धनगढीको मेयरका लागि पार्टीभित्र हानथाप, दोहोरिने दाउमा वड

A+ A A-

सुदूरपश्चिम प्रदेशको एक मात्र उपमहानगरपालिका हो धनगढी । त्यसैले पनि धनगढी उपमहानगरपालिकालाई निकै चासोका साथ हेरिन्छ । ३० वैशाखमा हुने स्थानीय तहको चुनावमा धनगढी उपमहानगरपालिकाको मेयरको उम्मेदवार को-को बन्लान्, कसले जित्ला ? भन्ने बहस सुरु भएको छ ।

प्रमुख राजनीतिक दलले चुनावको तयारीलाई तीव्र बनाउन थालेका छन् भने मेयर/उपमेयरका आकांक्षीले मतदाता रिझाउन सुरु गरिसकेका छन्ने । विशेषत: मेयरका आकांक्षीले टिकटका लागि पार्टीभित्र आ-आफ्नो लविङ पनि गरिरहेका छन् । धनगढी उपमहानगरको मेयरका लागि प्रमुख राजनीतिक दलबाट दर्जनभन्दा बढीले आकांक्षा देखाएका छन् । स्थानीय तहको चुनावमा आवश्यकताको सिद्धान्तअनुसार गठबन्धन गर्ने पाँच दलीय गठबन्धनमा सहमित भइसकेको छ ।

गठबन्धन हुने भएपछि मेयर कुन दलले पाउने हो भन्ने केही अन्योलता पनि थपिएको छ । तर, अघिल्लो पटक मेयर जितेको कांग्रेसले दाबी छोड्ने देखिँदैन । प्रधानमन्त्री शेरबहादुर देउवापत्नी आरजु राणा देउवाको निर्वाचन क्षेत्र पनि भएकाले धनगढी उपमहानगर कांग्रेस आफ्नै लिने देखिन्छ । धनगढीको मेयर कांग्रेसले नै पाउने दाबी गर्छन् कांग्रेस जिल्ला सचिव केशव मिश्र ।

अघिल्लो चुनावमा कांग्रेसबाट मेयरमा निर्वाचित नृपबहादुर वड फेरि दोहोरिने दाउमा छन् । त्यसका लागि वडले पार्टीभित्र लविङ पनि गरिरहेका छन् । ‘केन्द्रले चुनावको तयारी गर्न भनिसकेको छ, त्यसैअनुसार मैले काम पनि अघि बढाइसकेको छु’, उनले भने । वडसँगै कांग्रेसबाट कृष्णबहादुर महरा, पूर्ण कुँवरलगायतले पनि टिकटका लागि दौडधुप गरिरहेका छन् । उनीहरूले धनगढीको मेयरमा कांग्रेसले नयाँ अनुहार दिनुपर्ने बताउँदै आएका छन् । वड लामो समय नगरपालिका सञ्चालन गर्ने दलीय संयन्त्रमा नेतृत्वसमेत गरेका व्यक्ति हुन् ।

कांग्रेस कैलालीका सभापति नारायणदत्त भट्टले अहिले नै पार्टीले टिकट दिने निर्णय गरिनसकेको बताए । ‘यस विषयमा कुनै छलफल र निर्णय भएको छैन । केही दिनपछि उम्मेदवार छनोट प्रक्रिया सुरु हुन्छ । त्यसपछि सबै वस्तुस्थिति अध्ययन गरेर केन्द्रबाटै निर्णय हुन्छ’, उनले भने ।

नेकपा एमालेभित्र पनि टिकटको दाबी गर्नेको संख्या धेरै छ । अघिल्लो चुनावमा तेस्रो स्थानमा सीमित एमालेबाट यसपटक दुर्गा जोशीले पुनः मेयरका लागि दाबी गरिरहेका छन् । जोशीले एमालेले आफूलाई नै उम्मेदवार बनाउने बताउँछन् ।

जिल्लामा पार्टीको विभिन्न जिम्मेवारी निर्वाह गरेका र हालसम्म लाभको पदमा नपुगेका रणबहादुर चन्दले पनि टिकटका लागि लविङ गरिरहेका छन् । एमालेबाट राजेश खाती र जीवन बमले पनि मेयरका लागि लविङ गरिरहेका छन् ।

एमाले विभाजनपछि बनेको एकीकृत समाजवादी पार्टीको पनि सुदूरपश्चिममा बलियो पकड छ । एकीकृत समाजवादीबाट व्यवसायी राजेश भण्डारी र मदन रेग्मीले धनगढीको मेयरमा दाबी गरिरहेका छन् । भण्डारीले समाजवादीले मेयरको टिकट नदिए राप्रपाबाट भए पनि उम्मेदवार बन्ने आफूनिकटहरूसँग बताउन थालेका छन् । माओवादी केन्द्रबाट २०७४ को चुनावमा उपमेयरमा पराजित शान्ति अधिकारी, वडा नम्बर ३ का वडाध्यक्ष बलबहादुर ऐर र डीएल भण्डारीले मेयरमा आंकाक्षा देखाएका छन् ।

२०७४ सालको चुनावमा स्वतन्त्र चुनाव लडेर कांग्रेसका नृप वडसँग पराजित भएका व्यवसायी गोपाल हमालले एक महिनाअघि नै उम्मेदवारी घोषणा गरेर आफ्नो प्रचार अभियान सुरु गरिसकेका छन् । हमालले धनगढीलाई नेपालकै मोडल शहर बनाउने प्रतिबद्धतासहित फेरि स्वतन्त्र उम्मेदवारी दिने बताएका छन् । अहिले व्यापक भ्रष्टाचार रहेको बताउँदै उनले त्यसलाई हटाएर सामाजिक कल्याणकारी काममा सक्रिय हुने बताउँछन् ।

प्रकाशित मिति: मंगलबार, चैत २२, २०७८ ११:५५