भाडाका गाडी प्रयोग गरेर निर्वाचनको सुरक्षामा खटिँदै प्रहरी, ६२ हजार सुरक्षाकर्मी परिचालन हुने

भाडाका गाडी प्रयोग गरेर निर्वाचनको सुरक्षामा खटिँदै प्रहरी, ६२ हजार सुरक्षाकर्मी परिचालन हुने

A+ A A-

स्थानीय तहको चुनावमा प्रहरीले भाडाको गाडी प्रयोग गर्ने भएको छ । त्यसका लागि अर्थ मन्त्रालयले प्रहरी प्रधान कार्यालयलाई २४ करोड बजेट उपलब्ध गराएको छ । प्रहरी प्रधान कार्यालयले चुनावका लागि देशभर करिब १५ सयवटा गाडी आवश्यक रहेको प्रतिवेदन गृह मन्त्रालयलाई बुझाएको थियो । सरकारले लामो समयसम्म गाडी खरिद गर्ने कि भाडाका गाडी प्रयोग गर्ने भन्ने निर्णय प्रहरीलाई दिएको थिएन ।

तर, अन्तिम समयमा भने अर्थले भाडाकै गाडी प्रयाेग गर्न भनेर बजेट उपलब्ध गराएको प्रहरी प्रवक्ता एसएसपी विष्णु केसीले जानकारी दिए । केसीका अनुसार चुनावको सात दिनसम्मलाई प्रहरीले पहाडी जिल्लामा चारवटा र तराईका जिल्लामा ३५ वटा गाडी भाडामा लिने तयारी गरेको छ ।

‘चुनावका लागि आवश्यक सवारीसाधन हामीसँग अपुग नै हो,’ एसएसपी केसीले भने, ‘त्यसका लागि यातायात व्यवसायीसँग समन्वय गरेर भाडामा लिने तयारी गरेका छौँ ।’ यसअघि सरकारले प्रहरीलाई म्यादी प्रहरी भर्ना गर्न ४ अर्ब १९ करोड बजेट उपलब्ध गराएको थियो । जसअनुसार प्रहरीले स्थानीय चुनावका लागि १ लाख म्यादी प्रहरी भर्ना गरेको थियो ।

म्यादी प्रहरीले ४० दिनको तलब ३० हजार २ सय ४०, खाद्यान्नबापत एकमुस्ट ७ हजार २ सय, पोशाकका लागि ६ हजार र निर्वाचनस्थल आवतजावतका लागि थप १ हजार गरी जम्मा मासिक ४४ हजार ४ सय रुपैयाँ पाउनेछन् ।

चुनावका लागि प्रहरी प्रधान कार्यालय र सशस्त्र प्रहरी बलले १७ अर्ब ६० करोड ५५ लाख बजेट माग गरेका थिए । तर, सरकारले यसको आधा मात्रै बजेट उपलब्ध गराएको छ । एसएसपी केसीका अनुसार स्थानीय चुनावमा १ लाख म्यादी प्रहरीबाहेक ६२ हजारको हाराहारीमा प्रहरी परिचालन हुने उनको भनाइ छ ।

यो स्थानीय चुनावमा देशमा कुनै पनि ठूलो समूह भूमिगत रूपमा नरहेको र पछिल्लो समय नेकपा विप्लव समूह पनि शान्तिपूर्ण राजनीतिमा आएका कारण सुरक्षा चुनौती नरहेको प्रहरीको विश्लेषण छ । यद्यपि, प्रहरी र अन्य तीनवटै सुरक्षा निकायसँग सुरक्षा अवस्थाबारे विश्लेषण गरेर प्रहरी परिचालन गर्ने तयारी प्रहरी प्रधान कार्यालयको छ ।

जसअन्तर्गत सामान्य निर्वाचन केन्द्रमा तीन जना प्रहरी र पाँच जना म्यादी प्रहरी, संवेदनशील निर्वाचन केन्द्रमा तीन प्रहरी र सात म्यादी प्रहरी, अति संवेदनशील केन्द्रमा चार जना प्रहरी र १० जना म्यादी प्रहरी खटाइने प्रहरी प्रधान कार्यालयले जनाएको छ ।

त्यस्तै, महानगरमा चार जना सिनियर प्रहरी अधिकारी, उपमहानगरमा तीन जना, नगरपालिका र गाउँपालिकामा दुई/दुई जना खटाइने प्रधान कार्यालयले जनाएको छ ।

त्यस्तै, मुख्य निर्वाचन अधिकारीको सुरक्षा र कार्यालयका लागि जुनियर प्रहरी अधिकारीको कमाण्डमा १० जना प्रहरी परिचालन हुनेछन् । प्रहरी जनशक्तिको कमी हुने भएपछि निर्वाचन अधिकारीको निवासको सुरक्षाको जिम्मा भने सशस्त्र प्रहरी बलले गर्ने भएको छ ।

प्रकाशित मिति: मंगलबार, वैशाख १३, २०७९ १३:४१