एमबीबीएसको प्रवेश परीक्षा दिन भारतबाट ल्याइयो खेताला परीक्षार्थी, २ देखि १८ लाखसम्मको डिल

एमबीबीएसको प्रवेश परीक्षा दिन भारतबाट ल्याइयो खेताला परीक्षार्थी, २ देखि १८ लाखसम्मको डिल

A+ A A-

प्रहरीको महानगरीय अपराध महाशाखाको टोलीले शुक्रबार एमबीबीएस प्रवेश परीक्षा दिइरहेका पाँच जना नक्कली परीक्षार्थीलाई पक्राउ गर्‍यो ।

चिकित्सा शिक्षा आयोगले शुक्रबार लिएको प्रवेश परीक्षामा केही व्यक्तिले खेताला परीक्षार्थी राखेर प्रवेश परीक्षा दिन लागेको सूचनाका आधारमा प्रहरीले उनीहरूलाई पक्राउ गरेको हो । प्रहरीले सीसीआरसी कलेज र ग्रामीण स्कुलबाट उनीहरूलाई पक्राउ गरेको हो । यसरी पक्राउ परेकामध्ये एक जना भारतको पटनाबाट प्रवेश परीक्षाकै लागि काठमाडौं ल्याएको खुलेको छ ।

पक्राउ परेकामध्ये इस्तियाक अहमद प्रवेश परीक्षा दिनकै लागि पटनाबाट काठमाडौं आएको खुलेको हो । उनी महोत्तरीका २३ वर्षीय सन्नी साहको नाममा परीक्षा दिन खोज्दा पक्राउ परेका हुन् । प्रहरीले सन्नी साहलाई पनि नियन्त्रणमा लिएको छ ।

महोत्तरीका अमर पण्डित, सर्लाहीका अनिकेत चौधरी र सप्तरीका राम आशिष यादव पनि पक्राउ परेका छन् । पण्डित धनुषाका बृकेश यादव, चौधरी धनुषाकै अजिव कुमार यादव र आशिष रुपन्देहीका स्मित सिंहको प्रवेश प्रहरी दिन खोज्दा पक्राउ परेका हुन् ।

चौधरी र पण्डित किष्ट मेडिकल कलेजका एमबीबीएस प्रथम वर्षका विद्यार्थी र यादव किष्टकै तेस्रो वर्षका विद्यार्थी हुन् ।उनीहरूलाई छात्रवृत्तिमा नाम निकाल्न २ लाखदेखि १८ लाखसम्मको रकम खर्चेर परीक्षा दिन लगाएको खुलेको छ ।

महाशाखाका प्रमुख एसएसपी बसन्त कुँवरका अनुसार उनीहरूले ५० हजार देखि २ लाख रुपैयाँसम्म बुझाइसकेका थिए ।परीक्षा दिन उनीहरूले सक्कली परीक्षार्थीको प्रवेश पत्रमा नक्कली परीक्षार्थीको फोटो टाँसेको खुलेको छ । त्योबाहेक अनुहार मिल्ने व्यक्तिलाई परीक्षा दिन लगाएको पनि खुलेको छ ।

प्रहरीले उनीहरूमाथि थप अनुसन्धान गरिरहेको महाशाखाका एसपी कृष्ण कोइरालाले बताए । ‘हाम्रो प्रारम्भीक अनुसन्धानले उनीहरू आफैँले खेताला परीक्षार्थी खोजेको देखिन्छ । तर, उनीहरूसम्म पुग्ने कुनै विचौलिया छन् कि भन्नेबारे पनि अनुसन्धान जारी राखेका छौँ,’ एसपी कोइरालाले भने ।

प्रकाशित मिति: आइतबार, चैत २०, २०७८ १२:३३