कोरियाको आकर्षण घट्यो, भाषा परीक्षामा सात वर्षयताकै कम आवेदन

A+ A A-

रोजगार अनुमति प्रणाली (ईपीएस)मार्फत सन् २०२२ मा हुने कोरियन भाषा परीक्षामा ४४ हजार ८ सय ५३ जनाले आवेदन दिएका छन् । कोरियाले नेपालबाट यो वर्ष कृषि र उत्पादन क्षेत्रमा गरी ९ हजार ६ सय ९८ जनाको कोटा छुटाएको छ ।

२०२२ का लागि कृषि क्षेत्रका लागि १० हजार ८ सय ५८ र उत्पादनमूलक क्षेत्रमा ३३ हजार ९ सय ९५ जनाले आवदेन दिएको वैदेशिक रोजगार विभाग ईपीएस शाखाका कम्प्युटर इन्जिनियर टेकबहादुर खड्काले जानकारी दिए ।

सन् २०१९ पछि २ वर्ष रोकिएको भाषा परीक्षा सन् २०२२ का लागि ९ हजार ६ सय ५४ जनालाई छनोट गर्ने योजनासहित वैशाखबाट परीक्षा सञ्चालन गर्न आवेदन माग गरिएको शाखाले जनाएको छ ।

दक्षिण कोरियाले ईपीएसमार्फत लिँदै आएको कोरियन भाषा परीक्षाका लागि सात वर्षयता सबैभन्दा कम आवदेन परेको ईपीएस शाखाले जानकारी दिएको छ ।

विगत वर्षहरूमा माग गरिएको संख्याभन्दा १० गुणा बढी आवेदन पर्ने गरेको शाखाको तथ्यांक छ । विगतका वर्षमा एउटा कोटाका लागि १५ जनासम्मकाे आवदेन पर्नेगरेको थियो । तर, यो वर्ष एउटा कोटामा चार जनाले मात्र प्रतिस्पर्धा गर्नेगरी आवेदन परेको शाखाले जनाएको छ ।

सन् २०१६ मा १० हजार २ जनाको कोटामा ७२ हजार जनाले आवेदन दिएका थिए । २०१७ मा ७ हजार ८ सय कोटाका लागि ७५ हजार ५ सय ५३ जनाले आवदेन दिएको शाखाको तथ्यांकमा छ ।

यस्तै, सन् २०१८ मा ८ हजार ५ सय १९ जनाको कोटामा ८२ हजार २ सय ८६ जना र २०१९ मा ७ हजार एक ३६ जनाको कोटामा ९२ हजारले परीक्षाका लागि आवेदन दिएको शाखाले जनाएको छ । कोरोनाका कारण २०२० र २०२१ मा कोरियन भाषा परीक्षा सञ्चालन भएन ।

विगत वर्षको तुलनामा कोरोनाका कारण कोरिया जाने क्रम रोकिएका कारण कोरिया रोजगारीप्रति युवाको आकर्षण घटेको हुनसक्ने वैदेशिक रोजगार विभागका महानिर्देशक शेषनारायण पौडेलको बुझाइ छ ।

कोरोना भाइरसका कारण कोरियन भाषा पढ्न नपाएका कारण कम आवेदन परेको हुन्सक्ने उनको बुझाइ छ ।

कोरियाले यो वर्षका लागि सबैभन्दा बढी श्रमिक नेपालबाट लैजाने गरी पहिलो छनोट चरणको भाषा परीक्षाको आवेदन माग गरेको थियो ।

कोरिया जाने योग्य सूची (रोष्टर) मा धेरै नेपाली नभएका कारण २०२२ का लागि भाषा परीक्षा गर्न लागिएको हो । २०२२ का लागि भाषा परीक्षा वैशाख २६ बाट असोज २१ गतेसम्म चरणबद्ध रुपमा हुने शाखाले जनाएको छ ।

कोरियन भाषा परीक्षा पास भएर कोरिया जाने प्रतिक्षामा लगभग ६ हजार श्रमिक रहेको शाखाले जनाएको छ । जसमा २ हजारभन्दा बढीको प्रक्रिया अन्तिम चरणमा रहेको शाखाले जानकारी दिएको छ ।

कोरियाले १६ वटा देशमध्ये पछिल्लो समय नेपाल र कम्बोडियाबाट धेरै श्रमिक लैजाने योजना बनाएको छ । कोरियाको कृषि तथा पशुपालन र उत्पादन क्षेत्रका रोजगारदाताले विगत २ वर्षयता श्रमिक अभाव झेलिरहेका कारण नेपालबाट ठूलो संख्यामा श्रमिक लैजाने जनाएको छ ।

कोरियाले नेपालबाट सन् २०२२ मा ४ हजार मौसमी कामदार लैजाने घोषणा समेत गरेको छ ।

सन् २००८ देखि वर्षेनी ईपीएस कोरियन भाषा परीक्षा सञ्चालन हुँदै आएको छ । कोरोनाका कारण पछिल्लो २ वर्ष कोरोना संक्रमणका कारण स्थगन गरिएको थियो ।

ईपीएसअन्तर्गत हालसम्म ७७ हजार नेपाली कोरिया रोजगारीका लागि प्रवेश गरिसकेका छन् । जसमध्ये ३५ हजार नेपाली कोरियाका विभिन्न साना तथा मझौला उद्योगमा कार्यरत छन् ।

प्रकाशित मिति: बुधबार, चैत २३, २०७८ १४:२८