बुटवलः एमालेबाट दुई नेतृ मेयरमा सिफारिस हुँदा गठबन्धनका महिलाको नजर उपमेयरमा

बुटवलः एमालेबाट दुई नेतृ मेयरमा सिफारिस हुँदा गठबन्धनका महिलाको नजर उपमेयरमा

A+ A A-

आसन्न स्थानीय तहको चुनावमामा सत्ता गठबन्धनका दलहरूले चुनावी तालमेल गर्ने भएपछि महिला सहभागिता संकुचन हुने चर्चाका बीच रुपन्देहीको बुटवलका महिला नेतृहरू अवसर पाउनुपर्ने बताउँछन् ।

स्थानीय तह निर्वाचन ऐनले नै स्थानीय तहको प्रमुख वा उपप्रमुखमा महिला उम्मेदवारी सुनिश्चत गरे पनि एक पदमा मात्र उम्मेदवार दिँदा लैंगिक अनिवार्यता छैन ।

राजनीतिक दलहरू उम्मेदवार चयनको प्रक्रियामा छन् । दलहरूले उम्मेदवार चयन प्रक्रिया सुरु गरेसँगै महिला नेतृहरू खुलेर अगाडि आएका छन् ।

बुटवल उपमहानगरपालिकामा प्रमुख प्रतिपक्षी दल नेकपा एमाले र सत्ता गठबन्धनका दलहरूमा उम्मेदवार चयन प्रक्रिया सुरु भएको छ । एमालेले मेयरमा २ महिलासहित ८ जना र उपमेयरमा २ महिलासहित ५ जना सिफारिस गरेको छ।

यस्ता छन् एमालेका आकांक्षी

नेकपा एमालेकी केन्द्रीय सदस्य समेत रहेकी बुटवल उपमहानगरपालिकाकी बहालवाला उपमेयर गुमादेवी आचार्यले मेयरमा दाबी गरेकी छन् । ८ जनाको नाम सिफारिस गर्दा आचार्यको नाम सिफारिस भएको छ । उनले दाबी गरिरहे पनि मेयर नेपाए उपमेयरमा दोहोरिने सम्भावना छ ।

राजनीतिमा सक्रिय भूमिकामा रहेकी आचार्य एमालेबाट बलियो उम्मेद्वार हुन् । अन्य महिलाहरूको बीचमा पनि पार्टिमा राम्रो स्थान बनाउँदै चुनावमा भारी मतान्तरले विजयी भएकी आचार्यलाई पार्टीले मेयरको उम्मेदवार बनाउँछ वा बनाउँदैन केहस् समय पर्खिनुपर्छ ।

प्रमुख वा उपप्रमुखमध्ये एक महिला हुनुपर्ने भनेकोमा सधैँ उपप्रमुख मात्रै महिला हुनुपर्ने भन्ने नरहेकोले यो पटक बुटवलमा महिलालाई मेयर र पुरुषलाई उपमेयर दिनुपर्ने उनको माग छ ।

नेकपा एमालेकी केन्द्रीय सदस्य सावित्रा अर्यालको नाम पनि मेयरमा सिफारिस भएको छ । उनले अघिल्लो स्थानीय चुनावमा आफूले अवसर नपाएको बताउँदै अवसर सिर्जना गर्नुपर्ने बताइन् । उनले प्रमुख वा उपप्रमुख एक पदमा महिला हुनुपर्ने भएकोले यो पटक महिलालाई प्रमुख पद दिएर उपप्रमुख पुरुष बनाउनुपर्ने बताइन्।

यस्ता छन् गठबन्धनका आकांक्षी

पूर्व–पश्चिम र उत्तर–दक्षिणको संगम बुटवल उपमहानगरपालिकाको मेयरमा सत्ता गठबन्धनका दलहरूका महिलाले दाबी गरेका छैनन् । उनीहरूको दाबी उपमेयरमा छ । नेपाली कांग्रेसबाट चार जना महिलाको उपमेयरमा दाबी छ । महिला नेतृ महासमिति सदस्य बालकुमारी भण्डारी, रिता सेन, जमुना ढकाल र रिता केसी आकांक्षी छन् ।

बालकुमारी भण्डारीले आफू स्वतः उपप्रमुखको दाबेदार रहेको बताउँछिन् । उनले महासमिति सदस्यमा समेत विजयी भएको बताउँदै बुटवलमा आफ्नो भिजनले राम्रो काम गर्ने दाबी गरिन् ।

यता महासमिति सदस्य रिता सेन पनि कांग्रेसको बलियो उम्मेद्वार हुन् ।

विद्यार्थी राजनीतिबाट पार्टी राजनीतिमा प्रवेश गरेकी जमुना ढकालले पनि आफू उपप्रमुखको दाबेदार रहेको बताएकी छन् ।

छोटो समयमानै राजनीतिक छलाङ मारेकी रिता केसीले उपप्रमुखमा दाबी गरेको बताएकी छन् ।

अघिल्लो स्थानीय तहको चुनावमा बुटवलको उपप्रमुख गठबन्धनबाट पाएको माओबादी केन्द्रमा उपप्रमुखको लडाईंले किचलो रहेको छ । माओबादीकाट उपप्रमुखमा ढुक्क मानिएकी युवा नेतृ मञ्जु भुसाल एमाले प्रवेश गरेसँगै किचलो थप बढेको हो ।

टिका ओली, गंगा खनाल, राधा घिमिरेले उपमेयरमा दाबी गरेका छन्

यता नेकपा एकिकृत समाजबादीबाट युवा नेतृ तथा रुपन्देही सहसचिव सरिता श्रीस उपप्रमुखको दाबेदार रहेकी छन् ।

प्रकाशित मिति: बुधबार, चैत ३०, २०७८ १५:५९