झापामा राप्रपासँग भिड्न कांग्रेस-एमाले तालमेलकाे चर्चा, नेताहरूबीच छलफल

A+ A A-

नेकपा एमालेका अध्यक्ष केपी शर्मा ओलीको गृहजिल्ला झापामा एमालेलाई हराउन कांग्रेससहित माओवादी केन्द्र र राप्रपा पनि लागेका छन् । तर, एमाले भने केही स्थानमा राप्रपा र कांग्रेससँगै चुनावी तालमेलका लागि छलफलमा जुटेकाे छ ।

स्थानीय निर्वाचन २०७४ मा झापाको कचनकवल गाउँपालिकामा राप्रपाले बहुमत ल्याएको थियो । कचनकवलमा कांग्रेस दोस्रो र एमाले तेस्रो भएका थिए । राप्रपाले गाउँपालिकामा अध्यक्ष र उपाध्यक्षसहित वडामा जितेकाे थियाे ।

अहिले कचनकवलमा कांग्रेस र एमाले मिलेर चुनावमा जाने छलफल चलिरहेको छ । कांग्रेस र एमालेबीच तालमेलका लागि छलफल चलेकाे एमाले झापाका सचिव शिव ढुंगेलले बताए ।

उनले भने, ‘चुनावको नियम नै हो, ठूलो शक्तिसँग साना शक्तिहरू एकजुट भएर लड्ने, त्यो सम्भावनाका विषयमा छलफल हुँदैछ ।’

नेपाली कांग्रेस झापाका सभापति देउमान थेवेले पनि केही पालिकामा एमालेसँग तालमेल गर्नेबारे कुराकानी भएकाे बताए । तर कांग्रेस सकेसम्म गठबन्धन भत्काउनतिर नलाग्ने उनकाे भनाइ छ । 'केही पालिकामा एमालेसँग मिलेर जानेबारे कुराकानी भएकाे हाे । तर, हामी सकेसम्म सत्ता गठबन्धन कायमै रहाेस् भन्नेमा छाैँ', थेवेले भने ।

अघिल्लो स्थानीय चुनावमा झापाका केही पालिकामा राप्रपाले जितेको थियो । त्यस्ता स्थानमा कांग्रेससँग तालमेलको सभावना हुनसक्ने एमाले सचिव ढुंगेल बताउँछन् । उनले भने, ‘ती स्थानमा कांग्रेसले गठबन्धन छाेडेर आयो भने हामी मिलेर जाने कुरा हुन सक्छ । त्यो सम्भावना छ, केही पटक कुरा पनि भएको छ ।’

त्यसो त, झापामा कांग्रेसले जितेका पालिका पनि छन् । ती पालिकामा भने राप्रपासँग तालमेल गर्न एमाले छलफल गर्दैछ । गौरीगञ्जमा एमालेले एउटा वडामा मात्र जित निकाल्न सकेको थियो । गाउँपालिका अध्यक्ष राप्रपाले जितेको थियो । त्यहाँ राप्रपासँग तालमेल गर्न एमालेले छलफल चलाइरहेको छ । झापा गाउँपालिकामा एमाले र माओवादीबीच चुनावी तालमेलको चर्चा छ । याे गाउँपालिकामा कांग्रेसले अध्यक्ष र एमालेले उपाध्यक्ष जितेको थियाे ।

स्थानीय आवश्यकता हेरेर तालमेल हुने सचिव ढुंगेलले बताए । तर, काँग्रेसले सत्ता गठबन्धनसँगै तालमेलको कुरा गरिरहेको हुँदा एमालेसँग मिल्ने सम्भावना भने कमै देखिएकाे उनको भनाइ छ । ‘काँग्रेस गठबन्धन छाडेर एमालेसँग तालमेल गर्न आउँछ भने सम्भावना बलियो हुन्छ’, उनले भने । पाँच दलीय सत्ता गठबन्धनमा गठबन्धनबाहेकका दलसँग चुनावी तालमेल नगर्ने सहमति केन्द्रमा भएकाे छ ।

प्रकाशित मिति: सोमबार, वैशाख ५, २०७९ ०९:४७