मकवानपुरमा मिलेर स्थानीय चुनाव लड्ने गठबन्धनका दलहरूको सहमति, वडा तहसम्मै संयन्त्र बनाइने

मकवानपुरमा मिलेर स्थानीय चुनाव लड्ने गठबन्धनका दलहरूको सहमति, वडा तहसम्मै संयन्त्र बनाइने

A+ A A-

आगामी ३० वैशाखमा हुने स्थानीय चुनावमा सत्ता गठबन्धनमा आबद्ध पाँच दल मकवानपुरमा एकजुट हुने भएका छन् ।

शुक्रबार नेपाली कांग्रेस मकवानपुरको कार्यालयमा बसेको कांग्रेससहित माओवादी केन्द्र, एकीकृत समाजवादी, जनता समाजवादी र राष्ट्रिय जनमोर्चाको बैठकमा एक भएर चुनावमा जान ती दलहरू सहमत भएका हुन् ।

कांग्रेस मकवानपुरका सभापति बुद्ध लामाले स्थानीय चुनावमा मिलेर जाने सहमति भएको जानकारी दिए । त्यसका लागि लामाको संयोजकत्वमा गठबन्धन कमिटी बनाइएको छ । कमिटीमा अन्य चार दलका जिल्ला अध्यक्ष सदस्य छन् ।

उक्त समितिले जिल्लास्थित १० वटै स्थानीय तहको वडा तहसम्म गठबन्धन संयन्त्र निर्माण गर्ने लामाले जानकारी दिए । शनिबार सबै स्थानीय तहमा संयन्त्र बनाइने उनले बताए ।

गठबन्धनलाई मजबुद बनाउन गठबन्धन कमिटी बनाइएको लामाको भनाइ छ । ‘मकवानपुरमा गठबन्धन निर्वाचनसम्मै हो । र, निर्वाचन जित्नका लागि गठबन्धन हो,’ लामाले भने ।

जिल्लाका १ सय २ वटा वडा र १० वटा स्थानीय तहमा गठबन्धन गरेर अघि बढ्ने एकीकृत समाजवादी मकवानपुरका अध्यक्षले जानकारी दिए । उम्मेदवारको भागवण्डा भने केन्द्रीय गठबन्धनको निर्देशनअनुसार टुंग्याउने कांग्रेस सभापति लामा बताउँछन् ।

मकवानपुरमा स्थानीय तहमा कांग्रेस, माओवादी केन्द्र र एकीकृत समाजवादीका आ-आफ्ना दाबी छन् । जसका कारण गठबन्धन बनाएर भागवण्डा मिलाउन भने सजिलो छैन ।

कांग्रेस सभापति लामा अघिल्लो चुनावमा प्राप्त मतका आधारमा गठबन्धनका उम्मेदवार टुंग्याइने बताउँछन् । २२ चैतभित्र उम्मेदवारहरूको नाम सिफारिस गर्ने उनको भनाइ छ ।

तर, माओवादी केन्द्र र एकीकृत समाजवादी भने अघिल्लो चुनावमा पाएको मतका आधारमा उम्मेदवारको नाम सिफारिस गर्न नहुने पक्षमा छन् । मकवानपुरमा कांग्रेसभन्दा आफूहरू कमजोर नरहेको माओवादी नेताहरूको भनाइ छ । उता, एमालेले जितेको स्थानीय तहमा एकीकृत समाजवादीले दाबी गरिरहेको छ ।

अघिल्लो चुनावमा एमालेले कांग्रेस र माओवादी केन्द्रको गठबन्धन बन्दा पनि हेटौँडा उपमहानगरपालिका र भिमफेदी गाउँपालिका जितेको थियो । खासमा मकवानपुरमा एमालेलाई पहिलो शक्तिका रूपमा हेरिन्छ । तर, परिणाममा एमालेलाई पार्टी विभाजनको असर कत्तिको पर्छ त्यो भने हेर्न बाँकी छ ।

प्रकाशित मिति: शुक्रबार, चैत १८, २०७८ १९:५८