दैनिक १४ घण्टासम्म लोडसेडिङ: हेटौँडा औद्योगिक क्षेत्रका उद्योगको उत्पादनमा आउन थाल्यो गिरावट

दैनिक १४ घण्टासम्म लोडसेडिङ: हेटौँडा औद्योगिक क्षेत्रका उद्योगको उत्पादनमा आउन थाल्यो गिरावट

A+ A A-

पूर्वजानकारीसमेत नदिई दैनिक १४ घण्टासम्म विद्युत्‌ कटौती हुँदा हेटौँडा आद्योगिक क्षेत्रका उद्योगहरू मर्कामा परेका छन् ।

कोरोना महामारीका कारण लामो समयदेखि समस्या झेलेका उद्योगहरूले विगत एक हप्तादेखि विद्युत्‌ कटौतीका कारण पूर्ण क्षमतामा उत्पादन गर्न सकेका छैनन् । क्षेत्रफलमा देशकै ठूलो हेटौँडा औद्योगिक क्षेत्रमा एक सय १० वटा उद्योग सञ्चालनमा छन् । जसमध्ये ६० प्रतिशत रात्रिकालीन उद्योगहरू छन् । राति चल्ने उद्योगहरूको ५० प्रतिशतले उत्पादनमा गिरावट आएको हेटौँडा औद्योगिक क्षेत्र व्यवस्थापन कार्यालयका प्रबन्धक राजेन्द्र कँडेलले जानकारी दिए ।

गत शनिबारदेखि लगातार विद्युत्‌ प्राधिकरणले रातिको समयमा विद्युत्‌ कटौती गर्दा उद्योगहरूको उत्पादन ५० प्रतिशतले घटेको उनले बताए । उद्योग संघ मकवानपुरले एक हप्तादेखि राति चल्ने उद्योगहरूले क्षमता अनुसार उत्पादन गर्न नसकेको जनाएको छ । राति ९ देखि १४ घण्टासम्म विद्युत्‌ कटौती हुँदा उद्योगहरू मर्कामा परेको संघका अध्यक्ष स्वागतराज प्याकुरेलले जानकारी दिए ।

‘दैनिक ९ देखि १४ घण्टासम्म लोडसेडिङ भइरहँदा हेटौँडाका कतिपय उद्योगहरू बन्द गर्नुपर्ने अवस्थामा पुगेको छ । १४ घण्टासम्म लोडसेडिङ भएपछि १०-१२ घण्टा उद्योग चलाएर हामी खर्च धान्न सक्दैनौँ,’ प्याकुरेलले भने । पूर्वजानकारी नदिई विद्युत्‌ कटौती गर्दा उद्योगहरूलाई थप समस्या भएको उनको भनाइ छ ।

उनले खर्च धान्न नसक्दा कर्मचारी पनि कटौती गर्नुपर्ने बताए । हाल हेटौँडा औद्योगिक क्षेत्रमा मात्रै ५ हजार ५ सय र मकवानपुरभित्रका उद्योगमा करिब ११ हजारले रोजगारी पाएका छन् । महँगो डिजेल र जेनेरेटर किनेर उद्योग सञ्चालन गर्न सक्ने अवस्थामा उद्योगहरू नरहेको संघका अध्यक्ष प्याकुरेल बताउँछन् ।

उनले नेपालको बलियो अर्थतन्त्रका रूपमा रहेको उद्योगप्रति सरकार जवाफदेही नभएको आरोप लगाए । उनले अन्य क्षेत्रको विद्युत्‌ कटौती नगरी उद्योगको मात्रै विद्युत् कटौती गर्ने नीति प्राधिकरणले लिएको बताए । रातिको समयमा दूग्ध र दानालगायतका खाद्यान्न उद्योगहरू सञ्चालन हुने गरेका छन् ।

लोडसेडिङ हुन थालेसँगै यी उद्योगहरू सञ्चालनमा समस्या सिर्जना भएको औद्योगिक क्षेत्र व्यवस्थापन कार्यालयका प्रबन्धक कँडेलको भनाइ छ । उनका अनुसार केही ठूला उद्योगहरूले डिजेलमार्फत उद्योग चलाइरहेको भए पनि यसको लागत महँगो हुने भएकाले साना उद्योग समस्यामा परेका हुन् । उद्योगहरू उत्पादनको मुख्य सिजन नै चैतदेखि सुरु हुने भएकाले थप समस्या बनाएको कँडेलले शिलापत्रलाई बताए ।

उनले विद्युत् कटौतीका कारण सरकारी प्रयोगशाला सञ्चालन नै धरासायी अवस्थामा पुगेको बताए । ‘नेपाल सरकारले सञ्चालन गरेको खाद्य प्रविधि तथा गुणस्तर प्रयोगशालालाई निरन्तर बत्ती चाहिन्छ । तर, बत्ती कटौती हुँदा यस्ता सरकारी प्रयोगशाला तथा कार्यालय नै सञ्चालनमा समस्या भएको छ,’ उनले भने । कँडेलले लाइन काट्नुअघि प्राधिकरणले खबर नगर्दा उद्योगहरू अन्योलमा परेको बताए ।

नेपाल विद्युत्‌ प्राधिकरण वितरण केन्द्र हेटौँडाका प्रमुख नरेन्द्र श्रेष्ठले काठमाडौंस्थित भार प्रेषण केन्द्र (एलडीसी)कै निर्देशनमा विद्युत्‌ कटौती भएको बताए । स्यूचाटारमा रहेको एलडीसीले मुलुकभरको विद्युत्‌ व्यवस्थापन र नियन्त्रण गर्ने काम गर्दछ ।

प्रकाशित मिति: शुक्रबार, चैत १८, २०७८ १३:४४