भरतपुर महानगर: एमालेले अघि सार्‍यो सुवेदी, कांग्रेस-माओवादी लफडाले गठबन्धनलाई सकस

भरतपुर महानगर: एमालेले अघि सार्‍यो सुवेदी, कांग्रेस-माओवादी लफडाले गठबन्धनलाई सकस

A+ A A-

नेकपा एमालेले भरतपुर महानगरपालिकामा उम्मेदवारको टुंगो लगाएको छ । आइतबार बसेको नगर कमिटीको बैठकले विजय सुवेदीलाई सर्वसम्मत रूपमा उम्मेदवार बनाएको एमाले जिल्ला कमिटीका अध्यक्ष रामप्रसाद न्यौपानेले बताए ।

२०७४ को स्थानीय तहको निर्वाचनमा भरतपुर महानगरपालिकामा मेयरमा उठेका देवी ज्ञवालीले सुवेदीको नाम प्रस्ताव गरेका थिए । त्यही नामलाई नै बैठकले अनुमोदन गरेको न्यौपानेले बताए । 'हामीले विजय सुवेदीलाई मेयरको उम्मेद्ववार बनाउने निर्णय सर्वसम्मत रुपले गरेका छौँ । पहिले मेयरमा प्रतिस्पर्धा गर्नुभएका ज्ञवालीले उहाँको नाम प्रस्ताव गर्नुभएको थियो,' न्यौपानेले भने ।

सुवेदी बागमती प्रदेशसभाका सदस्य पनि हुन् । उनी बागमती प्रदेशको सामाजिक विकासमन्त्री समेत भएका थिए । 'स्थानीय राजनीतिमा राम्रो छवी र भरतपुरको विकासमा योगदान पुर्‍याउनुभएकाले उहाँलाई अघि बढाउने निर्णय भएको हो,' न्यौपानेले भने ।

एमालेले उम्मेदवार टुंगो लगाउँदा गठबन्धन दलमा भने कुनै सुरसार छैन । भरतपुर महानगरपालिकालाई माओवादी केन्द्र र कांग्रेस दुबैले प्रतिष्ठाको विषय बनाएका छन् । माओवादी केन्द्रले भरतपुर नछोड्ने बताइरहेको छ ।

यता कांग्रेस चितवनका नेताहरूले केन्द्रमा आएर भरतपुरमा दाबी नछोड्न र दह्रो रूपमा पार्टीको पक्षमा निर्णय गराउन शीर्ष नेताहरूलाई दबाब दिएर फर्किएका छन् । कांग्रेस चितवनका सभापति राजेश्वर खनाल कांग्रेस र माओवादीका कार्यकर्ताबीच हार्दिकता बढाउन यसपटक माओवादीले भरतपुर छोड्नैपर्ने बताउँछन् । 'हाम्रो मनस्थिति भनेको कांग्रेस र माओवादीबीच हार्दिकता कायम गर्ने भन्ने छ । त्यसका निम्ति माओवादीले यसपटक हामीलाई छोड्नैपर्छ । गठबन्धनको मर्म कायम गर्नका निम्ति भए पनि माओवादीले हामीलाई छोड्नैपर्छ,' उनले भने ।

कांग्रेसबाट मेयरको आकांक्षीको सूचीमा केन्द्रीय सदस्य टेकबहादुर गुरुङ र दिनेश कोइराला, शंकर कँडेल, सूर्यकान्त घिमिरे, अञ्जली श्रेष्ठ, मिलनबाबु श्रेष्ठ, नीलकण्ठ रिजाल र हाल भरतपुर महानगरपालिकाकी उपमेयर पार्वती शाह ठकुरी लगायत छन् ।

यता माओवादी केन्द्र चितवनका अध्यक्ष यमबहादुर परियाले भरतपुरका विकासमा मेयर रेणु दाहालले पुर्‍याएको योगदान र स्मार्ट सिटीको योजनालाई कार्यान्यवनका निम्ति माओवादी केन्द्रले उनलाई सर्वसम्मत रूपमा अघि सार्ने निर्णय गरेको बताउँछन् ।

'भरतपुरको पूर्वाधार, पर्यटन र सामाजिक विकासमा कायापलट गरेकाले माओवादीको पक्षमा आकर्षण बढेको छ । जित निश्चित रहेकाले माओवादीको दाबी स्वाभाविक छ । हाम्रो पार्टीको तर्फबाट उहाँ नै उम्मेदवार हो,' उनले भने ।

एमालेले धमाधम उम्मेदवार टुंगो लगाउन थालेपछि सत्ता गठबन्धनमा पनि दबाब बढेको छ । केन्द्रमा गठबन्धनको निर्वाचन समितिको बैठकले मापदण्ड बनाएर उम्मेदवार छनाेट गर्ने तयारी गरिरहेको छ ।

प्रकाशित मिति: आइतबार, चैत २७, २०७८ १७:२५