१८ बैंकको कर्जा विस्तारमा रोक, आयातमा थप कडाइ गर्ने संकेत

A+ A A-

निक्षेप संकलन नहुँदा पनि वाणिज्य बैंकहरूले ऋण विस्तार जारी राखेपछि राष्ट्र बैंकले चासो देखाएको छ । केन्द्रीय बैंकले गरेको व्यवस्थाअनुसार बैंकहरूले आगामी असार मसान्तभित्र निक्षेप र कर्जाबीचको अनुपात ९० प्रतिशतको सीमाभित्र राख्नुपर्ने हुन्छ ।

तर, राष्ट्र बैंकले त्यसअघि नै ९० प्रतिशतमाथि पुगेका बैंकहरूलाई १ रुपैयाँ पनि थप कर्जा विस्तार नगर्न मौखिक निर्देशन दिएको हो ।

'हामीले सुक्ष्म रूपमा हेरिरहेका छौँ, परिपत्र जारी गरिएको छ नै तर धेरै बैंकहरूको अहिले सीडी रेसियो ९० प्रतिशतमाथि पुगेको छ', सुपरीवेक्षण विभागका प्रमुख देवकुमार ढकालले सोमबार बैंकका सीईओहरूलाई बोलाएर भनेका छन्, 'यस्ता बैंकहरूले अहिले कर्जा विस्तारमा रोक लगाउनुहोस्, असारसम्म त हामीले कारवाही गर्ने कुरा भएन तर, त्यसपछि १ दिन पनि हामीले हेर्न सक्दैनौँ ।'

अहिले १८ वटा बैंकको सीडी रेसियो ९० प्रतिशतमाथि पुगेको छ । कुमारी, सिभिल र एसबीआई बैंकको सीडी रेसियाेले सीमा नाघेको छ । यी बैंकको ९४ प्रतिशतमाथि सीडी रेसियो पुगेको छ ।

त्यस्तै फागुन मसान्तसम्ममा नै मेगा, बीओके,एनसीसी, एनबीबी, सेञ्चुरी, एन्भेष्टमेन्ट, कृषि विकास, नविल, सिटिजन, एभरेष्ट र ग्लोवल बैंकले ९० प्रतिशतको सीमा काएका छन् ।

त्यस्तै खुद तरल सम्पत्ति (एनएलए) २० प्रतिशतमाथि पुर्‍याउनका लागि पनि राष्ट्र बैंकले निर्देशन दिएको छ ।

राष्ट्र बैंकले आयातमा थप कडाइ गर्ने संकेत गरेको छ । यसअघि हार्मोनिक कोड भएका बस्तुमा नगद मार्जिनको व्यवस्था गरेर निरुत्साहित गरेको राष्ट्र बैंकले बैंकहरूलाई विलासी बस्तुमा एलसी नखुलाउन आग्रह गरेको छ । तर, वाणिज्य बैंकका प्रतिनिधिहरूले भने राष्ट्र बैंककै तर्फबाट यस्तो परिपत्र जारी गर्न आग्रह गरेका छन् ।

प्रकाशित मिति: सोमबार, चैत २१, २०७८ २०:३२