स्थानीय चुनाव नजिकिएसँगै चम्किन थाल्यो ‘स्क्रिन प्रिन्ट’ व्यापार

A+ A A-

स्थानीय तहको चुनाव नजिकिएसँगै राजनीतिक दलहरूले प्रचारका सामग्री बनाउन थालेका छन् । चुनावका लागि प्रचार सामग्री बनाउन काठमाडौंको बागबजारका स्क्रिन प्रिन्ट पसलमा भीड लाग्न थालेको छ ।

पार्टीको झण्डा, चुनाव चिह्न, टोपी, टिसर्टजस्ता प्रचारप्रसारका सामग्री बनाउन व्यापारीहरूले जनशक्ति नै थप्न थालेका छन् । बागबजारमा १९ वर्षदेखि स्क्रिन प्रिन्ट सञ्चालन गर्दै आएका सप्तरीका नरेश चौधरीले व्यापार बढ्न थालेपछि कामदारको संख्या ३-४ जनाबाट दोब्बर बनाउने तयारी थालेका छन् ।

‘कोरोनाका कारण व्यापार सुस्ताएको थियो । चुनाव नजिकिएसँगै कारोबार बढ्न थालेको छ,’ उनले शिलापत्रसँग भने, ‘वैशाख पहिलो हप्तादेखि अझै ३-४ जना जनशक्ति थप्दैछु ।’ चौधरीकाअनुसार हालसम्म राष्ट्रिय जनमुक्ति पार्टीले १० हजार र माओवादी केन्द्रले ५ हजार झण्डा बनाउन अर्डर गरेका छन् । एमाले र कांग्रेसले अर्डर गरिसकेका छैनन् । तर, एक हप्तायता उनीहरूले ५ सयभन्दा धेरै झण्डा किनेका छन् ।

चुनावका बेला प्रचारात्मक सामग्रीको अत्यधिक माग हुने भएकाले अहिलेदेखि नै यस क्षेत्रका स्क्रिन प्रिन्ट व्यापारीहरू त्यस्ता सामग्री तयार पारेर राख्न थालेका छन् । एउटा निर्वाचनमा झण्डा, टोपी, टिर्सटजस्ता सामग्रीहरू ४० देखि ५० लाख रुपैयाँको हाराहारीमा बिक्री हुने गरेको चौधरीको दाबी छ ।

चुनाव नजिकिएसँगै आफूहरू बिहान ७ बजेदेखि बेलुका ७ बजेसम्म १२ घण्टा काममा व्यस्त हुन थालेको उनी सुनाउँछन् । चुनाव र राजनीतिक दलको महाधिवेशन नहुँदा कामको चाप धेरै हुँदैन । तर, चुनाव र ठूला दलका महाधिवेशन हुँदा भने स्क्रिन प्रिन्टको व्यापार चम्किने गरेको छ । अरुबेला दैनिक ८-१० हजार रुपैयाँसम्म कारोबार हुने गरे पनि चुनाव र महाधिवेशन आसपासमा भने कारोबार एकैदिनमा ५० हजार रुपैयाँसम्म पुग्ने गरको चौधरी बताउँछन् ।

चुनावमा प्रचार सामग्रीको अत्यधिक माग हुने हुँदा अहिलेदेखि नै व्यापारीहरूले त्यस्ता सामग्री तयार पारेर राख्न थालेका छन् । ३५ वर्षदेखि बागबजारमै स्क्रिन प्रिन्ट व्यावसाय गरिरहेका विजयकुमार कार्की पनि चुनाव घोषणा भएपछि पार्टीको झण्डा, चुनाव चिह्न, टोपी, टिसर्टजस्ता प्रचार सामग्रीको मूल्यबारे बुझ्न आउनेको संख्या बढ्न थालेको बताउँछन् ।

स्क्रिन प्रिन्टसम्बन्धी व्यवसायीहरूको संगठन नेपाल व्यावसायिक कलाकार महासंघका महासचिव भोलनाथ पौडेल चुनावका बेला माग बढ्ने भए पनि कतिको कारोबार हुन्छ भन्ने यकिन तथ्यांक राख्न गाह्रो हुने बताउँछन् । पौडेलका अनुसार हाल कलाकार महासंघमा १० देखि १२ हजार सदस्य छन् ।

प्रकाशित मिति: सोमबार, चैत २१, २०७८ २०:०३