गुप्तचर विभागको एक एआईजीका लागि सात डीआईजी प्रतिस्पर्धामा, वैद्य र जोशीको चर्चा

गुप्तचर विभागको एक एआईजीका लागि सात डीआईजी प्रतिस्पर्धामा, वैद्य र जोशीको चर्चा

A+ A A-

सशस्त्र प्रहरी बलमा सशस्त्र महानिरीक्षक (आईजीपी) को बढुवाभन्दा अतिरिक्त महानिरीक्षक एआईजीको बढुवा पेचिलो थियो ।

३० चैतमा आईजीपीमा बढुवा भएका एआईजी पुष्पराम केसीको कार्याकाल करिब तीन साता मात्रै हुने भएपछि सरकारलाई आईजीपीको बढुवा गर्न सकस थिएन ।

एआईजी बढुवा हुुँदा दोस्रो वरीयतामा परेका केसीका प्रतिस्पर्धी रामशरण पौडेल आईजीपी हुने दौडमै लागेनन् । केसी आईजीपी नियुक्त भएपछि रिक्त भएको एआईजी बढुवाका लागि भने तीन जना डीआईजीहरू राजु अर्याल, नाराणदत्त पौडेल र चन्द्रप्रकाश गौतमको दौड तीव्र थियो ।

जसमध्ये डीआईजी अर्यालले बाजी मारिसकेको छन् । उनी डीआईजी बढुवा हुँदा पनि एक नम्बरमा थिए । अर्याललाई बढुवा समितिले आइतबार बढुवा सिफारिस गरेको हो ।

उनीमाथिको बढुवाप्रति समितिमा कुनै उजुरी नपरे अर्को साता एआईजीको फुली लगाउनेछन् । उनका प्रतिस्पर्धीहरू पौडेल र गौतमलाई उनले एआईजी बढुवामै पछि पारेका छन् ।

उसो त अर्याल एआईजी भएको छोटो समयमै १९ वैशाखमा सशस्त्र प्रहरी बलको निर्विकल्प रूपमा नेतृत्त्व सम्हाल्नेछन् । आईजीपी केसीसँगै अर्का एआईजी रामशरण पौडेललेसमेत अवकाश पाउने भएपछि अर्यालको आईजीपीको यात्रा निश्चित प्रायः भएको हो ।

सशस्त्र प्रहरी बलमा एआईजीको दरबन्दी दुई छ । अर्यालले सशस्त्र प्रहरी बलको आईजीपीको पूरा चार वर्ष कार्यकाल सम्हाल्नेछन् ।

ठीक यही शैलीमा राष्ट्रिय अनुसन्धान विभाग ‘गुप्तचर’ निकायमा पनि अतिरिक्त मुख्य अनुसन्धान निर्देशक (एआईजी) बढुवाको रस्साकसी सुरु भएको छ ।

गुप्तचर विभागमा अतिरिक्त मुख्य अनुसन्धान निर्देशकको दरबन्दी एक मात्रै छ ।

हालका अतिरिक्त मुख्य अनुसन्धान निर्देशक यादव रेग्मीले दुई दिनपछि ९ वैशाखमा अवकाश पाउने भएपछि रिक्त पदको बढुवाका लागि सात जना अनुसन्धान निर्देशक डीआईजीहरू सुमन वैद्य, ओम जोशी, हुतराज थापा, टेकेन्द्र कार्की, हरिहर पौडेल, कुलदीप थापा, सुनील ढकाल प्रतिस्पर्धामा छन् ।

उनीहरूमध्ये सबैभन्दा बलिया वैद्य र जोशी देखिएका छन् । वैद्य व्यावसायिक डीआईजी हुन् । उनीसँग विभिन्न विदेशका तालिम गरेको अनुभव र नेपालको अधिकांश जिल्लामा रहेर काम गरेको अनुभव छ । माओवादी सशस्त्र युद्धको आधार इलाकामा काम गरेको अनुभव उनीसँग छ ।

उनीपछि जोशी बलिया प्रतिस्पस्पर्धी छन् । जोशी सत्तानिकट राजनीतिक दलका नेतासँग पनि निकट सम्बन्धमा छन् ।

उसो त अहिले अतिरिक्त मुख्य अनुसन्धान निर्देशक एआईजी हुने एक जना नै भदौपछि गुप्तचर प्रमुखमा बढुवा हुने भएपछि एआईजी बढुवाको चलखेल तीव्र छ । हालका गुप्तचर प्रमुख यदुलाल खरेलले भदौको अन्तिम साता अवकाश पाउनेछन् ।

त्यो अवस्थामा अहिलेको सात डीआईजीमध्ये एक प्रमुख हुनेछन् । गुप्तचरमा एआईजीको एक दरबन्दी थपको चर्चासमेत छ । गृह मन्त्रालयअन्तरर्गतको रहेको गुप्तचर विभाग एमाले अध्यक्ष केपी ओली नेतृत्वको सरकारको पालामा प्रधानमन्त्री कार्यालयअन्तर्गत राखिएको छ ।

ओली नेतृत्त्वमा पालामा गुप्तचर विभागको कर्मचारीको दुरुपयोग गरेको आरोप लागेको थियो । तर, हालका प्रधानमन्त्री शेरबहादुर देउवाले भने प्रधानमन्त्री भएको १० महिना पुग्दा पनि गुप्तचर विभागका कर्मचारीलाई एकचोटि पनि ब्रिफिङ गर्न सकेका छैन् ।

प्रकाशित मिति: बुधबार, वैशाख ७, २०७९ १८:०१