दोधारा चाँदनीमा कांग्रेसलाई अन्तरघातको डर, एमालेलाई वडामै चुनौती

A+ A A-

नेपाल-भारत सीमाका रूपमा हेरिन्छ- महाकाली नदीलाई । महाकाली नदी वारिको भू-भाग नेपाल हो भने पारि भारत ।महाकालीपारिको एउटा नगरपालिका छ- दोधार चाँदनी ।

सुदूरपश्चिम प्रदेशको कञ्चनपुरको साविकका दोधारा र चाँदनी गाविसलाई गाभेर दोधारा चाँदनी नगरपालिका बनाइएको हो ।सुुरुमा नगरपालिकाको नामका विषयमा पनि दोधारा र चाँदनीवासीमा विभाजन भएको थियो । २८ पुस २०७१ मा सरकारले दोधारा चाँदनी नगरपालिका नामकरण गरेका थियाे ।

पछि फेरि २२ फागुन २०७३ मा नगरपालिकाको नाम परिवर्तन गरी महाकाली नगरपालिका राखियो । तर, स्थानीयले फेरि दोधारा चाँदनी नै राख्नुपर्ने माग राखेपछि १३ पुस २०७७ मा महाकाली हटाएर फेरि दोधारा चाँदनी नगरपालिका नै कायम राखियो । नगरपालिकाको उत्तर, पश्चिम र दक्षिण सीमा भारतसँग मात्रै जोडिएको छ ।

तातिँदै स्थानीय चुनावको माहोल

१० वडा रहेको दोधारा चाँदनी नगरपालिकामा स्थानीय तहको चुनावको सरगर्मी बढेको छ । ३० वैशाखमा हुने स्थानीय तहको चुनावका लागि दोधारा चाँदनीबासी तातिसकेका छन् । कुल ४३ हजार ४ सय ८६ जनसंख्या रहेको नगरपालिकामा मतदाता सख्या भने २६ हजार ८ सय ३ छ ।

०७४ को स्थानीय चुनावमा नगर प्रमुखमा कांग्रेसका वीरबहादुर सुनार र उपमेयरमा एमालेकी चिनी ओझा गिरी विजयी भएकी थिइन् । मेयर सुनारले प्रतिद्वन्द्वी एमालेका उम्मेदवार किशोर लिम्बुलाई ४ सय १८ मतान्तरले पराजित गरेका थिए । माओवादी भने तेस्रो स्थानमा थियो । सुनारले ५ हजार १३४ र लिम्बुले ४ हजार ७१६ मत पाएका थिए ।

वडामासमेत कांग्रेस र एमालेबीच नै प्रतिस्पर्धा भएको थियो । १० वडा रहेको दोधार चाँदनीमा १, २, ३, ५, र ६ नम्बर वडा कांग्रेसले जितेको थियो भने ७, ८, ९ र १० नम्बर वडा एमालेले जितेको थियो । माओवादी केन्द्रले भने चार नम्बर वडा मात्रै जितेको थियो । दोधारा चाँदनीमा माओवादी केन्द्र केही कमजोर छ ।

यसपटक पनि कांग्रेस र एमालेबीच नै प्रतिस्पर्धा हुने देखिएको छ । तर, केन्द्र सरकारमा रहेका पाँच दलबीच स्थानीय तहको चुनावमा गठबन्धन गर्ने सहमति भएको छ । कांग्रेसबाट मेयरका लागि आठले दाबी पेस गरेका छन् । मेयरका लागि सुनारसहित गोपाल दत्त भट्ट, जंगबहादुर चन्द, मदनलाल सुनार, नाथुसिंह साउद, डम्बरबहादुर चन्द, बेलबहादुर राना, महेन्द्र विष्ट र चन्द्र सिंह विष्टले आकांक्षा देखाएका छन् । गोपालदत्त भट्ट र बेलबहादुर रानामध्ये एकले टिकट पाउने सम्भावना बढी छ ।

एमालेबाट राजीव खड्का, किशोर लिम्बु र गगन खत्री मेयरमा सिफारिस भएका छन् । माओवादीबाट भरत भट्ट, हेम कुमार र इन्द्रबहादुर राउत दाबेदार छन् । दाेधारा चाँदनीमा गठबन्धन दलबीच कुनै मतभेद नभएकाे माओवादी केन्द्रका नेता इन्द्रबहादुर राउतले बताए ।

‘दोधारा चाँदनीमा कांग्रेस र एमालेबीच नै प्रतिस्पर्धा हो । हामी तेस्रो शक्ति नै हो । हामीले जसलाई समर्थन गर्छौं त्यही उम्मेदवारले जित्छ,' उनले भने । तर, एमालेले भने आफूले जित्ने दाबी गरेको छ ।

मेयरका आकांक्षी किशोर लिम्बुले दाेधारा चाँदनीमा गठबन्धन हुँदा पनि एमालेले जित्ने दाबी गरे । ‘कांग्रेसले जितेकाे मेयरकाे याे पाँच वर्षकाे कार्यकाल सन्ताेषजनक छैन । जनतालाई एमालेलाई नै जिताउँ भन्ने छ । गठबन्धन हुँदा पनि मेयरमा हामी जित्छाैँ । वडामा मात्रै प्रतिस्पर्धा हाेला,’ लिम्बुले भने ।

कांग्रेसले हालका मेयर वीरबहादुर सुनारलाई नदोहोर्‍याउने जनाएको छ । कांग्रेसबाट मेयरका आकांक्षी बेलबहादुर राना दाेधारा चाँदनीमा कांग्रेसले नै जित्ने दाबी गर्छन् । ‘दाेधारा चाँदनीमा कांग्रेस नै बलियाे पार्टी हाे । गठबन्धन हुँदा हामी झन् बलियो छौँ । केही वडामा हामीले अन्तरघातकै कारण हारेका हौँ । यसपटक अन्तरघात भएन भने एमालेलाई वडामै गाह्राे हुन्छ,’ रानाले भने ।

एमालेलाई वडामै चुनौती

अघिल्लो चुनावमा उपमेयरसहित चारवटा वडा जितेको एमालेलाई यो पटक चुनाव जित्न चुनौती देखिएको छ । एमाले विभाजनको असर अन्य प्रदेशको तुलनामा सुदूरपश्चिममा अलिक बढी छ । दोधारा चाँदनीमा पनि एकीकृत समाजवादीको उपस्थिति छ । त्यसैले एमालेको भोट एकीकृत समाजवादीले तान्न सक्ने आकलन गरिएको छ ।

पाँच दलीय गठबन्धन कायम भए एमालेलाई आफ्नो साख जोगाउन हम्मेहम्मे पर्ने एकीकृत समाजवादीका एक नेताले बताए । ‘दोधारा चाँदनीमा कांग्रेस आफैँ बलियो छ । त्यसमा पनि पाँच दलीय गठबन्धन हुँदा एमालेलाई जित्न फलामको चिउरा चपाउनु सरह हुनेछ,’ ती नेताले भने ।

वडा नम्बर ६ का अध्यक्ष दिलबहादुर सिजाली पनि दोधारा चाँदनीमा कांग्रेस एक्लै बलियो अवस्थामा रहेको बताउँछन् ।कांग्रेसभित्रैबाट अन्तरघात नभए दोधार चाँदनीमा क्लिन स्वीप गर्ने सिजालीको दाबी छ ।

प्रकाशित मिति: आइतबार, वैशाख ४, २०७९ १२:५४