८० वटा स्थानीय तहमा कांग्रेस र माओवादी ‘नेक टु नेक’, कहाँ को पहिलो को दोस्रो ? (सूचीसहित)

८० वटा स्थानीय तहमा कांग्रेस र माओवादी ‘नेक टु नेक’, कहाँ को पहिलो को दोस्रो ? (सूचीसहित)

A+ A A-

सत्तारुढ दलहरूले स्थानीय तहको निर्वाचनमा तालमेल गरेर जाने निर्णय गरे पनि एकाध जिल्लाबाहेक स्थानीय तहस्तरबाट तालमेल टुंग्याउन सकेका छैनन् । तल्लो तहबाट नै तालमेल गरेर प्रस्ताव पठाउनका लागि मुख्य दुई पार्टीले आग्रह गरिसकेका छन् । तल्लो तहबाट आएको प्रस्तावअनुसार शनिबार यस विषयमा छलफल गरिँदैछ ।

माओवादीले अघिल्लो चुनावमा पहिलो भएको स्थानमा सम्वन्धित पार्टीलाई नै निरन्तरता दिने र एमाले पहिलो भएको ठाउँमा सत्तारुढ दलमध्ये जो दोस्रो भएको छ त्यसैलाई दिइनुपर्ने विषयमा छलफल चलाएको छ । यस विषयमा कांग्रेससमेत करिब सहमत देखिएको छ । यद्यपि अघिल्लो चुनावमा समेत तालेमल गरेर माओवादीलाई स्थानीय तह प्रमुख वा अध्यक्ष छोडेको ठाउँमा यसपटक भने आफ्नो दाबी पालिकास्तरबाट गरेका छन् ।

अघिल्लो चुनावमा केन्द्रबाट चितवनमा र अन्य केही स्थानीय तहमा जिल्लास्तरबाट तालेमल गरिएको थियो । धेरै स्थानीय तहमा भने कांग्रेस र माओवादी दुबैले आफ्ना उम्मेदवार उठाएका थिए ।

२०७४ को स्थानीय तहको चुनावमा देशभरका ८० वटा पालिकामा कांग्रेस र माओवादी ‘नेक टु नेक’ भएर मेयरमा प्रतिस्पर्धी मत पाएका थिए । जसमध्ये ४५ वटा स्थानीय तहमा माओवादी पहिलो हुँदा कांग्रेस दोस्रो भएकाे थियो।

त्यस्तै ३५ वटा स्थानीय तहमा कांग्रेस पहिलो हुँदा माओवादी दोस्रो भएको छ । अघिल्लो पटक दोस्रो भएको पालिकामा अहिले आफूले पाउनुपर्ने दुबै पार्टीकाे माग छ ।

‘जिल्ला तहबाट आएको रिपोर्टको आधार हेरर छिट्टै मोडालिटी तय गरिनेछ, यस विषयमा खासै समस्या हुने छैन’ माओवादी नेता लिलामणि पोखरेलले भने ।

तर, अन्यपार्टीको सहयोगमा अघिल्लो चुनावमा माओवादीले थोरै मतले जितेको र वडा तहमा आफू बलियो भएको स्थानमा कांग्रेसले पाउनुपर्ने माग गरेको छ । त्यस्तै गरी माओवादीले पनि पालिका अध्यक्षमा वा प्रमुखमा दोस्रो भएर पनि वडा तहमा धेरै जितेको स्थानीय तह आफूले पाउनुपर्ने माग गरेको छ ।

माओवादी पहिलो र कांग्रेस दोस्रो भएका ४५ स्थानीय तह

अघिल्लो चुनावमा माओवादी पहिलो र कांग्रेस दोस्रो भएका ४५ वटा स्थानीय तह रहेका छन् । त्यसमध्ये २१ वटा स्थानीय तहमा ५ सयभन्दा कम मतान्तरले माओवादी उम्मेदवार विजयी भएका छन् भने १२ वटा स्थानीय तहमा २ सयभन्दा कम मतान्तर र ४ वटा स्थानीयतहमा १०० भन्दा कम मतान्तरले माओवादी उम्मेदवार विजयी भएका छन् ।

सोलुखुम्बुको महाकुलुङ गाउँपालिकामा माओवादीका सागर किराँती प्रतिद्वन्द्वी कांग्रेसका भलाकाजी राईलाई २७ मतले पछि पारेर विजयी भएका थिए । किराँतीले १४ सय १० मत पाउँदा राईले १३ सय ८३ मत लिएर दोस्रो भएका थिए । त्यस्तै उपध्यक्षमा कांग्रेस उम्मेदवार विपना कुलुङ निर्वाचित भएकी थिइन ।

चितवनको माडी, हुम्लाको नाम्खा र ललितपुरको कोन्ज्योसोम गाउँपालिकामा क्रमश: कांग्रेस उम्मेदवार ४४, ५४ र ६६ मतले पछि परेर दोस्रो भएका थिए ।

माओवादी कांग्रेस ‘नेक टु नेक’

कांग्रेस पहिलो र माओवादी दोस्रो भएका ३५ स्थानीय तह

२०७४ काे चुनावमा देशभर कांग्रेसले २६६ स्थानीय तहमा प्रमुख वा अध्यक्षमा विजयी हाँसिल गर्दा ३१९ स्थानीय तहमा दोस्रो भएको थियो । तीमध्ये कांग्रेस पहिलो र माओवादी दोस्रो भएका स्थानीय तहको संख्या ३५ रहेको छ ।

जसमध्ये १९ स्थानीय तहमा ५ सय मतभन्दा कम मतान्तरमा कांग्रेस उम्मेदवार विजयी भएका छन् । ९ वटा स्थानीय तहमा २ सय मतभन्दा कम मतान्तरले र ४ वटा स्थानीय तहमा १ सय मतभन्दा कम मतान्तरले माओवादीका उम्मेदवारलाई कांग्रेस उम्मेदवारले पछि पारेका थिए ।

जाजरकोटको बारकोटे गाउँपालिकामा कांग्रेस १९ मतले माओवादी उम्मेदवारलाई पछि पारेर विजयी भएको थियो ।

कांग्रेस माओवादी नेक टु नेक

माओवादीले जितेका धेरै स्थानीय तहमा कांग्रेस दोस्रो भएको देखिएको छ भने कांग्रेसले जितेका कम मात्रै स्थानीय तहमा माओवादी दोस्रो भएको देखिएको छ । अघिल्लो निर्वाचनमा माओवादीले १०६ वटा स्थानीय तह जित्दा ९९ वटामा दोस्रो भएको थियो ।

प्रकाशित मिति: शुक्रबार, चैत २५, २०७८ २०:१६