केन्द्रको निर्णयपछि चितवन कांग्रेसको ध्यान वडाध्यक्षमा

A+ A A-

आसन्न स्थानीय चुनावमा भरतपुर महानगरपालिकाको मेयर पाउनुपर्ने दाबी गर्दै आएको चितवन कांग्रेसको ध्यान केन्द्रको निर्णयसँगै वडाध्यक्षमा केन्द्रित भएको छ । सत्ता गठबन्धन दलको निर्णयले महानगर भागवण्डा गर्दा भरतपुर पुनः माओवादीकै पोल्टामा परेको हो ।

यसपटक कांगेसले कुनै पनि हालतमा भरतपुरमा आफ्नो पार्टीको मेयर हुनुपर्ने भन्दै लामो समयदेखि केन्द्रसम्म लबिङ गर्दै आएको थियो । तर, प्रधानमन्त्री तथा कांग्रेस सभापति शेरबहादुर देउवाले चितवनको भरतपुर माओवादीलाई दिए । चितवनका कांग्रेसले गरेको लामो प्रयास र लबिङ अन्तत: विफल भएको छ । यो पटकसहित कांग्रेसले १० वर्षसम्म आफ्नो चुनाव चिह्न रुखमा मत हाल्न वञ्चित हुने भएका छन् ।

अघिल्लो स्थानीय चुनावमा माओवादीलाई सघाएका कांग्रेसहरूलाई यसपटक भरतपुर कुनै पनि हालतमा कांग्रेसले पाउनेमा विश्वस्त थिए ।

माओवादीले भरतपुरलाई दाबी गर्न थालेपछि चितवन कांग्रेसले मेयर छाड्न नसक्ने भन्दै चेतावनीसमेत दिँदै आएको थियो । उनीहरूले यसै विषयलाई लिएर प्रधानमन्त्री तथा कांग्रेस सभापति देउवालगायत एक दर्जन नेतालाई भेटेर ध्यानाकर्षणसमेत गराए । यता भरतपुर महानगरका २९ वटै वडाका वडा सभापतिहरूको बैठकले भरतपुरको मेयर नपाए एक्लाएक्लै चुनाव लड्ने भनेर निर्णय गर्दै जिल्ला कार्यसमितिमा बुझाए ।

तर, गठबन्धनको निर्णयअनुसार भरतपुर माओवादीलाई पर्ने निश्चित भएपछि आक्रोशित बनेका कार्यकर्तालाई मत्थर पार्न सभापति देउवाले जिल्ला सभापति राजेश्वर खनाललाई बोलाएर सत्ता गठबन्धनलाई निरन्तरता दिन भरतपुरको मेयर माओवादीलाई दिनुपर्ने अवस्था आएको जानकारी गराएका थिए ।

तर, मेयरका लागि चितवन कांग्रेसले गरेको ‘इफोर्टलाई देउवाले गठबन्धनको नाममा मैदान छाड्न दबाब दिएपछि चितवनका कांग्रेसहरूको अहिलेसम्मको माग बालुवामा पानी खनाएसरह भएको छ ।

माओवादीले मेयर पाउने भएपछि चितवन कांग्रेसहरू पर्ख र हेरको अवस्थामा रहेको देखिन्छ । गठबन्धनले गरेको निर्णयलाई तल्लो तहले कार्यान्वयन गर्नुपर्छ भन्ने मानसिकतामा पुगेका चितवनका कांग्रेसहरू बाँकी रहेका सबै पदहरूमा आफ्नो दाबी रहनेतर्फ लागेको देखिन्छ । जिल्लादेखि वडासम्मका नेताहरूको एउटै भनाइ छ– उपमेयरलगायत सबै वडामा कांग्रेसको नेतृत्त्व हुनुपर्‍यो ।

भरतपुर –१४ का वडा सभापित राजेन्द्र शाखी उपमेयरसहित सबै वडा का‌ग्रेसले पाउनुपर्ने तर्क राख्छन् । मेयर नपाए पनि आफुहरूले अब वडामा हुने गठबन्धनको मोडालिटीलाई हेरेर अब के गर्ने भन्ने निष्कर्ष निकाल्ने उनले बताए ।

‘गठबन्धनको कुरा छ त्यसको मोडालिटी भने २९ वटै वडामा का‌गेसले प्रमुख पद पाउनुपर्छ भन्ने हो’, उनले भने ।

यदि आफूहरूले भनेजस्तो निर्णय नभएमा मेयरमा माओवादीलाई सघाउनैपर्छ भन्ने बाध्यता नहुने शाखीले बताए । पार्टीले निर्णय गरे पनि अघिल्लो चुनावझै यसपालि रेणु दाहाललाई जिताउन झण्डा बोकेरै आफूहरू लागिपर्न नसक्ने शाखीको भनाइ छ ।

गठबन्धनका नाममा केन्द्रले नै सबै निर्णय गर्दै गएपछि तल्लो तहको निकायको कुनै पनि भूमिका अडिग हुन नपाउने उनको भनाइ थियो । उनले भने, ‘पार्टीले निर्णय गरिसकेपछि हाम्रो खास भूमिका के रह्यो र ? तर, यसपालि हामीलाई हसिया हथौडा बोक्नैपर्छ भन्ने जरुरी छैन ।’ अहिलेको समय संवेदनशील रहेको बताउँदै उनले तत्कालै क्रिया प्रक्रियामा उत्रिनुभन्दा पनि जिल्ला तहको गठबन्धनको संयन्त्रले सबै वडामा कसरी टुंग्याउँछ र जिल्लाको नेतृत्त्वले आफूहरूलाई कसरी सम्बोधन गर्छ, पर्ख र हेरको अवस्थामा रहेको उनको भनाइ छ ।

भरतपुर २१ का वडा सभापति कृष्णकान्त भण्डारी केन्द्रको निर्णय आएपछि आफूहरू चुप लागेर बस्नुको विकल्प नरहेको बताउँछन् । तर, अहिलेको चुनावमा पहिलेजस्तो लागिपरेर मेयरलाई जिताउनैपर्छ भन्ने बाध्यता महसुस नभएको उनको भनाइ थियो । उनले भने, ‘हामीले यो परिस्थिति स्वीकार गरेर अगाडि बढ्ने अवस्था छैन । अब साइलेन्ट बस्नेभन्दा अर्को विकल्प रहेन । पहिलेजस्तो हामी उनीहरूलाई पुरस्कृत गर्न लाग्दैनौँ । शान्त बस्छौँ ।’

भरतपुर २८ का वडा सभापति डन्डापणि ढकालले उपमेययरलगायत सबै वडा कांग्रेसले पाउने हो भने मेयरमा माओवादीलाई सघाउन सकिने बताए । उनले भने, ‘केन्द्रमा रामचन्द्र पौडेलले उठाएको जस्तो मेयरबाहेक सबै वडा र उपमेयर कांग्रेसले पाउने भयो भने कुरा मिल्न सक्छ नत्र परिस्थिति अर्कै बन्न सक्छ ।’

कांग्रेसका केन्द्रीय सदस्य टेकप्रसाद गुरुङले भरतपुर कांग्रेसले पाउने पालो हुँदाहुँदै केन्द्रले गरेको निर्णय अझै पनि भरतपुरले स्वीकार्न नसकेको बताए । उनले भने, ‘म त अझै पनि पोइन्टमै छु भरतपुर कांग्रेसले नै पाउनुपर्छ । यसमा हामी सबै प्रतिबद्ध छौँ ।’ तर, पछिल्लो समय कांग्रेस माओवादीको दबाबमा फस्दै गएको उनले बताए । कांग्रेसले पाउने भाग माओवादीकै दबाबमा केन्द्रले निर्णय गरेको उनको भनाइ थियो ।

उनले भने, ‘केन्द्रले निर्णय गरिहाल्यो, त्यसमा हाम्रो भन्नु केही छैन । तर, उपमेयरलगायत सबै वडा कांगेसले पाएमा अझै पनि केही कुरा मिल्न सक्छ ।’ अहिलेसम्म केन्द्रले जिल्लालाई निश्चित निर्णय नपठाएको उनले बताए ।

उनले भने, ‘चितवन कांग्रेसले गरेको निर्णयलाई उल्टाउने काम पनि त चितवन कांग्रेसले नै गर्नुपर्‍यो नि । त्यसको बारेमा हामीलाई कुनै जानकारी आएको छैन ।’

लगातार १० वर्षसम्म कांग्रेसले रुखमा भोट मत हाल्न नपाउदा महानगरमा कांग्रेसको अवस्था कस्तो छ भनेर आकलन गर्न समेत कठिन हुने उनले बताए ।

प्रकाशित मिति: बुधबार, वैशाख ७, २०७९ १८:५०