सिन्धुलीको फिक्कल गाउँपालिका अध्यक्षको उम्मेदवार को ? नेताहरूले सुरु गरे लविङ

सिन्धुलीको फिक्कल गाउँपालिका अध्यक्षको उम्मेदवार को ? नेताहरूले सुरु गरे लविङ

A+ A A-

स्थानीय तहको चुनाव नजिकिएसँगै सिन्धुलीको फिक्कल गाउँपालिकामा पनि चुनावलक्षित गोष्ठी तथा बैठकहरू हुन थालेका छन् । नेताहरूले भेटघाटलाई तीव्रता दिन थालेका छन् भने टिकटका लागि लविङ पनि सुरु भएको छ ।

केही नेताहरूले आन्तरिक रूपमा आफूलाई उम्मेदवार देखाउन थालेका छन् भने केहीले टिकटको लागि लविङ नै थालेका छन् । सामाजिक सञ्जालहरूमा विभिन्न सामग्रीहरू राखेर आफूलाई अब्बल देखाउने प्रयास पनि हुन थालेको छ ।

अघिल्लो पटक एमालेका उम्मेदवार धनबहादुर कार्की गाउँपालिका अध्यक्षमा निर्वाचित भएका थिए । कार्की यसपटक पनि एमालेका सम्भावित उम्मेदवार हुन् । उनले पनि दोहोरिने इच्छा व्यक्त गरेको बुझिएको छ ।

एमालेबाटै गाउँपालिका उपाध्यक्षमा निर्वाचित भएकी पार्वती सुनुवार पनि यस पटक अध्यक्षकी दाबेदार हुन् । एक पटक उपाध्यक्ष भइसकेकाले अब अध्यक्षको जिम्मेवारी सम्हाल्ने सुनुवारको प्रयास छ । उपाध्यक्ष चलाइसकेकाले अब अध्यक्ष चलाउने उनको मनसाय छ ।

अघिल्लो पटक पार्टीकै कारण उपाध्यक्ष बनेको उनी बताउँछिन् । पार्टीमा आफूले यो प्रस्ताव राखेको उनी बताउँछिन् । आफूले टिकट पाए जित्ने उनको भनाइ छ ।

‘अघिल्लो पटक उपाध्यक्षमा चित्त बुझाएँ,’ सुनुवार भन्छिन्, ‘गाउँपालिका अध्यक्षको टिकट पाएको भए त्यतिबेलै अध्यक्ष हुन्थे ।’ महिलाले सधैँ उपाध्यक्षमा मात्र चित्त बुझाउन नहुने उनको भनाइ छ ।

गाउँपालिकाका प्रवक्ता तथा वडा नं. ५ का अध्यक्ष राजु बरालले पनि गाउँपालिका अध्यक्षमा लड्ने इच्छा व्यक्त गरेका छन् । आफू गाउँ-गाउँमा गएर संगठन विस्तारमा लागेको उनी बताउँछन् ।

फिक्कलको अध्यक्षमा एमालेबाट हालका अध्यक्ष धनबहादुर कार्की, उपाध्यक्ष पार्वती सुनुवारलसहित राजु बराल, रामप्रसाद कार्की, कृष्ण केसीलगायतको नाम चर्चामा छ ।

त्यस्तै कांग्रेसबाट अध्यक्षमा मोहनबहादुर कार्की, रामकुमार पहाडी, निर्प भुजेलको नाम चर्चामा छ ।

कार्की अघिल्लो पटक गाउँपालिका अध्यक्षमा एमाले उम्मेदवारसँग पराजित भएका थिए । तर, यसपटक आफूले टिकट पाए अध्यक्षमा जित्ने विश्लेषण सुनाउँछन् उनी । खासगरी एमाले विभाजित भएकाले फिक्कलमा कांग्रेस बलियो रहेको सुनाए उनले ।

'२०७४ मा केही प्राविधिक कारणले पराजित भएँ । अहिले अवस्था त्यस्तो छैन । कम्युनिष्ट विभाजित भएका छन्,' उनी भन्छन्, 'फिक्कलमा अहिले कांग्रेस बलियो भएको छ ।' आफू अहिले संगठन विस्तारमा लागेको उनले सुनाए ।

कांग्रेसका रामकुमार पहाडी पनि यसपटक फिक्कल गाउँपालिका अध्यक्षका प्रत्यासी हुन् । पहाडीले अध्यक्षको टिकटका लागि आन्तरिक रूपमा लविङ गरिरहेका छन् ।

त्यस्तै माओवादी केन्द्रबाट गाउँपालिका अध्यक्षमा धिरज रजन मगर, लोकेन्द्र कार्की तथा विक्रम सुनुवारको नाम चर्चामा छ । रजन मगर अघिल्लो पटक पनि माओवादीबाट अध्यक्षका उम्मेदवार थिए ।

२०७४ को स्थानीय चुनावमा फिक्कल गाउँपालिकामा १० हजार २ सय मतदाता थिए । अहिले बढेर ११ हजार ९ सय पुगेको गाउँपालिकाका प्रवक्ता राजु बरालले बताए । फिक्कलका ६ वडामध्ये २,३,४ र ५ गरी चार वडामा एमालेले जितेको थियो । कांग्रेसले भने १ र ६ गरी दुई वडामा चुनाव जितेको थियो ।

प्रकाशित मिति: बुधबार, चैत २३, २०७८ २१:१२