रञ्चुला हत्या प्रकरण : धामीझाँक्रीसहित सात जनाविरुद्ध जाहेरी दर्ता

A+ A A-

कञ्चनपुरकाे बेदकोट नगरपालिका– ७, मुसेपानीकी ४३ वर्षीया रञ्चुला साउँद हत्या प्रकरणमा सात जनाविरुद्ध जाहेरी दर्ता भएको छ । मृतकका देवर पदम साउँदले सात जनाविरुद्ध आइतबार प्रहरीमा जाहेरी दिएका हुन् ।

जिल्ला प्रहरी कार्यालय कञ्चनपुरका प्रहरी नायब उपरीक्षक (डीएसपी) चक्रबहादुर शाहका अनुसार भीमदत्त नगरपालिका– ७, हल्दुखालका धर्मानन्द भट्ट, वडा नम्बर १, बाराकुण्डाका नारायणदत्त भट्ट, मुसेपानीकी कमला साउँदविरुद्ध जाहेरी परेको छ ।

यस्तै, स्थानीय कुवेरसिंह साउँद, गौरी साउँद, जानकी घडाल र चक्र साउँदविरुद्ध पनि उजुरी परेको छ । ‘उनीहरूविरुद्ध ज्यान मार्ने उद्योगमा जाहेरी परेको छ,’ डीएसपी शाहले भने, ‘जाहेरीका आधारमा अनुसन्धान भइरहेको छ ।’

प्रहरीले सातै जनालाई पक्राउ गरिसकेकाे छ । उनीहरूविरुद्ध जिल्ला अदालतबाट सात दिनको म्याद थप भएको डीएसपी शाहले जानकारी दिए ।

गएकाे २८ चैतमा टाउको दुख्ने समस्या देखिएपछि रञ्चुला छिमेकी कमलाको घरमा पुगेकी थिइन् । त्यहाँ झारफुक गर्ने धर्मानन्द र नारायणदत्त भट्टले रञ्चुलालाई थारूको भुत लागेको बताएका थिए । धामीझाँक्रीको समूहले रञ्चुलालाई आगोमा तताएको फलामे रडले हान्ने गरेको उनका आफन्तले बताउँदै आएका छन् ।

उनीहरूका अनुसार रञ्चुलाको १ वैशाखमा मृत्यु भएको थियो । रञ्चुलाको शव गन्हाएपछि शनिबार स्थानीयले थाहा पाएका थिए । त्यसपछि प्रहरीले घटनास्थलमा भेटिएको फलामे रडसहित सात जनालाई नियन्त्रणमा लिएको थियो ।

शव परीक्षण गर्न धनगढीबाट विज्ञ मगाइयो

महाकाली प्रादेशिक अस्पतालमा राखिएकाे मृतक साउँदको शव अहिलेसम्म परीक्षण हुन सकेको छैन । शव सडेकाले परीक्षण गर्न असहज भएको अस्पतालका निमित्त मेसु डा. अर्जुनकुमार भट्टले बताए । शव कुहिएकाले फरेन्सिक विज्ञबाट मात्रै परीक्षण गर्नुपर्ने भन्दै सेती प्रादेशिक अस्पताल कैलालीबाट विज्ञ मगाइएकाे उनले बताए ।

महाकाली प्रादेशिक अस्पतालका सूचना अधिकारी उषा भट्टका अनुसार धनगढीबाट फरेन्सिक विज्ञ पुग्नेबित्तिकै शव परीक्षण हुने बताइन् । उनले सम्भवत आज नै शव परीक्षण हुने बताइन् ।

दोषीलाई कारबाही गर्न महिला आयोगको माग

रञ्चुलाको कुटपिट गरी हत्या गर्नेलाई तत्काल कारबाही गर्न राष्ट्रिय महिला आयोगले सरकारसँग माग गरेको छ । आइतबार एक विज्ञप्ति जारी गर्दै आयोगले दोषीलाई कारबाही गर्न माग गरेकाे हाे ।

प्रकाशित मिति: सोमबार, वैशाख ५, २०७९ १२:१२