भरतपुरमा मनोनयन दर्ता : रिक्सा चढेर ध्यान तान्नेदेखि दलबलको शक्ति (फोटो फिचर)

भरतपुरमा मनोनयन दर्ता : रिक्सा चढेर ध्यान तान्नेदेखि दलबलको शक्ति (फोटो फिचर)

A+ A A-

चितवनका भरतपुर महानगरपालिकामा उम्मेदवार मनोनयन दर्ता शान्तिपूर्ण रुपमा सम्पन्न भएको छ । सोमबार मुख्य निर्वाचन अधिकृतको कार्यालय पुगी पार्टीगत र स्वतन्त्र उम्मेदवारी दर्ता गराएका छन् । कोही उम्मेदवार दलबलसहित बाजागाजा बजाएर आएका थिए भने कोही पृथक रुपमा ।

भरतपुर महानगरपालिकाको मेयर पदमा नेकपा एमालेका तर्फबाट विजय सुवेदीले उम्मेदवारी दर्ता गराएका छन् । सुवेदीले उम्मेदवारी दर्ता गराउन जानुपूर्व वीपी कोइराला, मदन भण्डारी र जीवराज आश्रितको शालिकमा फूल चढाएका थिए । राप्रपासँग चुनावी तालमेल गरेको एमालेले उपमेयरमा उम्मेदवारी दर्ता गराएन । उपमेयर पदमा राप्रपाकी हिमाला गुरुङको उम्मेदवारी परेको छ ।

सत्ता गठबन्धनको तर्फबाट मेयरमा नेकपा माओवादी केन्द्रकी रेनु दाहालले उम्मेदवारी दर्ता गराएकी छिन् भने उपमेयरमा नेपाली कांग्रेसका चित्रसेन अधिकारीको उम्मेदवारी परेको छ । नेपाली कांग्रेसको असन्तुष्ट समूहको नेतृत्व गर्दै मेयरमा पूर्वसांसद जगन्नाथ पौडेलले स्वतन्त्र उम्मेदवारी दर्ता गराएका छन् । चारतारे झण्डासहित जुलुस निकालेर पौडेल उम्मेदवारी दर्ता गराउन पुगेका थिए ।

भरतपुरको मेयरमा कांग्रेसका मोहितजंग पाण्डेले पनि स्वतन्त्र उम्मेदवारी दर्ता गराएका छन् । विवेकशीलसाझा पार्टीको तर्फबाट भरतपुरको मेयरमा प्रवीण काफ्ले र उपमेयरमा पुष्पा सापकोटाले उम्मेदवारी दर्ता गराएका छन् । उनीहरु ई रिक्सा चढेर उम्मेदवार मनोनयन दर्ता गराउन निर्वाचन अधिकृतको कार्यालय पुगेका थिए ।

विप्लव नेतृत्वको नेकपाका नेता दुर्गाप्रसाद शर्माले पनि महानगरको मेयर पदमा स्वतन्त्र उम्मेदवारी दर्ता गराएका छन् । उनी पार्टीको भरतपुर महानगर इन्चार्ज हुन् ।

राष्ट्रिय जनमोर्चाको तर्फबाट भरतपुरको मेयरमा भक्तिराम गौतम र उपमेयरमा देवी शर्माले उम्मेदवारी दर्ता गराएका छन् । सत्ता गठबन्धनबाट बाहिरिएको जनमोर्चाले भरतपुरको मेयर र उपमेयरमा उम्मेदवारी दिएको हो ।

उम्मेदवारी दिन आउनेले बाजागाजा बजाउन भने आचासंहिता उल्लंघन गर्दै बालबालिकाको प्रयोग गरेको पनि देखियो । सम्रगमा भरतपुरमा शान्तिपूर्ण ढङ्गले उम्मेदवारी मनोनयन सकिएको छ ।