प्राकृतिक विपद्‌मा परी २०७८ मा ५०७ जनाको मृत्युः ७७ जना बेपत्ता, साढे २ अर्बभन्दा बढीको क्षति

प्राकृतिक विपद्‌मा परी २०७८ मा ५०७ जनाको मृत्युः ७७ जना बेपत्ता, साढे २ अर्बभन्दा बढीको क्षति

A+ A A-

प्रकृतिक विपद्का विभिन्न घटनामा परी २०७८ मा नेपालमा ठूलो जनधनको क्षति भएको छ । गृह मन्त्रालयअन्तर्गतको राष्ट्रिय आपत्कालीन कार्य सञ्चालन केन्द्रका अनुसार गत वर्ष विपद्का घटनाबाट देशभर ५०७ जनाले ज्यान गुमाएका छन् ।

१ वैशाख ०७८ देखि ३० चैत ०७८ सम्म देशभर भएका ३ हजार ९०८ वटा विपद्का घटनामा परी उनीहरूले ज्यान गुमाएका हुन् ।

पहिरो, बाढी, भारी वर्षा, चट्याङ, सर्पको टोकाई, आगलागी, हावाहुरी, जनावरको आक्रमण, महामारी (कोरोना बाहेक), हिउँहुरी, हिउँ पहिरो, लेक लागेर, डुंगा दुर्घटना जस्ता विपद्का घटनामा परी उनीहरूको ज्यान गएको हो ।

गत वर्ष विपद्का घटनामा परी ७७ जना बेपत्ता र १ हजार ७८१ जना घाइते भएको केन्द्रले जनाएको छ । विपद्का घटनाबाट गत वर्ष ६ हजार १४४ परिवार प्रभावित भएका थिए । केन्द्रका अनुसार ०७८ मा विपद्का घटनाले देशभर २ अर्ब ६१ करोड २८ लाख ६७ हजार ५७४ रुपैयाँबराबरको आर्थिक क्षति गरेको छ ।

अघिल्लो वर्ष ०७७ मा विपद्का घटतनामा परी देशभर ५९४ जनाको मृत्यु, १०२ जना बेपत्ता र १ हजार १७२ जना घाइते भएका थिए । उक्त वर्ष विपद्का घटनाले २ अर्ब २ करोड ५४ लाख ४८ हजार ६६ रुपैयाँ बराबरको आर्थिक क्षति गरेको थियो ।

गत २०७८ सालमा सबैभन्दा ठूलो मानवीय क्षति पहिरोका कारण भएको छ । पहिरोमा परी गतवर्ष १८२ जनाको मृत्यु भएको थियो ।

गृह मन्त्रालयअन्तर्गतको राष्ट्रिय जोखिम न्यूनीकरण तथा व्यवस्थापन प्राधिकरणका अनुसार ०७८ मा आगलागीमा परी ९४, चट्याङ लागेर ५६, बाढीमा परी ६३, जनावरको आक्रमणमा परी ४८, भारी वर्षाका कारण २२, सर्पको टोकाइबाट २१, हावाहुरीबाट ३, महामारीबाट ४, हिउँ हुरीबाट ४, लेक लागेर ३, हिउँ पहिरोबाट २, डुंगा दुर्घटनामा परी ३ जनाको मृत्यु भएको थियो ।

गतवर्ष विपद्का घटनामध्ये सबैभन्दा ठूलो आर्थिक क्षति आगलागीबाट भएको देखिन्छ । आगलागीले ०७८ मा २ अर्ब २६ करोड ८७ लाख ६५ हजार १२४ रुपैयाँ बराबरको आर्थिक क्षति गरेको प्राधिकरणले जनाएको छ ।

प्राधिकरणका अनुसार गत वर्ष भारी वर्षाले १२ करोड ९० लाख ४४ हजार १२० रुपैयाँ, बाढीले ११ करोड ५३ लाख ९१ हजार ५ सय रुपैयाँ र पहिरोले ३ करोड ४६ लाख रुपैयाँको आर्थिक क्षति गरेको थियो ।

प्रकाशित मिति: बिहीबार, वैशाख १, २०७९ १४:२३