रामेछापमा एमालेविरुद्ध पाँचदलीय गठबन्धन एकजुट, मन्थलीको मेयरमा बस्नेतकै चर्चा

रामेछापमा एमालेविरुद्ध पाँचदलीय गठबन्धन एकजुट, मन्थलीको मेयरमा बस्नेतकै चर्चा

A+ A A-

स्थानीय तह निर्वाचनमा बागमती प्रदेशको उत्तरी क्षेत्रस्थित रामेछापमा नेकपा एमालेविरुद्ध सत्ता साझेदार पाँच दल गठबन्धन गरेर अघि बढ्ने भएका छन् । नेपाली कांग्रेस, नेकपा माओवादी केन्द्र, नेकपा एकीकृत समाजवादी र जनता समाजवादी पार्टीबीच मंगलबार भएको बैठकमा गठबन्धन बनाएर जाने सहमति जुटेको हो ।

रामेछापमा सत्ता साझेदारमध्ये एक राष्ट्रिय जनमोर्चाको भने उपस्थित न्यून छ । यसकारण बैठकमा पनि जनमोर्चाका प्रतिनिधि उपस्थित थिएनन् । गठबन्धनमा पाँच दल रहेता पनि रामेछापमा भने चार दल एकजुट भएर निर्वाचनमा होमिने निश्चित भएको हो ।

३० वैशाखमा हुने स्थानीय तह निर्वाचनमा रामेछापमा गठबन्धनसँग जिल्लाकै ठूलो पार्टी एमाले एक्लै लड्ने भएको छ । रामेछापको सदरमुकाम मन्थलीमा भएको बैठकले गठबन्धनसँगै निर्वाचनमा तालमेल गर्ने रणनीतीअनुसार एकअर्कालाई प्रतिकूल असर पर्ने अभिव्यक्ती नदिने सहमति पनि बनेको छ ।

संयुक्त बैठकपछि जारी गरिएको विज्ञप्तिमा जिल्लास्थित आठवटै पालिकामा चार दल एक भएर निर्वाचनमा जाने र एकअर्कालाई प्रतिकूल असर नपर्ने अभिव्यक्ति तथा गतिविधि नगर्ने र नगराउन सबै तहमा निर्देशन दिइने उल्लेख छ ।

कांग्रेस रामेछापका सभापति पूर्णबहादुर तामाङ, नेकपा माओवादीका संयोजक मैनकुमार मोक्तान, एकीकृत समाजवादीका अध्यक्ष रमेशकुमार बस्नेत र जनता समाजवादी पार्टीका संघीय परिषद् सदस्य रोजबहादुर मोक्तानले विज्ञप्तिमा हस्तक्षर गरी सहमति जनाएका छन् । जिल्लास्तरीय गठबन्धनको आगामी बैठकले निर्वाचनका लागि भागवण्डा मिलाउने बैठकमा सहभागी कांग्रेस सचिव विनोद कार्कीले जानकारी दिए ।

देशमै सत्ता साझेदार दलहरूबीच गठबन्धन गरेर जाने सहमति बनेकाले रामेछापमा पनि चार दल एकजुट भएको कांग्रेस सभापति तामाङले बताए । रामेछापमा नेकपा एमाले सबैभन्दा ठूलो दल हो । २०७४ को निर्वाचनमा जिल्लाको आठ पालिकामध्ये पाँच पालिकामा प्रमुख र चार पालिकामा उपप्रमुख एमालेले जितेको थियो । २०६४ र ०७० को संविधानसभा चुनावमा तेस्रो बनेको एमालेले गत निर्वाचनमा अप्रत्यासित नतिजा ल्याएको थियो । २०७४ मा कुल ६४ वडामध्ये एमालेले २८, माओवादीले २१, कांग्रेसले १३, राप्रपाले १ र स्वतन्त्रबाट एक जनाले वडाध्यक्ष जितेका थिए ।

कांग्रेसभित्रै पेचिलो बन्दै गठबन्धन

रामेछापमा गठबन्धन पेचिलो बन्न सक्ने संकेत पनि देखिएको छ । जिल्लास्थित गठबन्धनको संयोजन गर्ने नेपाली कांग्रेसभित्रैबाट गठबन्धन नमान्ने चेतावनी आएको छ ।

नेपाली कांग्रेस मन्थली नगरपालिका वडा नम्बर १० चनखु वडा कार्यसमितिले गठबन्धन नमान्ने संकेत गर्दै वडामा आवश्यकता नरहेको जनाएको छ । जिल्लामा एमालेविरुद्ध पाँच दल एक भएर लड्ने निर्णय गर्नासाथ चनखु इकाई समितिले गठबन्धन नगर्दा पनि चुनाव जित्ने अवस्था रहेका भन्दै गठबन्धनको आवश्यकतामाथि प्रश्न उठाएको हो ।

इकाइ समितिले जिल्ला सभापति, प्रदेशसभा ‘ख’ क्षेत्रीय कार्यसमिति र मन्थली नगरपालिकालाई बोधार्थ पठाउँदै विज्ञप्तिमा भनिएको छ, ‘चनखुमा कांग्रेसजन एकजुट भई एकल शक्तिको आधारमा बहुमतले सम्पूर्ण टिम विजयी हुने अवस्था रहेको छ ।,’ मन्थलीकै एक शैक्षिक संस्थाको नेतृत्व छान्ने चुनावमा कांग्रेस र माओवादीको गठबन्धन हुँदा माओवादीले धोका दिएको भन्दै कांग्रेस रुष्ट भएको नेताहरूले बताएका छन् ।

उक्त शैक्षिक संस्थाको विद्यालय व्यवस्थापन समितिमा माओवादीले एकल रूपमै घोषणा गरेको कांग्रेसले आरोप लगाउँदै आएको छ । यस कारण गठबन्धनमा माओवादीविरुद्ध कांग्रेसभित्र असन्तुष्टि देखिएको जनाइएको छ । माओवादीले गठबन्धनका लागि विश्वासिलो वातावरण बनाउनु पर्ने कांग्रेसका नेताहरूको भनाइ छ ।

एक हप्ताअघि कांग्रेस रामेछाप नगर कार्यसमितिले आगामी स्थानीय तह निर्वाचनमा गठबन्धन नगर्ने निर्णय गरेको थियो । गत बुधबार बसेको नगर कार्य समितिको बैठकले कुनै दलसँग गठबन्धन नगरी एक्लै चुनाव लड्ने घोषणा नै गरेको थियो । तालमेल गर्दा पार्टीलाई नै क्षति पुग्ने अनुमान रामेछाप कांग्रेसको छ ।

मेयरमा बस्नेतको चर्चा

मन्थली नगरपालिकाको मेयरमा नेकपा (एकीकृत समाजवादी)का रामेछाप अध्यक्षसमेत रहेका वर्तमान मेयर रमेश बस्नेतकै चर्चा छ । मंगलबार प्रधानमन्त्री निवास बालुवाटारमा बसेको सत्तारुढ गठबन्धनको बैठकले चुनावी तालमेलको मोडालिटीमा तत्कालीन नेकपा एमालेबाट स्थानीय तहमा विजयी भएका र हाल नेकपा एकीकृत समाजवादीमा रहेका जनप्रतिनिधिको हकमा ती स्थान छाड्ने निर्णय गरेसँगै बस्नेतको चर्चा भएको हो । बस्नेत गत निर्वाचनमा एमालेबाट मेयरमा निर्वाचित भएका थिए । पार्टी विभाजनसँगै उनी एकीकृत समाजवादीमा गएका थिए ।

प्रकाशित मिति: बुधबार, चैत ३०, २०७८ ०७:४८