ताप्लेजुङको आठराई र मैवाखोलामा कांग्रेस र माओवादीको गठबन्धन, एमाले एक्लै लड्दै

ताप्लेजुङको आठराई र मैवाखोलामा कांग्रेस र माओवादीको गठबन्धन, एमाले एक्लै लड्दै

A+ A A-

ताप्लेजुङको आठराई त्रिवेणी र मैवाखोला गाउँपालिकामा कांग्रेस र माओवादी केन्द्रले गठबन्धन गरेर चुनावमा उम्मेदवारी दिने भएका छन् । आठराई त्रिवेणी गाउँपालिकामा कांग्रेसले प्रमुख र माओवादी उपप्रमुख पाउने गरी गठबन्धन भएको छ । यस्तै, मैवाखोला गाउँपालिकामा माओवादीले प्रमुख र कांग्रेसले उपप्रमुख पाउने टुङ्गो लागेको छ ।

अघिल्लो स्थानीय चुनावमा आठराई त्रिवेणी गाउँपालिकामा कांग्रेसले जितेको थियो भने मैवाखोला गाउँपालिकामा एमाले सबै वडासहित गाउँपालिका नै जितेको थियो । मैवाखोला गाउँपालिकामा एमाले सचिव योगेश भट्टराईको गाउँपालिका हो ।

आठराई त्रिवेणी गाउँपालिका

गत स्थानीय चुनावमा आठराई त्रिवेणी गाउँपालिकाको अध्यक्षमा नेपाली कांग्रेस विश्वनाथ सिटौला २,२२७ मत प्राप्त गरी विजयी भएका थिए । उनले एमालेका लक्ष्मीबहादुर याक्सोलाई १३ मतले पराजित गरेका थिए । एमालेका उम्मेवार याक्सोले २,२१४ मत ल्याएका थिए । उपाध्यक्षमा भने एमालेकी मञ्जु पौड्याल भट्टराई विजयी भएकी थिइन् ।

पाँचवटा वडा रहेको आठराई त्रिवेणीको १ र २ नम्बर वडामा कांग्रेसको प्यानल नै विजयी भएको थियो भने ३ र ४ मा एमालेको प्यानल नै विजयी भएको थियो । ५ नम्बरमा अध्यक्षमा माओवादी केन्द्र र सदस्यहरूमा माओवादीका दुई एमालेका दुई जना विजयी भएका थिए ।

यो पालिकामा कांग्रेस र माओवादीले गठबन्धन गरेर उम्मेदवारी दिने भएका छन् ।

कांग्रेसले प्रमुख र माओवादीले उपप्रमुख पाउने गरी एक किसिमको भागवण्डा भएको गाउँपालिका प्रमुख विश्वनाथ सिटौलाले जानकारी दिए । फेरि प्रमुख पदमा उम्मेदवारी दिने उनले बताए । उनीसँगै कांग्रेसबाटै खजेन्द्र याक्सो र अशोक आङवोहाङले पनि प्रमुख पदका लागि दाबी गर्दै आएका छन् । माओवादीबाट उपप्रमुखमा प्रलिज हाङजाम, मनु लिम्बू र मणि किम्बूको चर्चा छ ।

यस्तै, एमालेबाट भने जितेन पोम्मु पालिकाको प्रमुख उठ्ने टुङ्गो लागेको छ । एमालेबाट उपप्रमुखमा भने मञ्जु पौड्याल भट्टराई नै दोहोरिने भएकी छिन् । उनीहरू दुवैको सर्वसम्मत भएको एमालेका पोमुले जानकारी दिए ।

मैवाखोला गाउँपालिका

मैवाखोला गाउँपालिकाबाट गत स्थानीय चुनावमा एमालेका राजनकुमार थत्लुङ १,८१८ मत प्राप्त गर्दै विजयी भएका थिए । उनका प्रतिद्वन्द्वी नेपाली कांग्रेसका डम्बरबहादुर लिम्बूले १,२१९ मत ल्याएर पराजित भएका थिए । एमालेले ६ सय मतले जितेको थियो । उपाध्यक्षमा एमालेबाट नै कौशिला थत्लुङ लिम्बु विजयी भएकी थिइन् ।

१,२,३,५ र ६ नम्बरमा एमालेको प्यानल विजयी भएको थियो भने ४ नम्बरमा अध्यक्षसहित तीन सदस्य एमाले र एक कांग्रेसका सदस्यमा विजयी भएका थिए ।

एमालेबाट अध्यक्ष थत्लुङसहित गोपाल थोक्सो, योगन्द्र नेयोङ, ध्रुव वायान र थ्रर्ककुमार च्याङवाङ पनि प्रमुखको पदका लागि दौडमा छन् । यस्तै, एमालेबाट उपप्रमुखमा कौशिला लिम्बू, शिवकुमारी चाङवाङ र रामकुमारी लिम्बूको चर्चा छ ।

कांग्रेसबाट खजेन्द्र थकुन, रवीन्द्र वायान र राजेश मासुवाले प्रमुख पदमा उम्मेदवारी दिने घोषणा गरेका छन् । तर, कांग्रेस र माओवादी गठबन्धनका माओवादीका विजय किराँतीलाई प्रमुख पदमा उठाउने तयारी भएको छ ।

प्रकाशित मिति: सोमबार, वैशाख ५, २०७९ १९:५२