रञ्चुलाको रहस्यमय मृत्यु : जेठानीको घरमा शव गन्हाएपछि छिमेकीले पुलिस बोलाए

रञ्चुलाको रहस्यमय मृत्यु : जेठानीको घरमा शव गन्हाएपछि छिमेकीले पुलिस बोलाए

A+ A A-

दैनिक ज्यालादारी गरी घरगर्जो टार्थिन्, बेदकाेट नगरपालिका- ७, मुसेपानीकी ४३ वर्षीया रञ्चुला साउद । ८ वर्षअघि पतिको मृत्यु भएयता उनले बोनिबुतो गरेरै दुई छोरीहरूलाई पढाउँदै आएकी थिइन् । तर, ३ वैशाखमा उनी नाताले जेठानी पर्ने कमला साउदकाे घरमा मृत फेला परिन्, त्याे पनि शव गन्हाएकाे अवस्थामा ।

रञ्चुलाको रहस्यमय मृत्युको घटनामा प्रहरीले सात जनालाई पक्राउ गरी अनुसन्धान गरिरहेको छ । रञ्चुलाका दुई छोरी छन् । जेठी छोरी १८ वर्षीया सरिता १२ कक्षामा र कान्छी १२ वर्षीया निरा ७ कक्षामा पढ्छन् ।

यस्ताे थियाे घटना

धामीहरू धर्मानन्द भट्ट र नारायणदत्त भट्ट ।

गत २८ चैतमा जाेडले टाउकाे दुख्न थालेपछि रञ्चुला नाताले जेठानी पर्ने कमला साउदकाे घर गइन् । उनीहरूकाे घर २/३ सय मिटरकाे दूरीमा छ । कमलाले आफ्नाे घरमा धामी आएकाले उपचारका लागि आउन भनेपछि रञ्चुला त्यहाँ पुगेकी थिइन् । धामी थिए– भीमदत्त नगरपालिका- ७, हल्दुखालका धर्मानन्द भट्ट र वडा नम्बर १, बाराकुण्डाका नारायणदत्त भट्ट ।

उनीहरूले रञ्चुलालाई ‘थारूको भूत’ लागेको भन्दै झारफुक गर्नुपर्ने बताए । धामीहरूकै रायअनुसार, रञ्चुलाले झारफुक गराउन थालिन् । २८ र २९ चैतमा उनी झारफुक गरी घर फर्किइन् । तैपनि, बिसेक भएन । उपचारकै लागि भनेर रञ्चुला ३० गते पनि जेठानीकाे घर गइन् ।

छाेरी सरिताका अनुसार, निकाे पार्ने भन्दै धामीहरूले फलामकाे सरिया (रड) तताएर रञ्चुलाकाे शरीरमा हानेका थिए । आफ्नै आँखाअगाडि पिटिइरहँदा पनि आमाकाे उपचार भइरहेकाे ठानेर सरिता मुकदर्शक बनिन् । रञ्चुला सन्चाे हुनुकाे साटाे झन् सिकिस्त हुन थालिन् ।

३० गते रञ्चुला घर फर्किइनन् । १ वैशाखमा रञ्चुला छटपटाउनै छाेडिन् । जेठी छाेरी सरिताले आमा बाेल्न छाेडेकाेबारे धामीलाई साेधिन् । उनीहरूले तिम्री आमा बेहाेस मात्र भएकी हुन् भन्ने जवाफ दिए । आमालाई आफ्नै घर लैजान खाेज्दा धामीहरूले राेकेकाे सरिता बताउँछिन् । 'आमाले त्यतिबेलै हामीलाई छाेडेर जानुभएकाे रहेछ । मैले आमा बित्नुभएकाे त हाेइन भनेर साेध्दा धामीहरूले मलाई नै डर देखाए । उनीहरूले तिमीलाई पनि यस्तै हुन्छ विचार गर भनेका थिए', सरिताले भनिन्, 'मलाई पनि केही भएमा एउटी बहिनीकाे बिजाेक हुने चिन्ताले कसैलाई केही भनिनँ ।'

ढलिरहेकी आमाले आँखा खाेल्ने आशा सरिताले मारिसकेकी थिइन् । तर, धामीहरूकाे धम्कीले आफू डराएकाे उनी बताउँछिन् । ३ वैशाखदेखि कमलाकाे घरबाट गन्ध फैलिन थाल्याे । छिमेकी सुरेन्द्र साउदका अनुसार, रञ्चुला १ वैशाखमै बितेकी थिइन् । ‘त्यो घरमा हामी कसैलाई जान दिएका थिएनन् । छोरीहरूलाई यसबारे कसैलाई नभन्नू भनेका रहेछन्', सुरेन्द्रले भने, 'शव गन्हाएपछि मात्रै हामी छिमेकीले थाहा पाएका हाैँ ।'

कमलाकाे घरभित्र अप्रिय घटना भएकाे आशंकामा छिमेकीले जनप्रतिनिधि र प्रहरीलाई खबर गरे । बेदकोट नगरपालिका– ५ का वडासदस्य धनसिंह पुजारा र प्रहरीको सहयोगमा ३ वैशाखकाे बिहान ९ बजेतिर कुहिन थालेकाे शव घरबाट बाहिर निकालियाे । उनकाे शरीरभरि नीलडाम थियाे ।

'दिनैपिच्छे ६-७ पल्ट मन्त्र पढ्नुपर्छ भनेर उनीहरूले आमालाई त्यहीँ राखे । ३० गतेदेखि भेट्नै दिएनन्’, छाेरी सरिताले भनिन्, ‘भुत भगाउने भन्दै हाम्री बिरामी आमालाई उनीहरूले फलामकाे रडले हान्थे ।’

धामीसहित सात जना पक्राउ

रञ्चुलाकाे हत्या भएकाे आशंकामा जिल्ला प्रहरी कार्यालय कञ्चनपुरले सात जनालाई पक्राउ गरेको छ । धामीहरू धर्मानन्द भट्ट र नारायणदत्त भट्टसहित रञ्चुलाकी जेठानी कमलालगायत सात जनालाई अनुसन्धानका लागि नियन्त्रणमा लिइएकाे प्रहरीले जनाएकाे छ । पक्राउ पर्ने अन्यमा कमलाकै घरका सदस्य छन् । कञ्चनपुरका प्रहरी नायब उपरीक्षक चक्रबहादुर शाहले भने, ‘सामान्य सोधपुछ गर्‍याैँ । बाँकी शव परीक्षणपछि थाहा हुन्छ ।'

उनका अनुसार, मृतकको शरीरमा चोटपटक छ । ‘घटना शंकास्पद छ । कुटपिट गरेको हुनसक्छ । शव परीक्षणको रिपोर्टले धेरै कुरा बताऊला । शव हेर्दा दुई/तीन दिनअघिको जस्तो देखिन्छ', उनले भने ।

प्रकाशित मिति: आइतबार, वैशाख ४, २०७९ १५:५२