ओलीको गृहजिल्लामा एमालेको चुनावी रणनीति : बहालवाला उपमेयर नै मेयरका उम्मेदवार

ओलीको गृहजिल्लामा एमालेको चुनावी रणनीति : बहालवाला उपमेयर नै मेयरका उम्मेदवार

A+ A A-

स्थानीय चुनावको मिति नजिकिएसँगै झापा पनि चुनावमय भएकाे छ । नेकपा एमालेका अध्यक्ष केपी शर्मा ओली, नेपाली कांग्रेसका महामन्त्री विश्वप्रकाश शर्मा, पूर्वमहामन्त्री कृष्ण सिटौला, राप्रपाका अध्यक्ष राजेन्द्र लिङ्देनलगायत नेता झापाका हुन् ।

प्रमुख राजनीतिक दलको बागडोर झापाले हात पारेपछि स्वाभाविक रूपमा ठूला नेताको गृहजिल्लामा राजनीतिक तापक्रम बढी नै छ । आ–आफ्ना रणनीतिका साथ राजनीतिक दल चुनावी अभियानमा छन् ।

एमाले अध्यक्ष ओलीलाई नेपाली राजनीतिमा चतुर खेलाडीका रूपमा लिइन्छ । यस पटकको चुनावमा गृहजिल्ला झापामा उनको रणनीति खास छ । झापाका केही ठूला स्थानीय तहमा ओलीले उपमेयरलाई मेयरकाे उम्मेदवार बनाउने रणनीति अपनाएकाे बताइएकाे छ ।

स्थानीय चुनाव २०७४ मा मेचीनगरमा एमालेले मेयर हात पार्न सकेको थिएन । तर, उपमेयर भने एमालेले जितेको थियो । मेचीनगरमा मेयरमा का‌ंग्रेसका विमल आचार्यसँग एमालेका विष्णु प्रसाईँ हारेका थिए । मेयरमा पराजय भाेगे पनि उपमेयरमा मिना उप्रेती पोखरेलको जितले एमालेलाई केही राहत दिएको थियो । चर्चा छ, उनै उपमेयर अब मेचीनगरकाे मेयर लड्दै छिन् ।

ओलीको गृहनगर दमकमा पनि एमालेका थुप्रै नेता मेयरका अकांक्षी छन् । होमबहादुर थापा, अम्बिका खनाल तथा इन्द्र भण्डारीको नाम चर्चामा छ । यसपटक दमकका बहालवाला मेयर रोमनाथ ओली भने ब्याक हुँदैछन् । स्थानीय चुनाव २०७४ मा दमकका १० वटा वडामध्ये वडा नम्बर १ र ७ राप्रपाले जितेको थियो । बाँकी सबै वडामा एमालेले जित हात पारेको थियो ।

स्थानीय चुनाव २०७४ को मतपरिणामअनुसार दमकमा एमाले पहिलो, राप्रपा दोस्रो, कांग्रेस तेस्रो र माओवादी केन्द्र चौथो दल हुन् । सबै दल दमक केन्द्रित भएर चुनावी अभियानमा देखिएका छन् । एमालेका तर्फबाट दमककाे मेयरमा उपमेयर गीता अधिकारी लड्ने चर्चा छ । अधिकारी एमालेको केन्द्रीय सदस्यसमेत हुन् ।

यस्तै झापाको अर्को प्रमुख केन्द्र बिर्तामोडमा पनि एमालेको रणनीति विशेष देखिन्छ । बिर्तामोडमा स्थानीय चुनाव २०७४ मा एमालेले जित हात पारेको थियो । कमजोर सम्भावनासँग यसपटक एमालेले जुवा नखेल्ने देखिएको छ । बिर्तामोडमा उपमेयर पवित्रा महतारा प्रसाईँलाई नै मेयरको उम्मेदवार बनाउने चर्चा छ ।

बिर्तामोडमा एमालेका अरु पनि थुप्रै आकांक्षी छन् । वर्तमान मेयर ध्रुव सिवाकोटी, प्रदेश सांसद एकराज कार्की, देवराज कार्की, उमानाथ ओली तथा बिर्तामोड २ का वडाध्यक्ष नगेन्द्र सङ्ग्रौलाको नाम मेयरका लागि चर्चामा छ । तर, एमालेले बिर्तामोडमा हालकी उपमेयरलाई मेयरको उम्मेदवार बनाउन सक्ने सम्भावना बलियाे रहेकाे एक नेताले बताए ।

यस्तै महिला नेतृत्वको चर्चा बढी नै भएको गाउँपालिका हो बुद्धशान्ति । यसपटक बुद्धशान्तिमा अध्यक्षको उम्मेदवारका रूपमा मिरा भुर्तेलको चर्चा छ । २०७४ मा भुर्तेल उपाध्यक्ष निर्वाचित भएकी थिइन् । अध्यक्षमा कांग्रेसका रमेश भुजेलले जित हात पारेको बुद्धशान्तिमा तत्कालीन एमाले झापा अध्यक्ष चिन्तन पाठक पराजित भएका थिए ।

झापाको अर्को पालिका गौरादहमा पनि एमालेले मेयर जित्न सकेको थिएन । तर, उपमेयर भने एमालेले हात पारेको थियो । गौरादहमा कांग्रेसका रोहितकुमार साह मेयर भए, एमालेका मदन अधिकारी पराजित भए । उपमेयरमा भने एमालेकी गीता भेटवाल निर्वाचित भइन् । अहिले उनले पनि मेयरको दाबी गरिरहेकी छिन् ।

भद्रपुरकी उपमेयर चन्दा श्रेष्ठले पनि एमालेका तर्फबाट मेयरको दाबी गरिरहेकी छिन् । उनीसँगै बहालवाला मेयर जीवन श्रेष्ठ र एमाले झापाका उपसचिव असारु राजवंशीले मेयरको आकांक्षा देखाइरहेका छन् ।

स्थानीय चुनाव २०७४ मा एमालेको तर्फबाट कमल गाउँपालिकाकाे अध्यक्षमा मेनुका काफ्ले निर्वाचित भइन् । कांग्रेसका हुकुमसिंह राईसँग बराबर मत ल्याएकी उनी गोलाप्रथाबाट निर्वाचित भएकी थिइन् ।

एमाले झापाका सचिव शिव ढुङ्गेल भन्छन्, ‘हामीले महिलालाई अवसर खासै दिन सकेनौँ, अवसर पाएको ठाउँमा महिलाले राम्रो काम देखाउनु भयो ।’ उनी अगाडि भन्छन्, ‘यस पटकको चुनावमा महिलालाई नेतृत्वमा लिएर आउने सम्भावना बढी छ, केही पालिकामा त्यो सम्भावना बलियो देखिएको छ ।’

प्रकाशित मिति: आइतबार, चैत २७, २०७८ ११:०६