धमाधम उम्मेदवारी दर्ता (फोटो फिचर)

A+ A A-

स्थानीय तह चुनावका लागि उम्मेदवारको मनोनयनको पहिलो दिन आइतबार चितवनको भरतपुरस्थित मुख्य निर्वाचन अधिकृतको कार्यालयमा उम्मेदवारहरूले धमाधम मनोनयन दर्ता गराएका छन् ।

भरतपुर महानगरपालिकाको प्रमुख पदमा नेपाल मजदुर किसान पार्टी (नेमकिपा) का हरिप्रसाद दुलालले पहिलो मनोनयन दर्ता गराएका छन् । मनोनयन दर्ताको पहिलो दिन सुरुमै दुलालले महानगरको प्रमुख पदमा मनोनयन दर्ता गराएको मुख्य निर्वाचन अधिकृतको कार्यालय भरतपुरका सूचना अधिकारी पुरुषोत्तम पौडेलले जानकारी दिए ।

उनीसँगै अन्य दलहरूले आफ्नो र्‍यालीसहित मनोनयन दर्ता गराइरहेका छन् । हालसम्म चितवनको भरतपुर महानगरपालिकाको प्रमुख पदमा सात जनाले मनोनयन दर्ता गराएका छन् । उनीहरूमध्ये तीन जनाले राजनीतिक दल र चार जनाले स्वतन्त्रतर्फबाट मनोनयन दर्ता गराएका हुन् ।

सूचना अधिकारी पौडेलका अनुसार प्रमुख पदमा नेपाल मजदुर किसान पार्टीबाट हरिप्रसाद दुवाल, राष्ट्रिय जनमुक्ति पार्टीबाट ज्ञानबहादुर गुरुङ र मंगोल नेश्नल अर्गनाइजेसनबाट टेकबहादुर पुनले मनोनयन दर्ता गराएको बताए ।

स्वतन्त्रतर्फबाट रुद्रप्रसाद सापकोटा, मोहित पाण्डे, यमकान्त शर्मा कँडेल र रामकृष्ण ओझाले पनि मनोनयन दर्ता गराएका हुन् ।

आइतबार साना दलहरू र स्वतन्त्र उम्मेदवारहरूले उम्मेदवारी गराएका छन् भने गठवन्धन दल र एमालेले भोलि मात्रै मनोनयन दर्ता गराउने भएका छन् । निर्वाचन आयोगले आइतबार बिहान १० देखि अपराह्न ५ बजेसम्म र सोमबार पनि बिहान १० देखि अपराह्न ५ बजेसम्म उम्मेदवारले मनोनयन दर्ता गर्नसक्ने कार्यतालिका बनाएको छ ।