इन्जिनियर नै चोरीमा संलग्न, अनुसन्धान गर्दा प्रहरी नै पर्‍यो चकित

A+ A A-

महानगरीय प्रहरी वृत्त महाराजगञ्जको प्रहरी थुनामा सोमबार ४०-४२ जना थुनुवा थिए । उनीहरूलाई विभिन्न अपराधमा संलग्न भएको आरोपमा प्रहरीले पक्राउ गरी अनुसन्धानका लागि थुनामा राखेको हो ।

त्यसमध्ये अधिकांश चोरी मुद्दामा पक्राउ परेका छन् । चोरीमा संलग्न धेरैजसो पटके चोर रहेको प्रहरीको दाबी छ । महाराजगञ्जको थुनावा कक्षमा राखिएको चोरीमा संलग्न एक व्यक्तिले भने प्रहरीलाई चकित पारेको छ ।

सुरुमा प्रहरी उनलाई पक्राउ गर्न नै हिचकिचाएको थियो । उनी चोर होलान् भन्ने आशंकामा प्रहरीलाई अनुसन्धान गर्न नै सकस परेको थियो । उनको सम्बन्ध प्रहरीकै केही उच्च अधिकारीदेखि बहालवाला न्यायाधीशसम्म नै देखिन्थ्यो । पेसाले इन्जिनियरसमेत रहेका हुन्, ३५ वर्षीय वासुदेव पुडासैनी । प्रहरी अधिकारीदेखि न्यायाधीसमम्मको घरको डिजाइन बनाउँदा उनीहरूको सम्बन्ध स्थापित भएको देखिएको वृत्तका एक अनुसन्धान अधिकारीको भनाइ छ ।

उनलाई महानगरीय प्रहरी प्रभाग बूढानीलकण्ठको टोलीले सोमबार साँझ पक्राउ गरेको हो । विभिन्न व्याक्तिले चोरीको उजुरी दिएपछि पुडासैनीमाथि प्रहरीले अनुसन्धान थालेको थियो । प्रहरीले आरोप पुष्टि हुने प्रमाण फेला पारेपछि पुडासैनीलाई पक्राउ गरेको हो ।

महानगरीय प्रहरी परिसर टेकुका एसपी दिनेश मैनालीले पुडासैनीलाई पक्राउ गरेको पुष्टि गरे पनि अनुसन्धान जारी रहेको बताए । प्रहरी वृत्त महराजगञ्जका प्रहरी प्रमुख डीएसपी प्रमेश विष्टले उनले एउटाको सामान अर्कैलाई दिएको खुलेको र बाँकी अनुसन्धानकै क्रममा रहेको बताए ।

प्रहरीका अनुसार पुडासैनीले विभिन्न व्याक्तिको घर बनाउन प्रयोग हुने सिमिन्टदेखि फलामका डण्डी चोरी गर्ने गरेको खुलेको छ । उनले बूढानीलकण्ठ क्षेत्रका करिब दर्जनौँ निर्माणाधीन घरका निर्माण सामग्री चोरी गरेको खुलेको छ । पुडासैनी हिरोज कम्पनीको सञ्चालक तथा घरजग्गा किनबेच कम्पनीको सीईओसमेत हुन् । गोल्फुटार बस्ने पुडासैनी दिनभर आफ्नै निजी कारमा निर्माणाधीन घरमा घुम्मे र राति भाडाको गाडी प्रयोग गरेर चोरी गर्ने गरेको पाइएको छ ।

प्रहरीले उनले चोरी गरेको प्लाइउड बरामद गरेको छ । प्रहरीमा विभिन्न मितिमा निर्माणाधीन सामग्री चोरीको उजुरी आउन थालेपछि बूढानीलकण्ठ प्रहरीले चोरको निगरानी बढाएको थियो । प्रहरीको सोही टोलीले उनलाई पक्राउ गर्न सफल भएको हो ।

प्रकाशित मिति: मंगलबार, चैत २९, २०७८ १३:२२