शान्ति मिसनमा मृत्यु हुने नेपाली सेनाको संख्या ६९ पुग्यो, क्षतिपूर्तिकाे व्यवस्था के छ ?

शान्ति मिसनमा मृत्यु हुने नेपाली सेनाको संख्या ६९ पुग्यो, क्षतिपूर्तिकाे व्यवस्था के छ ?

A+ A A-

कंगोको विद्रोही समूह मिलिसियाको आक्रमणबाट नेपाली सेनाका जवान सुर्खेत गुर्भाकोट नगरपालिका-१४ का अनिल गुरुङले मंगलबार ज्यान गुमाए ।

संयुक्त राष्ट्रसंघ (युएन) को आह्वानमा शान्ति स्थापनार्थ कंगोमा तैनाथ शान्ति सेनाको पहिलो डप्फामा कार्यरत गुरुङ विद्रोही समूहको गोली लागेर ढलेका थिए । गोली लागेर गम्भीर घाइते भएका गुरुङको कंगोकै बुनियास्थित लेबल-२ अस्पतालमा उपचारका क्रममा मृत्यु भयो ।

नेपाली सेनाका प्रवक्ता सहायक रथी नारायण सिलवालका अनुसार पहिला विद्रोहीको कब्जामा रहेको जमिनबाट उनीहरूलाई धपाएर नेपाली सेना त्यो ठाउँमा पुगेको थियो । त्यही बेला विद्रोहीले हानेको गोली गुरुङलाई लागेको थियो । ‘अपरेसन बाली’ समूहका बाँकी सबै सैनिक सुरक्षित छन् ।

गुरुङसहित अहिलेसम्म नेपाली सेनाका ६९ सुरक्षाकर्मीले संयुक्त राष्ट्रसंघको शान्ति मिसनमा खटिएकै बेला ज्यान गुमाएको सैनिक प्रवक्ता सिलवालले बताए । २७ फागुन २०७६ मा युनिफिलमा खटिएका सेनाका अमलदार नरबहादुर मगरको पनि शान्ति मिसनकै क्रममा ज्यान गएको थियो ।

धादिङ मुलपानीका मगर शिवदल गण बर्दियामा कार्यरत थिए । सैनिक मुख्यालयको तथ्यांक अनुसार नेपाली सेनाका २१ जनाले लेबनानको भूमिमा ज्यान गुमाएका छन् । त्योबाहेक ६६ जना सैनिक अपाङ्ग भएका छन् । सैनिक मुख्यालयको तथ्यांक अनुसार शान्ति मिसनमा खटिएर सबैभन्दा धेरै नेपाली सैनिकले लेबनानमा ज्यान गुमाएका छन् ।

नेपाली सेनाले सन् १९५८ देखि विभिन्न ४३ द्वन्द्वग्रस्त मुलुकमा शान्ति स्थापनाका लागि नेपाली सेना पठाउँदै आएको छ । हालसम्म एक लाख ३५ हजार तीन सय ९९ जनाले शान्ति मिसनमा भाग लिएको तथ्यांक सेनासँग छ । सबैभन्दा पहिले सन् १९७४ मा गोरख बटालियन द्वन्द्वग्रस्त देश इजिप्टमा तैनाथ भएको थियो । त्यसयता विभिन्न द्वन्द्वग्रस्त मुलुकमा नेपाली सेना सहभागी हुँदै आएको छ ।

हाल १२ वटा मिसनमा ५ हजार ४ सय ४७ सैनिक तैनाथ छन् । तीमध्ये २ सय १४ महिला सैनिक सहभागी छन् । शान्ति सेनामा योगदानका हिसाबले नेपाली सेना विश्वमा दोस्रो स्थानमा छ । राष्ट्रसंघले अनुरोध गरेमा नेपालले १० हजार शान्ति सैनिक उपलब्ध गराउने प्रतिबद्धता जनाएको छ ।

कति पाउँँछन् मृतकका परिवारले क्षतिपूर्ति ?

शान्ति स्थापनाका लागि खटिएका सैनिकको मृत्यु भएमा परिवारलाई संयुक्त राष्ट्रसंघले क्षतिपूर्ति दिँदै आएको छ । युएनले पीडित परिवारलाई ७० हजार अमेरिकी डलर क्षतिपूर्ति दिने व्यवस्था छ । पीडितले पाउने क्षतिपूर्तिका लागि सेनाले अविलम्ब प्रक्रिया थाल्ने प्रवक्ता सिलवालले बताए । त्यसबाहेक नेपाली सेनाको कल्याणकारी कोषले मृतकका दुई जना सन्तानलाई १२ कक्षासम्म निःशुल्क शिक्षा दिने गरेको छ ।

प्रकाशित मिति: बुधबार, चैत २३, २०७८ १३:०८