सशस्त्र प्रहरीको चार गण र एक गुल्म हटाउने तयारी, आईजीपी केसीले पठाए गृहमा प्रस्ताव

सशस्त्र प्रहरीको चार गण र एक गुल्म हटाउने तयारी, आईजीपी केसीले पठाए गृहमा प्रस्ताव

A+ A A-

सशस्त्र प्रहरी बल (एपीएफ) को चार गण र एक गुल्म हटाउने तयारी गरिएको छ । सशस्त्र प्रहरीको महानिरीक्षक नियुक्त भएको पाँचौँ दिनमै आईजीपी पुष्पराम केसीले चार गण र एक गुल्म हटाउने प्रस्ताव गृह मन्त्रालयमा पठाएका हुन् ।

चार गण र एक गुल्म हटाउने प्रस्ताव गरेपछि आईजीपी केसी विवादमा तानिएका छन् । ३० चैतमा २१ दिनका लागि आईजीपीमा नियुक्त भएका केसीले ५ चैतमा चार गण र एक गुल्म हटाउने प्रस्ताव गृह मन्त्रालयमा पठाएको खुलेको छ ।

सशस्त्र प्रहरी स्रोतका अनुसार सिन्धुपाल्चोक १६ नम्बर गण, जुम्लाको ३३ नम्बर गण, पर्वतको २५ नम्बर गण, उदयुर ५ नम्बर गण र हुम्लाको ४४ गुल्म हटाउने प्रस्ताव गृह मन्त्रालयलाई गरिएको छ । सशस्त्र प्रहरीका प्रवक्ता डीआईजी विदुर खड्कासँग कुराकानी गर्न खोज्दा उनी सम्पर्कमा आउन चाहेनन् ।

गृह मन्त्रालयका प्रवक्ता फणिन्द्रमणि पोखरेलले भने निर्वाचनका लागि आवश्यक सुरक्षाकर्मी सरुवा गर्नेबाहेक गुल्म र गण घटाउने प्रस्ताव नआएको बताए । ‘चुनावका लागि सुरक्षाकर्मी यताउता सार्ने कुरा स्वाभाविक हो । त्यहीँ कुरा होला, गुण र गुल्म नै हटाउने भन्ने नै चाहिँ होइन,’ पोखरेलले शिलापत्रसँग भने ।

हाल सशस्त्र प्रहरीमा सातवटै प्रदेश र उपत्यका गरी ८ बाहिनी, २७ गण र १७ गुल्म छन् । २१ दिनका लागि आईजीपीमा नियुक्त भएका केसी सशस्त्र प्रहरी नियमावली अनुसार ३० वर्षे सेवा अवधिका कारण १८ वैशाखमा अनिवार्य अवकाशमा जाँदैछन् ।

उनीसँगै अर्का एआईजी रामशरण पौडेल पनि अवकाशमा जानेछन् । १९ वैशाखमा सशस्त्र प्रहरीको आईजीपीको नेतृत्वमा राजु अर्याल आउनेछन् । केसी आईजीपीमा बढुवा भएपछि बढुवा समितिले रिक्त एआईजीमा अर्याललाई बढुवा सिफारिस गरेको थियो ।

मंगलबारको मन्त्रिपरिषद्‌को बैठकले अर्यालको बढुवा गरेको हो । आईजीपीको प्रतिस्पर्धा नारायणदत्त पौडेल र चन्द्रप्रकाश गौतमलाई एआईजी बढुवामा पछि पारेपछि अर्याल निर्विकल्प आईजीपी हुन लागेका हुन् ।

प्रकाशित मिति: बुधबार, वैशाख १४, २०७९ १३:११