स्थानीय चुनावमा प्रहरीले भाडाको गाडी प्रयोग गर्ने, छैन सुरक्षा चुनौती

A+ A A-

स्थानीय तहको चुनावको सुरक्षाका लागि म्यादी प्रहरी भर्ना गरेको प्रहरीले सवारीसाधन भने भाडाका प्रयोग गर्ने भएको छ । बुधबार देशभरका जिल्ला प्रहरी कार्यालयहरूले म्यादी प्रहरीमा छनोट भएकाहरूको अन्तिम नामावली सार्वजनिक गरिसकेको छ ।

उनीहरूलाई १० दिन चुनावी सुरक्षासम्बन्धी तालिम दिएपछि चुनावको सुरक्षामा खटाइने प्रहरी प्रवक्ता एसएसपी विष्णु केसीले जनकारी दिए । प्रहरीले स्थानीय चुनावका लागि १ लाख म्यादी प्रहरी भर्ना गरेको छ ।

म्यादी प्रहरीले ४० दिनको तलब ३० हजार २ सय ४०, खाद्यान्नबापत एकमुष्ट ७ हजार २००, पोशाकका लागि ६ हजार र निर्वाचनस्थल आवतजावतका लागि थप १ हजार गरी जम्मा मासिक ४४ हजार ४०० रुपैयाँ पाउनेछन् ।

उसो त प्रहरीलाई चुनावका लागि आवश्यक सवारी साधनसमेत ठूलो मात्रामा अपुग छ । प्रहरी प्रधान कार्यालयले चुनावका लागि देशभर करिब १५ सय गाडी आवश्यक रहेको प्रतिवेदन गृह मन्त्रालयलाई बुझाएको थियो ।

त्यसमध्ये प्रत्येक स्थानीय तहका लागि एउटा नयाँ गाडी खरिद गर्ने माग प्रहरीको थियो । तर, सरकारले प्रहरीका लागि आवश्यक गाडी खरिद गर्न बजेट नदिएपछि प्रहरीले चुनावमा भाडाको गाडी प्रयोग गर्ने भएको हो ।

प्रहरी प्रवक्ता एसएसपी केसीका अनुसार प्रहरीले पहाडी जिल्लामा चारवटा र तराईका जिल्लामा ३५ वटा गाडी भाडामा लिने तयारी गरेको छ । ‘चुनावका लागि आवश्यक सवारीसाधन हामीसँग अपुग नै हो । अब नयाँ खरिद गर्ने सम्भावना छैन । हामीले भाडामै लिने गृहकार्य थालेका छौँ,’ एसएसपी केसी भने,‘ त्यसका लागि यातायात व्यवसायीसँग पनि समन्वय गर्दैछौँ ।’

बजेटको अभावका कारण गाडी एक साताका लागि मात्रै भाडामा प्रयोग गर्ने तयारी प्रहरीको छ । चुनावका लागि प्रहरी प्रधान कार्यालय र सशस्त्र प्रहरी बलले १७ अर्ब ६० करोड ५५ लाख बजेट माग गरेको थियो । तर, सरकारले यसको आधा मात्रै बजेट उपलब्ध गराएको छ ।

चुनावमा सुरक्षा चुनौती शून्य

प्रहरीले यसपालिको स्थानीय चुनावमा सुरक्षा चुनौती शून्य रहेको जनाएको छ । देशमा कुनै पनि ठूलो समूह भूमिगत रूपमा नरहेको र पछिल्लो समय नेकपा विप्लव समूह पनि शान्तिपूर्ण राजनीतिमा आएका कारण सुरक्षा चुनौती नरहेको प्रहरीको विश्लेषण छ ।

केही महिनाअघि किसान आन्दोलनको रूपमा हिंसात्मक प्रदर्शनमा उत्रिएको सीके राउत समूह पनि चुनावमा भाग लिने भएपछि तराईमा समेत सुरुक्षा चुनौती नहुने प्रहरीको विश्लेषण छ ।

‘स्थानीय चुनावमा सुरक्षाको कुनै चुनौती छैन । यसअघिको चुनावमा विप्लब समूह भूमिगत भएका कारण केही चुनौती थियो,’ एसएसपी केसी भन्छन्,’ यो पालि त्यस्तो अवस्था पनि छैन । तराईमा सीके रावत समूहले पनि चुनावमा भाग लिने भएपछि सुरक्षा चुनौती भन्ने कुरै छैन ।’

यद्यपि प्रहरी र अन्य तीनवटै सुरक्षा निकायसँग सुरक्षा अवस्थाबारे विश्लेषण गरेर प्रहरी परिचान गर्ने तयारी प्रहरी प्रधान कार्यालयको छ । जसअन्तर्गत सामान्य निर्वाचन केन्द्रमा तीन जना प्रहरी र पाँच जना म्यादी प्रहरी, संवेदनशील निर्वाचन केन्द्रमा तीन प्रहरी र सात म्यादी प्रहरी, अति संवेदनशील केन्द्रमा चार जना प्रहरी र १० जना म्यादी प्रहरी खटाइने प्रहरी प्रधान कार्यालयले जनाएको छ ।

त्यस्तै, महानगरमा चार जना सिनियर प्रहरी अधिकारी, उपमहानगरमा तीन जना, नगरपालिका र गाउँपालिकामा दुई/दुई जना खटाइने प्रधान कार्यालयले जनाएको छ । त्यस्तै, मुख्य निर्वाचन अधिकारीको सुरक्षा र कार्यालयका लागि जुनियर प्रहरी अधिकारीको कमाण्डमा १० जना प्रहरी परिचालन हुनेछन् ।

केन्द्रीय सुरक्षा नीति २०७४ अनुसार प्रहरी परिचालन गर्दा प्रहरी जनशक्तिको कमी हुने भएपछि यसलाई संशोधन गरेर निर्वाचन अधिकारीको निवासको सुरक्षाका लागि प्रहरीबाहेक अन्य सुरक्षा संगठनलाई दिँदा ठीक हुने सुझाव गृहलाई पठाइएकाे छ ।

प्रकाशित मिति: बिहीबार, चैत २४, २०७८ १४:१०