आगामी आवदेखि मुख्यमन्त्री रोजगार कार्यक्रमका योजना बजेट कितावमै उल्लेख गरिने

आगामी आवदेखि मुख्यमन्त्री रोजगार कार्यक्रमका योजना बजेट कितावमै उल्लेख गरिने

A+ A A-

कर्णाली प्रदेश सरकारले आगामी आर्थिक वर्षदेखि मुख्यमन्त्री रोजगार कार्यक्रममार्फत कार्यान्वयन गरिने योजनालाई बजेट किताबमै उल्लेख गर्ने भएको छ ।

हालसम्म मुख्यमन्त्री कार्यालअन्तर्गत बजेट विनियोजन गर्ने र आर्थिक वर्षको अन्तिममा गएर योजना छनोट गर्ने परिपाटी रहेकोमा आगामी आवदेखि पहिले नै योजना छनोट गरिने भएको हो ।
्
प्रदेश सरकारले आगामी आर्थिक वर्षका लागि कार्यान्वयन हुने योजना छनोट गरेर पठाउन गाउँपालिका/नगरपालिकाहरुलाई पत्राचार पनि गरिसकेको छ ।

कार्यविधि संशोधन गरेर वडास्तरबाट पाँचवटा आयोजना सकंलन तथा प्राथमिकीकरण गरी सम्बन्धित स्थानीय तहलाई पठाउन र स्थानीय तहबाट प्राप्त आयोजनाहरूमध्ये निर्वाचित सांसदको संयोजकत्त्वमा रहेको समितिले सम्बन्धित जिल्लाका सामाजिक विकास कार्यालयहरुमार्फत तीन आयोजनाको छनोट तथा प्राथमिकीकरण गरी मुख्यमन्त्री कार्यालयमा पठाउन भनिएको छ ।

मुख्यमन्त्री रोजगार कार्यक्रम प्रभावकारी नभएको भन्दै आलोचना हुँदै आएको थियो । मुख्यमन्त्री रोजगार कार्यक्रमबाट सञ्चालन हुने योजनाको गुणस्तर कायम गर्न तथा दुरुपयोग रोक्न पहिले नै योजना छनोट गर्न लागिएको मुख्यमन्त्री जीवन बहादुर शाहीले बताए ।

आगामी आर्थिक वर्ष २०७९/०८० को बजेट तथा कार्यक्रममा अवण्डा बजेट नराखिने पनि मुख्यमन्त्री शाहीले बताएका छन् । बुधबार मन्त्रालयमा आयोजना गरिएको नियमित पत्रकार भेटघाट कार्यक्रममा प्रदेश सरकारले गरेका कामको बारेमा पनि जानकारी गराइएको छ ।

चालु आर्थिक वर्षको चैतसम्ममा जडिबुटी विकास कार्यक्रम अन्र्तगत (जडिबुटी पकेट क्षेत्र) करिव ५ सय हेक्टरमा जडिबुटी खेती सुरु गरिएको तथा करिव तीन सय जनालाई उद्यमशीलता तालिम दिएर रोजगार बनाइएको प्रदेश सरकारले जनाएको छ ।

यस्तै १ सय ७० किलोमिटर नयाँ सडकको ट्र्याक खोलिएको, ३० किलोमिटर सडक स्तरोन्नति गरिएको तथा ११.५ किलोमिटर सडक कालोपत्रे गरिएको जनाइएको छ ।

यहीँ अवधिमा सडक पुल सात वटा सम्पन्न भएको प्रदेश सरकारले जनाएको छ । जनता आवास कार्यक्रमअन्तर्गत ६ सय १३ आवास निर्माण सम्पन्न भएको तथा थप २ सय घरधुरी जनता आवास कार्यक्रमअन्र्तगत र विपन्न आवास कार्यक्रममार्फत २०० गरेर ४०० घरधुरी विपन्न परिवारको घर निर्माणका लागि छनोट प्रक्रियामा रहेको जनाइएको छ ।

चालु आर्थिक वर्षमा कर्णालीका १ हजार २३९ हेक्टर जमिनमा सिँचाई सुविधा पुग्नुका साथै १० हजार २८६ बराबर स्वरोजगार बनेको प्रदेश सरकारको तथ्यांक छ । यस्तै चक्लाबन्दी कार्यक्रममार्फत १ हजार २०५ रोपनीमा आलु/बदाम/स्याउ/ओखर/किवी उत्पादन सुरु गरिएको छ । ३१० जना ब्यवसायीहरुलाई बैंकमार्फत ५७ करोड ऋण लगानी गरिएको छ । सो वापत् मन्त्रालयबाट २ करोड ५० लाख ब्याज भुक्तानी गरिएको छ । सार्वजनिक विद्यालयको भौतिक पूर्वाधार विकासका लागि ७९ वटै पालिकामा ४०० कक्षा कोठा भवनहरु निर्माणको चरणमा रहेको जनाइएको छ ।

साथै चालु आर्थिक बर्षका ९ महिनामा लक्ष्य बमोजिम ६०.७३% अर्थात ३६ करोड ४४ लाख राजस्व संकलन भएको जनाइएको छ ।

प्रकाशित मिति: बुधबार, वैशाख ७, २०७९ १७:०४