पूर्वाग्रह साँधेर गभर्नरलाई निलम्बन गरियो : डा. युवराज खतिवडा [अन्तर्वार्ता]

पूर्वाग्रह साँधेर गभर्नरलाई निलम्बन गरियो : डा. युवराज खतिवडा [अन्तर्वार्ता]

A+ A A-

सरकारले नेपाल राष्ट्र बैंकका गभर्नर महाप्रसाद अधिकारीलाई निलम्बन गरेको छ । उनलाई निलम्बन गरी राष्ट्र बैंकका डेपुटी गभर्नर निलम ढुंगानालाई कार्यवाहकको जिम्मेवारी दिइएको छ ।

अर्थतन्त्र संकटमा परेको बेला गभर्नर निलम्बन गरिएको विषयमा राष्ट्र बैंकका गभर्नरसमेत रहीसकेका पूर्वअर्थमन्त्री तथा एमाले नेता डा. युवराज खतिवडासँग गरिएको कुराकानीः

सरकारले राष्ट्र बैंकका गभर्नरलाई निलम्बन गरेको छ, यो कदमलाई कसरी लिनुभएको छ ?

यो स्वायत्त संस्थामाथि ठाडो हस्तक्षेप र गैरजिम्मेवारपूर्ण कार्य हो ।

उहाँमाथि अर्थतन्त्र ध्वस्त बनाएको आरोप लगाइयो नि ?

आरोप देखिनु पनि त पर्‍यो नि । घटनाक्रमले पनि त पुष्टि गर्नु पर्‍यो नि, त्यत्तिकै आरोप मात्रै लगाएर हुन्छ ?

किन हटाइयो जस्तो लाग्छ त ?

यो एउटा पूर्ववर्ती सरकारले नियुक्त गरेको भन्ने आग्रह पालेर उहाँलाई हटाइएको हो । उहाँ प्रोफेसनल मान्छे हो । टेस्टेड मान्छे पनि हो ।

सरकारले गरेको निलम्बनलाई के भन्नुहुन्छ ?

यो पूर्णतः आग्रहपूर्ण र दुरासयपूर्ण छ ।

अर्थतन्त्र त संकटमै परेको छ नि त होइन ?

अर्थतन्त्र संकटमा पर्नुमा सबैको हात हुन्छ । अर्थतन्त्र चलाउने सबैभन्दा बढी जिम्मेवार त अर्थमन्त्रालय नै हो । अर्थ मन्त्रालय मातहतका निकायहरू त हुन् । अर्थमन्त्री, योजना आयोग, उद्योग वाणिज्य तथा आपूर्ति मन्त्रालय, राष्ट्र बैंक, धितोपत्र बोर्ड र बीमा समिति सबै उत्तिकै जिम्मेवार हुनुपर्‍यो नि त ।

अर्थ मन्त्रालय बढी जिम्मेवार हुन्छ भन्नुभएको हो ?

हो । अर्थतन्त्रको मुख्य जिम्मेवारी अर्थ मन्त्रालयले लिने हो । अर्थमन्त्रीले यसको नैतिक जिम्मेवारी लिनुपर्छ ।

अर्थतन्त्र संकटमा परेका बेला पछिल्लो समय राष्ट्र बैंकले चालेको कदमलाई कसरी लिनुहुन्छ ?

राष्ट्र बैंकले चालेका कदम उपयुक्त नै हुन् । तर, अलिकता ढिलाचाहिँ भएकै हो । अलि अगाडि गरेको भए यो स्थिति नआउन सक्थ्यो । यतिधेरै समस्याग्रस्त हुने थिएन । केन्द्रीय बैंकका कदमहरू सीमित हुन्छन् । खासगरी कोभिडको बहानामा खुकुलो गर्दा अलिकति ढिलो भएको बुझ्न सकिन्छ । तर, यो मुद्दामा कमदलाई दोष दिने ठाउँ छैन ।