सुर्खेतकाे भेरीगंगामा दर्जनौँ आकांक्षी, एमाले पनि गठबन्धनको रणनीतिमा

A+ A A-

कर्णाली प्रदेश प्रवेशको मुख्यद्वार हो सुर्खेतको भेरीगंगा नगरपालिका । साविकका छिञ्चु, मैनतडा र रामघाट गाविसलाई मिसाएर २०७१ सालमा भेरीगंगा नगरपालिका बनेको हो । हाल साविकको लेखपराजुल गाविससमेत थप गरिएको छ ।

२०७४ सालको स्थानीय तह निर्वाचनमा भेरीगंगामा नेपाली कांग्रेस र एमालेबीच कडा प्रतिस्पर्धा भएको थियो । झिनो मतान्तरले नगर प्रमुख र उपप्रमुखसहित अधिकांस वडामा कांग्रेसका उमेद्वारले जितेका थिए ।

नगर प्रमुखमा कांग्रेसका भूपेन्द्रबहादुर चन्दले एमालेका यज्ञप्रसाद ढकाललाई १५९ मतान्तरले जितेका थिए । चन्दले ७ हजार ५४३ मत प्राप्त गर्दा ढकालले ७ हजार ३८४ म प्राप्त गरेका थिए । यस्तै उपप्रमुखमा रेणु आचार्यले ७ हजार ५७४ र एमालेकी चन्द्रा आचार्यले ७ हजार २९७ मत प्राप्त गरेकी थिइन् । उपप्रमुखमा पनि २७७ को मतान्तर थियो । तेस्रो स्थानमा रहेको माओवादी केन्द्रका कृष्णप्रसाद गिरीले प्रमुखमा १ हजार ६३७ र उपप्रमुखमा डिलसरा थापा क्षेत्रीले १ हजार ६५८ मत प्राप्त गरेकी थिइन् ।

गत चुनावमा झिनो मतले पराजय भोगेको एमाले यसपटक जित निकाल्ने रणनीतिमा छ । तर, सत्ता साझेदार दलहरू गठबन्धन गरेर चुनाव लड्ने तयारीमा छन् । जसले गर्दा नगर हाँक्ने एमालेको कल्पना पूरा हुर्न चुनौती थपिएको छ । एमालेले भेरीगंगामा फुटको असर खासै नरहेको दाबी गर्दै आएको छ । त्यसो त एमालेबाट विभाजन भएर बनेको एकीकृत समाजवादीका नगर कमिटी अध्यक्ष पनि एमालेमा फर्किसकेका छन् ।

कांग्रेस भने गठबन्धन नगरेरै पनि चुनाव जित्ने दाबी गर्छ । यसअघि जितेको नगरपालिका भएकाले नगर प्रमुख र उपप्रमुख दुवै पद गठबन्धनका दललाई दिन नहुने भेरीगंगा कांग्रेसका अगुवाहरूको मत रहेको छ ।

‘अहिले ८ वडासहित मेयर उपमेयर कांग्रेस एक्लैले जितेको थाहै छ’, नगरसभापति रामबहादुर सिंह भन्छन्, ‘अहिलेको जनमतलाई हेर्दा प्रमुख र उपप्रमुख कांग्रेसले नै लिनुपर्ने खालको कार्यकर्ताको दबाब र जनभावना छ ।’ यद्यपि गठबन्धनका विषयमा अहिले नै पर्याप्त छलफल नभएको उनको भनाइ छ ।

माओवादीभित्र भने गठबन्धनको मर्मअनुरुप उपप्रमुखसहित चारवटा वडा आफूहरूलाई दिनुपर्ने छलफल हुँदै आएको छ । ‘कांग्रेसले जितेको ठाउँ भनेर कहाँ हुन्छ ? हामीले जितेका ठाउँ पनि त अरुलाई दिइन्छ’, माओवादी केन्द्र भेरीगंगाका इन्चार्ज नरेन्द्र कार्कीले भने, ‘कांग्रेसले जितेका ठाउँ केही पनि दिन्नौँ भने कसरी गठबन्धन होला ? तर, कुन कुन पद र कति वडा भन्ने तहको छलफल अझै भइसकेको छैन ।’

गठबन्धनको मर्मअनुसार चुनावमा तालमेल गर्ने विषयमा दलहरूबीच दुई चरणमा छलफल भएको तर, निष्कर्षमा पुगिनसकेको कार्कीले बताए । एमाले पनि कांग्रेस बाहेकका दलसँग गठबन्धन गर्ने सोचमा छ । मुख्य प्रतिस्पर्धी कांग्रेस भएकाले अन्य दललाई साथमा लिएर चुनावी नतिजा आफ्नो पक्षमा पर्ने एमालेको भित्री योजना देखिन्छ ।

‘एक्ला एक्लै चुनाव लड्ने परिस्थितिमा एमाले एक्लै जित्छ भन्ने हाम्रो आकलन हो । तर, सत्ता चलाइरहेका दलहरू गठबन्धन गर्न थालेपछि हामीले पनि गठबन्धनका लागि ढोका खुला राखेका छौँ ।’ एमालेका नगर इन्चार्ज यज्ञ ढकालले भने, ‘कांग्रेसबाहेकका दलसँग तालमेल गर्न सकिन्छ भन्ने हाम्रो पार्टीको मान्यता छ ।’

भेरीगंगामा दलहरूलाई उम्मेदवार छनोटमा समेत सकस परेको छ । कांग्रेसबाट १३ जना आकांक्षी छन् । यस्तै एमालेबाट पाँच जना आकांक्षी छन् । माओवादी केन्द्रमा पनि आकांक्षीहरूबीच प्रतिस्पर्धा छ ।

कांग्रेसबाट अहिलेका प्रमुख, उपप्रमुख दुवै जना प्रमुखको दाबेदार छन् भने पालिका सभापति रामबहादुर सिंह, १० नम्बर वडाध्यक्ष मानबहादुर बुढालगायत उमेदरवारको दौडमा छन् । एमालेबाट यज्ञप्रसाद ढकाल, प्रदेश कमिटी सदस्य धनसिंह खड्का, १३ नम्बर वडाका अध्यक्ष टिकाराम सुवेदी, जिल्ला कमिटी सदस्य प्रकाश अधिकारी, प्रमोद ओलीलगायत उम्मेदवार बन्ने होडमा छन् ।

माओवादी केन्द्रबाट नगर इन्चार्ज नरेन्द्र कार्की, नगर अध्यक्ष गणेश भण्डारी लगायतका नेताहरू आकांक्षी छन् ।

प्रकाशित मिति: शनिबार, चैत २६, २०७८ १२:५४