लिपुलेकमा पनि तात्याे चुनावी सरगर्मी, कांग्रेसकाे वर्चस्व ताेड्न एमालेलाई कठिन

लिपुलेकमा पनि तात्याे चुनावी सरगर्मी, कांग्रेसकाे वर्चस्व ताेड्न एमालेलाई कठिन

फाइल तस्वीर

A+ A A-

नेपाल–भारत र चीनको त्रिदेशीय सीमाक्षेत्र हो– दार्चुलाको ब्याँस गाउँपालिका । नेपालको लिपुलेकहुँँदै बग्ने महाकाली नदीको उद्गमस्थलबारेको विवादले पछिल्लो समय नेपाल–भारतबीचको मित्रवत् सम्बन्ध नै चिसिएको छ ।

महाकाली नदी ब्याँस गाउँपालिका हुँदै बग्ने गर्छ । ब्याँस गाउँपालिकाको जनगणनामा समेत भारतीय पक्षबाट पटक–पटक अवरोधहुँदै आएको छ । तर, ३० वैशाखमा हुने स्थानीय तहको चुनावका लागि भने ब्याँसवासी तातिसकेका छन् ।

७ हजार ८ सय ४ मतदाता रहेको ब्याँस गाउँपालिकामा ०७४ को स्थानीय चुनावमा अध्यक्षमा नेपाली कांग्रेसका दिलीप बुढाथोकी र उपाध्यक्षमा पनि कांग्रेसकै हेमा भट्ट विजयी भएका थिए ।

उनले निकटम प्रतिद्वन्द्वी एमालेका उम्मेदवार दिलीप डाडाँललाई पराजित गरेका थिए । बुढाथोकीले १ हजार ९ सय १५ मत पाएर विजयी भएका हुन् ।

उनका प्रतिद्वन्द्वी एमालेका डाँडालले १ हजार ६ सय ७ मत पाएका थिए । माओवादीका कुँवरको भने ८ सय ४३ मत मात्रै पाए । अध्यक्ष उपाध्यक्ष नै जितेको कांग्रेसले ६ वडामध्ये तीन वडामा विजय हासिल गरेको थियो ।

२, ५ र ६ मा कांग्रेसले जित हात पारेको हो । बाँकी ३ वडामा भने एमालेले जित हात पार्‍यो १, ३ र ४ मा एमाले विजयी भएको थियो । ब्याँसमा माओवादीको जनमत कमजोर मानिएको छ ।

यसपालिको चुनावमा पनि ब्याँस गाउँपालिकामा कांग्रेस र एमालेबीच नै प्रतिस्पर्धा हुने देखिएको छ । यद्धपि केन्द्र सरकारमा रहेका पाँच दलबीच स्थानीय तहको चुनावमा गठबन्धन गर्ने सहमति भएको छ । तर, गठबन्धनको मोडालिटी कस्तो हुने भन्ने टुंगो लागेको छैन ।

ब्याँसमा गठबन्धन भएर कांग्रेसलाई नेतृत्व दिने सहमति भए कांग्रेसका लागि जित अझ सहज हुने देखिन्छ । यो चुनावमा पनि अध्यक्षका लागि आफ्नो दाबी कायम रहेको अध्यक्ष बुढाथोकीले बताए ।

कांग्रेस माओवादीलाई उपाध्यक्ष दिने गृहकार्यमा छ । तर, अझै तीनवटै दलले उम्मेदवारको टुंगो भने लगाएका छैनन् । तीनवटै प्रमुख दलहरूबाट गाउँपालिका प्रमुख र उपप्रमुखको उम्मेदवार बन्न चाहनेहरूले आफ्नो लबिङ थालेका छन् ।

ब्याँस गाउँपालिका दार्चुलाका नौ स्थानीय तहमध्येको एक विकट गाउँपालिका हो ।

एमालेलाई चुनौती

अघिल्लो चुनावमा अध्यक्षमा ३ सय ८ मतले पछि परेको र तीन वडामा जित हासिल गरेको एमालेलाई यो पटक भने त्यही अवस्थामा रहनसमेत चुनौती छ ।

एमाले विभाजनको असर ब्याँस गाउँपालिका छ । एमालेबाट विभाजन भएर बनेको एकीकृत समाजवादीले मत काट्न सक्ने आकलन गरिएको छ । त्योबाहेक गठबन्धन हुँदा एमालेलाई चुनौती ठूलो छ ।

पाँचदलीय गठबन्धन कायम भए एमालेलाई आफ्नो साख जोगाउन हम्मेहम्मे पर्ने देखिन्छ । एकीकृत समाजवादीका एक नेताले ब्यासमा जसरी पनि एमालेलाई पत्तासाफ गर्ने प्रतिक्रिया दिए ।

‘हामीले ब्याँसमा अध्यक्षको दाबी पनि गरेका छैनौँ । गठबन्धनको निर्णय जे हुन्छ, त्यो हाम्रा लागि सबै स्वीकार्य छ । तर, एमालेलाई हामी अध्यक्ष मात्रै होइन, वडामा पनि जित्न दिँदैनौँ,’ ती नेताले भने ।

प्रकाशित मिति: सोमबार, चैत २८, २०७८ १२:५७