व्यक्तिगत श्रम स्वीकृतिमा विदेश जाने कामदारका लागि ‘स्वघोषणापत्र’ अनिवार्य

व्यक्तिगत श्रम स्वीकृतिमा विदेश जाने कामदारका लागि ‘स्वघोषणापत्र’ अनिवार्य

A+ A A-

व्यक्तिगत श्रम स्वीकृति लिएर वैदेशिक रोजगारी जाने नेपालीहरूले ‘स्वघोषणापत्र’ पेस गर्नुपर्ने भएको छ । व्यक्तिगत श्रम स्वीकृति लिएर गएका कतिपय नेपालीहरू सम्बन्धित देशमा अलपत्र र मानव बेचबिखनमा पर्न थालेपछि व्यक्तिले ‘स्वघोषणा पत्र’ अनिवार्य रूपमा भर्नुपर्ने व्यवस्था लागू गर्न लागिएको वैदेशिक रोजगार विभागले जनाएको छ ।

साउदी अरब, कतार, कुवेत, यूएई, क्रोएसिया, अल्बानिया, पोल्यान्ड, रोमानिया, स्लोभाकिया, हङ्गेरी, माल्दोभा र बेलारुसमा भिजिट भिसा र व्यक्तिगत श्रम स्वीकृतिमा जाने नेपालीले स्वघोषणा पत्र अनिवार्य रुपमा भर्नुपर्ने विभागले जनाएको छ ।

यो नयाँ नियम आगामी वैशाख १ देखि कार्यान्वयनमा आउने विभागले जनाएको छ । विभागले ‘व्यक्तिगत श्रम स्वीकृति लिने प्रक्रियासम्बन्धी निर्देशिका–२०६९’ अनुसार सो व्यवस्था लागू गरेको हो ।

स्वघोषणापत्रको नियमले सरकारले तोकेकोभन्दा बढी शुल्क तिर्नुनपर्ने, भिजिट भिसामा हुने ठगी रोकिने, व्यक्तिगत श्रम स्वीकृतिमा गएका कामदार अलपत्र नपर्ने र ठगी केही मात्रामा रोकिने विभागका महानिर्देशक शेषनारायण पौडेलले बताए ।

‘व्यक्तिगत श्रम स्वीकृतिका नाममा भइरहेको ठगी र यो प्रक्रियाबाट कामदार ठग्ने काम भइरहेको छ । स्वघोषणापत्र लागू गरेपछि नियन्त्रण हुने विश्वास विभागको छ', उनले भने, ‘संस्थागतभन्दा व्यक्तिगत रोजगारीका नाममा ठगी बढिरहेको छ । यो समस्याका रूपमा देखा परेपछि नयाँ स्वघोषणापत्र लागू गरिएको हो ।’

के चाहिन्छ कागतजात

व्यक्तिगत श्रम स्वीकृतिमा विदेश जाने नेपालीहरूले राहदानीको प्रतिलिपि, सम्बन्धित सरकारबाट जारी प्रवेशाज्ञाको प्रतिलिपि, रोजगारी करार, सेवा सर्त, सुविधा र तलब (पारिश्रमिक) प्रष्ट भएको करार, रोजजगार सम्झौतापत्रको प्रतिलिपि सम्बन्धित देशको नेपाली दूतावासमा पेस गर्नुपर्ने ‘व्यक्तिगत श्रम स्वीकृति लिने प्रक्रियासम्बन्धी निर्देशिका–२०६९’ मा व्यवस्था छ ।

रोजगारदाताको इजाजत दर्ता प्रमाणपत्रको प्रतिलिपिसँगै स्पोन्सरको परिचयपत्रको प्रतिलिपि, रोजगारदाता कम्पनीको ट्रेड लाइसेन्सको प्रतिलिपि, निजी कामदारको हकमा रोजगारदाताको राहदानीसँगै सम्बन्धित देशको परिचयपत्रको प्रतिलिपि र रोजगारदाता देशको कम्पनीले दिएको संस्थागत स्पोन्सरपेपरमा ‘स्वीकृतिपत्र’ विभागको अनलाइनमा भर्नुपर्ने व्यवस्था छ ।

साथै, संस्थामा जाने कामदारका हकमा कम्पनीको संक्षिप्त विवरण, कर तिरेको विवरण, सेवा–सुविधा र कामदारको आवतवात खर्च प्रष्ट हुनुपर्ने निर्देशिकामा छ ।

व्यक्तिगत श्रम स्वीकृतिमा जाने कामदारले रोजगारदाता कम्पनी वा स्पोन्सरमार्फत अङ्ग्रेजी भाषामा अनुवाद गरिएका कागजात प्रमाणीकरणका लागि दूतावासमा पेस गरेपछि र रोजगारदाता कम्पनीले ग्यारेन्टी गरेको करार भएपछि मात्र स्वघोषणापत्र भर्न पाउँछन् ।

व्यक्ति श्रम स्वीकृतिमा नेपालीहरू १ सय ७८ वटा देश जाने गरेको विभागले जनाएको छ । हाल दैनिक करिब ३ सय जना नेपालीहरू व्यक्तिगत श्रम स्वीकृतिमा विदेशीने गरेको विभागको तथ्यांकमा छ ।

व्यक्ति श्रम स्वीकृतिमा पुरुषभन्दा महिला धेरै जाने गरेको विभागको तथ्यांकमा छ । चालु आर्थिक वर्षको ८ महिनामा १ लाख २५ हजार नेपालीहरू व्यक्तिगत श्रम स्वीकृतिमा विदेशीएको विभागले जनाएको छ ।

प्रकाशित मिति: सोमबार, चैत २८, २०७८ १५:२६