सन् २०१९ को पहिलो ६ महिनामा ३८ पत्रकार मारिए

A+ A A-

सन् २०१९ को पहिलो ६ महिनामा विश्वका विभिन्न २० मुलुकमा गरी ३८ पत्रकार मारिएकाे जेनेभास्थित ‘प्रेस इम्ब्लेम क्याम्पियन’ (पीईसी) ले जनाएको छ ।

सन् २०१८ को तुलनामा विभिन्न घटनामा मारिने पत्रकारको संख्यामा ४२ प्रतिशतको कमी देखिएको पीईसीको तथ्यांकमा उल्लेख छ । पीईसीले पत्रकारको हत्यामा कमी आउनुलाई सकारात्मक भनेको छ ।

सो संस्थाले अझै पनि मेक्सिको र अफगानिस्तानमा मारिने पत्रकारको संख्या कहालीलाग्दो रहेको बताएको छ । सन् २०१९ को जनवरीदेखि जुनसम्ममा विभिन्न खाले घटनामा गरी मेक्सिकोमा नौ र अफगानिस्तानमा ६ पत्रकार मारिएकाे जनाएको छ ।

अफगानिस्तानमा आतंकवादी समूह र मेक्सिकोमा आपराधिक समूहलाई सञ्चारकर्मीद्वारा गरिने धम्की र चेतावनीका कारण ठूलो धनराशि खर्चिनुपर्ने अवस्था देखिएको पनि पीईसीले उल्लेख गरेको छ ।

पीईसी महासचिव ब्लाइस लेम्पेनले भने, ‘सम्बन्धित देशको संघसंस्थाले सञ्चार माध्यम तथा त्यहाँ कार्यरत पत्रकार र अन्य सञ्चारकर्मीको सुरक्षाको प्रत्याभूत गर्न असफल हुँदा वा आवश्यक कानूनी प्रक्रियामा लान असफल बन्दा यसलाई हेर्न र दण्डहीनताविरोधी संघर्षका लागि अन्तर्राष्ट्रिय समुदायले स्वतन्त्र संरचनाको स्थापना गर्नुपर्ने देखिएको छ ।’

उनले भने, ‘क्षेत्रीय स्तरमा हेर्दा ल्याटिन अमेरिकी मुलुकमा सन् २०१९ को पहिलो ६ महिनामा अन्य क्षेत्रको तुलनामा सबैभन्दा धेरै १५ जना पत्रकार मारिएका छन् भने यससम्बन्धी मध्यपूर्वको तथ्यांकमा सुधार आएको देखिएको छ ।’

मध्यपूर्वी मुलुक सिरिया र इराक पछिल्लो समय द्वन्द्वका घटनामा पनि कमी आएको र पत्रकारमाथिको आक्रमण पनि तुलनात्मक रूपमा कम बनेको देखिएको हो ।

सरकार, विभिन्न संघसंस्था तथा नागरिक समाजले पत्रकारमाथिको आक्रमणलाई कमी गर्न पत्रकारको सुरक्षामा ध्यान दिनुपर्ने र यसबाट आधाभन्दा बढी पत्रकारको हत्यामा कमी ल्याउन सकिने भन्दै गत वर्ष पीईसीले सोहीअनुरूप अघि बढ्ने कार्यक्रमको लक्ष्य निर्धारण गरेको थियो ।

सन् २०१४ मा स्थापना भएको अन्तर्राष्ट्रिय पत्रकारहरूको समूह पीईसी गैरसरकारी संस्था हो, जसले संयुक्त राष्ट्रसंघसँगको विशेष परामर्शमा पत्रकारलाई वैधानिक संरक्षण तथा सुरक्षाका लागि द्वन्द्वरत क्षेत्रमा काम गर्दै आएको छ ।

प्रकाशित मिति: शनिबार, असार २१, २०७६ ०१:४६