
खल्ला सदस्य :- कोशबहादुर थापा
सदस्य: :- अर्जुन बस्नेत
महिला सदस्य :- जमुना खनाल

वडा ४ (जैसीथोक)
अध्यक्ष : वीरेन्द्र कुवँर

वडा ५ (बस्तु)
खुला सदस्य : बाबुराम सुनुवार
दलित महिला सदस्य : गोमा सुनुवार विक

वडा ६ (रजस्थल)
खुला सदस्य : झविन्द्र थापा क्षेत्री
दलित महिला सदस्य : मिना परियार

वडा ७ (वाग्ला)
महिला सदस्य : रमिला पुरी

प्रकाशित मिति: बिहीबार, वैशाख १५, २०७९ १०:०८