म्यानपावर एजेन्टलाई श्रम कार्यालय प्रवेशमा रोक, अटेर गरे प्रहरीले समात्ने

A+ A A-

सरकारले वैशाख २ गते (आजदेखि) वैदेशिक रोजगार श्रम कार्यालयमा म्यानपावर कम्पनीका श्रम प्रतिनिधिलाई प्रवेशमा रोक लगाएको छ । वैदेशिक रोजगार विभागले संस्थागत र व्यक्तिगत श्रम स्वीकृति पूर्णरूपमा अनलाइन प्रक्रियाबाटै जारी गर्न थालेपछि म्यानपावरका प्रतिनिधिलाई कार्यालयमा प्रवेश गर्न नदिने भएकाे हाे ।

श्रम कार्यालयले संस्थागत र व्यक्तिगत श्रम स्वीकृति जारी गर्छ । अब त्यो काम आफ्नै अफिसमा बसेर अनलाइनबाट गर्न सकिने भएकाले फाइल बोकेर श्रम कार्यालय धाउनु नपर्ने वैदेशिक रोजगार विभागका महानिर्देशक शेषनारायण पौडेलले बताए ।

श्रम स्वीकृतिलगायत वैदेशिक रोजगारीसँग सम्बन्धित सबै सेवालाई अनलाइनबाट गर्न थालिएको छ । जसकारण अब म्यानपावर कम्पनीले पनि कार्यालयबाट सबै काम गर्नसक्ने महानिर्देशक पौडेलकाे भनाइ छ । उनका अनुसार श्रम स्वीकृति अनलाइनमैत्री बनाउँदै लैजाने विभागकाे योजना छ । उनले भने, ‘श्रम स्वीकृतिको प्रक्रिया पुगेको छैन भने म्यानपावरलाई आइटीका कर्मचारीले अनलाइनबाटै जानकारी गराउँछन् । म्यानपावरले अनलाइनबाटै पेस गरेको निवेदनको आधारमा अन्तिम श्रम स्वीकृति जारी हुन्छ ।’

श्रम स्वीकृति अनलाइनबाटै जारी गर्न थालेपछि विभागले म्यानपावरका समस्या हेरी ‘फर्स्ट कम फर्स्ट सर्भिस’को आधारमा काम गरेर समस्या समाधान गरिने जनाएकाे छ । विभागका अनुसार श्रम स्वीकृति दिन अस्विकार गरे त्यसको कारणसमेत सिस्टमले नै जानकारी गराउने हुँदा म्यानपावरमा समेत तत्काल जानकारी सिस्टमबाटै जाने छ ।

भीड घट्दै

वैदेशिक रोजगारीमा जानेहरूले संस्थागत श्रम स्वीकृति अनलाइनबाटै पाउन थालेपछि श्रम कार्यालयमा दैनिक देखिने भीड कम हुने विश्वास गरिएकाे छ । श्रम कार्यालय ताहाचलमा म्यानपावरका श्रम प्रतिनिधिहरूको भीड लाग्ने गरेको छ ।

अनलाइनबाटै संस्थागत श्रम स्वीकृति जारी हुन थालेसँगै म्यानपावरका प्रतिनिधिहरूले कार्यालय तथा कर्मचारीहरूसँग मिलेर गर्नसक्ने ठगी पनि राेकिने विभागका कतिपय अधिकारी बताउँछन् ।

श्रम कार्यालयमा धेरैजसाे ठगी हुने गरेको र पैसा दिने म्यानपावरको काम कर्मचारीले छिट्टै गर्नेगरेको आरोप व्यवसायीले लगाउँदै आएका छन् । वैदेशिक रोजगार विभागले गत २ माघदेखि पुनः श्रम स्वीकृति पनि अनलाइनबाटै जारी गर्न थालेको थियो । यो सेवा प्रभावकारी भएपछि विभागले संस्थागत श्रम स्वीकृति पनि अनलाइनबाट जारी गर्न थालेको हाे ।

पुनःश्रम स्वीकृति अनलाइनबाट वितरण गर्न थालेपछि श्रम कार्यालयमा भीड केही मात्र घटेको थियाे । अब कार्यालयका कर्मचारीले अनलाइनबाट आएको निवेदनहरूलाई हेर्दै क्रमबद्ध काम गर्ने विभागकाे भनाइ छ ।

एजेन्ट विस्थापित

अनलाइनबाट अन्तिम श्रम स्वीकृति जारी गर्न थालेपछि श्रमकै लागि छुट्टै श्रम एजेन्ट राख्दै आएका म्यानपावरहरूले प्रतिनिधि कर्मचारीसमेत राख्न नपर्ने भएको छ । याेसँगै श्रम कार्यालय धाएर आर्थिक चलखेलसमेत गर्दै आएका म्यानपावरका हजारभन्दा बढी श्रम प्रतिनिधिहरूको जागिरसमेत जोखिममा परेको छ ।

यसअघि म्यानपावरबाट खटिने एजेन्टहरूले श्रम कार्यालयमा विभिन्न नाममा आर्थिक असुली भएको भन्दै आफू कार्यरत म्यानपावरसँग प्रतिकामदारका हिसाबले पैसा लिने गरेका थिए । तर, अब श्रम कार्यालयमा म्यानपावरका प्रतिनिधिहरू देखिए तत्काल प्रहरी लगाएर कारबाही गर्ने तयारीसमेत गरिरहेको विभागले जनाएको छ ।

बिनाकाम पहिलाजस्तै म्यानपावरका प्रतिनिधि श्रम कार्यालयको परिसरमा भेटिए कारबाही गरिने विषयमा सबै म्यानपावर सञ्चालकलाई जानकारीसमेत गराइएकाे विभागका अधिकारी बताउँछन् । कार्यालय आसपासमा बसेर सेवाग्राही बोलाउँदै ठगी गरेको भेटिए तत्काल ठगीको मुद्दा चलाउने विभागका महानिर्देशक पाैडेलले बताए ।

प्रकाशित मिति: शुक्रबार, वैशाख २, २०७९ ०८:०७