गरिबको गास महँगिएको बेवास्ता गर्दै लिटरमै ६२ रुपैयाँ राजस्व उठाएर १६० मा तेल बेच्छ सरकार

गरिबको गास महँगिएको बेवास्ता गर्दै लिटरमै ६२ रुपैयाँ राजस्व उठाएर १६० मा तेल बेच्छ सरकार

A+ A A-

पछिल्लो छ महिनामा सरकारले पेट्रोलको मूल्य प्रतिलिटर २४ रुपैयाँले बढाएको छ । गत कात्तिकमा प्रतिलिटर १३६ रुपैयाँ रहेको पेट्रोलको मूल्य मंगलबार मध्यरातिबाट लागू हुनेगरी १६० रुपैयाँ पुगेको छ ।

चार दिनअघि इन्डियन आयल कर्पोरेसनले पेट्रोलको मूल्य प्रतिलिटर १ रुपैयाँ घटाएर पठाए पनि अन्य इन्धनको मूल्य बढाएको थियो । आयल निगमले समग्रमा डिजेल, मट्टितेल र पेट्रोलको मूल्य लिटरमै ५ रुपैयाँ बढाएको छ भने ग्यास प्रतिसिलिन्डर २५ रुपैयाँ ।

इन्धनको मूल्य घटेको मौका समाएर तत्कालीन केपी शर्मा ओली नेतृत्वक‍ो सरकारले लिटरमै १५ रुपैयाँ कर बढाएको थियो । अहिले पेट्रोलको मूल्य हालसम्मकै उच्च बिन्दुमा पुगेको छ । तर, सरकारले अनावश्यक र कर नीति विपरीत लगाएको कर घटाउन मानिरहेको छैन ।

आर्थिक वर्ष २०७६-७७ मा तत्कालीन अर्थमन्त्री डा. युवराज खतिवडाले बजेट वक्तव्यमार्फत डिजेल र पेट्रोलमा १० रुपैयाँ भन्सार शुल्क र ५ रुपैयाँ पूर्वाधार विकास कर वृद्धि गरेका थिए ।

त्यसपछि भन्सार महसुल २५ रुपैयाँ र पूर्वाधार विकास कर १० रुपैयाँ प्रतिलिटर पुर्‍याइएकाे थियाे ।सडक मर्मत सम्भार, प्रदूषण शुल्क, मूल्य अभिवृद्विकर गरेर पेट्रोलमा ६२ रुपैयाँ कर पुर्‍याएको छ १६० रुपैयाँ लिटरमा पेट्रोल बेच्दा । डिजेलमा पनि ४३ रुपैयाँ राखेको छ ।

आयल निगमले मूल्यवृद्धिको कारण अत्यधिक घाटा भएको भन्दै विकल्पसहितको पत्र सरकारलाई पठाएको थियो । मुख्य रूपमा ग्यास र पेट्रोलको कर घटाउन उसको सुझाव रहेको थियो । दोस्रो महत्वपूर्ण सुझाव खपत घटाउने थियो ।

१४ चैतमा यस्तो पत्र निगमले पठाए पनि सरकारले भने बेवास्ता गरेको छ । उद्योग वाणिज्य तथा आपूर्ति मन्त्रालयका प्रवक्ता डा. नारायण रेग्मीले निगमको पत्रबारे नै जानकार नभएको प्रतिक्रिया दिए ।

मन्त्रालयकी सहसचिव राधिका अर्याल निगमबाट प्रस्ताव आए पनि छलफल नगरिएको बताउँछिन् । `निगमबाट सुझाव आएको हो तर, यस विषयमा छलफल भने भएको छैन´, उनले भनिन् ।

पछिल्लो २ वर्षमा लिटरमै ६५ रुपैयाँ मूल्य बढेको र अत्यधिक मूल्यवृद्धिका कारण विदेशी सञ्चितिमा समेत चाप परेको सन्दर्भमा खपत घटाउने र मूल्य बढ्न नदिने सुझावलाई सरकारले बेवास्ता गरेको छ ।

सरकारले चार दिनअघिमात्रै पेट्रोलको मूल्य ५ रुपैयाँ बढेमा सवारी तथा ढुवानी भाडा स्वतः बढ्ने निर्णय गरेको थियो । चार दिनअघि मात्रै १५ प्रतिशत बढेको भाडा फेरि बढ्ने भएको छ । क्रय शक्ति घट्दै गएको अवस्थामा मूल्यवृद्धि नियन्त्रणमा सहयोग गर्ने सुविधा सरकारसँग भए पनि जनताको समस्यामा सरकार माैन बसेकाे छ ।

प्रकाशित मिति: बुधबार, चैत २३, २०७८ ००:४३