बागी उम्मेदवार फकाउन हिजो प्रचण्ड, आज खाँण चितवनमा

A+ A A-

गठबन्धनबाट भरतपुरको मेयर माओवादी केन्द्रलाई दिएपछि असन्तुष्ट बनेका कांग्रेस नेता-कार्यकर्ता र बागी उम्मेदवारलाई फकाउन गृहमन्त्री बालकृष्ण खाँण चितवन आइपुगेका छन् ।

कांग्रेस नेता तथा पूर्वसांसद जगन्नाथ पौडेलले भरतपुरको मेयरमा बागी उम्मेदवारी दिएपछि गठबन्धनलाई क्षति पुर्‍याउन सक्ने आकलन गर्दै रुष्ट कार्यकर्तालाई फकाउन गृहमन्त्री खाँण चितवन आइपुगेका हुन् । खाँणले अहिले पार्टी कार्यालय नारायणगढमा गठबन्धनका नेताहरूसँग छलफल पनि गर्नेछन् । त्यसपछि मेयरमा बागी उम्मेदवारी दिएका पौडेललाई भेट्न पौडेलको निवास भरतपुर–७ स्थित पिपलचोक जाने कार्यक्रम छ ।

भरतपुर विमानस्थलमा सञ्चारकर्मीहरूसँग कुराकानी गर्दै गृहमन्त्री खाँणले असन्तुष्ट नेता-कार्यकर्तालाई फकाउन आएको बताए । असन्तुष्टलाई सम्झाउन के प्याकेज ल्याउनु भएको छ भन्ने प्रश्नमा उनले भने, ‘प्याकेजभन्दा पनि मन र हृदय लिएर आएको छु । सबै कांग्रेसका नेताहरूलाई सम्मान गर्न सकियोस् । गठबन्धन गर्दा कहिलेकाँही आफूले चाहेजस्तो हुँदैन । एक कदम पछाडि पनि हट्नुपर्छ । संविधान र लोकतन्त्रका लागि पनि गठबन्धनको रक्षा गर्नु हाम्रो दायित्व हो ।’

गठबन्धनका कारण पार्टीका मतदाता नगुम्ने उनले दाबी गरे । ‘यहाँ मभन्दा धेरै अग्रज नेताहरू हुनुहुन्छ । नेविसंघ, तरुण दलको नेतृत्वमा रहँदाका मेरा सहयोगी साथीहरू हुनुहुन्छ । सबैसँग संवाद र छलफल गरेर कसरी पार्टीलाई अगाडि बढाउने चितवनको प्रतिष्ठालाई कसरी जोगाउने र मतदातालाई कसरी अपिल गर्ने सबैसँग परामर्श गरेर अघि बढ्छौँ’, उनले भने।

१६ वैशाखसम्म उम्मेदवारी फिर्ता लिने समय रहेकाले पार्टीमा योगदान पुर्‍याएका नेतालाई उम्मेदवारी फिर्ता लिन आग्रह गरिने उनले बताए । स्वतन्त्र उम्मेदवारले आफ्नो उम्मेदवारी फिर्ता लिने विश्वास रहेको उनले बताए । मंगलबारमात्रै माओवादी केन्द्रका अध्यक्ष पुष्पकमल दाहाल प्रचण्ड सुटुक्क चितवन आएर फर्केका थिए । उनी कांग्रेसका असन्तुष्ट समूहका नेता-कार्यकर्तालाई भेटेर फर्केका थिए ।

मंगलबार साँझ मात्रै बागी उम्मेदवारी दिएका पौडेलका घरमा जिल्ला सभापति राजेश्वर खनालसहितको जिल्ला नेतृत्वको टोली गएर उम्मेदवारी फिर्ता गर्न आग्रह गरेको थियो । कांग्रेस जोगाउने अभियान भन्दै पूर्वसांसद पौडेलले सोमबार तामझामका साथ उम्मेदवारी दिएका थिए । उनले उम्मेदवारी दिँदै कुनै हालतमा फिर्ता नलिने बताएका छन् ।

प्रकाशित मिति: बुधबार, वैशाख १४, २०७९ १७:१६