रुस–युक्रेन युद्ध : नेपालीकाे युरोप रोजगारी प्रभावित, कतिपय देशको श्रम स्वीकृति नै बन्द

रुस–युक्रेन युद्ध : नेपालीकाे युरोप रोजगारी प्रभावित, कतिपय देशको श्रम स्वीकृति नै बन्द

A+ A A-

रुस–युक्रेन युद्धकाे प्रभाव नेपालकाे वैदेशिक रोजगार क्षेत्रमा पर्न थालेको छ । कोरोना महामारीपछि लयमा फर्किंदै गरेको युरोप रोजगारी रुस–युक्रेन युद्धका कारण प्रभावित बनेकाे हाे । सरकारले कतिपय देशको श्रम स्वीकृति जारी गर्न छाडेको छ ।

सरकारले युद्धका कारण असुरक्षा बढेको भन्दै तीन देश जाने कामदारका हकमा श्रम स्वीकृति नै बन्द गरेको छ । तत्कालका लागि सिसेल्स, क्रोएसिया र मोरिससको श्रम स्वीकृति जारी नगर्ने श्रम, रोजगार तथा सामाजिक सुरक्षा मन्त्रालयले निर्णय गरेको हाे । कहिलेसम्म श्रम स्वीकृति बन्द गर्ने हो भन्ने विषयमा भने श्रम मन्त्रालयले खुलाएको छैन ।

यी देशमा संस्थागतभन्दा व्यक्तिगत श्रम स्वीकृतिमा नेपाली कामदार जाने गरेको वैदेशिक रोजगार विभागले जनाएको छ ।यी देशमा व्यक्तिगत श्रम स्वीकृति लिएर मासिक २ सयभन्दा धेरै नेपाली रोजगारीका लागि जाने गरेको विभागको तथ्यांक छ । रुस–युक्रेन युद्धका कारण यी देशमा समेत असुरक्षा बढेका कारण तत्काल श्रम स्वीकृति बन्द गरेको श्रम मन्त्रालयले जनाएको छ ।

सरकारले रुस–युक्रेनसँग सिमाना जोडिएका र युद्धकाे प्रभाव पर्ने सम्भावना भएका देशमा जाने नेपालीहरूका हकमा श्रम स्वीकृति बन्द गर्न थालेकाे विभागका महानिर्देशक शेषनारायण पौडेलले जानकारी दिए । रुसले युक्रेनमाथि आक्रमण गरेपछि ५ सय ८१ जना नेपालीले युक्रेन छाडेका थिए ।

युरोप रोजगारी प्रभावित

नेपालीहरू रोजगारीका लागि पोल्यान्ड, स्लोभाकिया, पोर्चुगल, हंगेरी, रोमानिया र माल्दावा जाने गरेको विभागको तथ्यांकमा छ । युरोपका नौवटा देशमा धेरै जसाे नेपालीहरू रोजगारीका लागि जाने गरेका छन् । पोल्यान्ड, स्लोभाकिया, पोर्चुगल, हंगेरी, रोमानिया र माल्दावामा वार्षिक ७ हजार कामदार रोजगारीका लागि जाने गरेको विभागको तथ्यांकले देखाएकाे छ । रुस –युक्रेन युद्धका कारण यी देशले पनि तत्कालका लागि विदेशी कामदार लिन समस्या देखाउन थालेको रोजगार व्यवसायीहरूले जानकारी दिएका छन् । युरोपका कतिपय रोजारदाता कम्पनीहरूले विदेशी कामदार भित्र्याउन छाडेका छन् ।

विभागको तीन वर्षको तथ्यांक हेर्दा श्रम स्वीकृति लिएर युराेप गएका ८ हजारमध्ये रोमानियामा ५ हजार ३ सय ५, पोल्याण्डमा २ हजार २ सय १३, रुसमा ३ सय ६०, हंगेरीमा ५३ र युक्रेनमा ८५ जना गएका थिए । युद्धका कारण युरोपबाट नेपाली श्रमिकको माग तत्काल नआएकाले श्रम स्वीकृति रोक्नुपर्ने अवस्था भएको विभागका महानिर्देशक पौडेलले बताए ।

प्रकाशित मिति: शनिबार, चैत १९, २०७८ ०७:३८