तीन दर्जन म्यानपावर व्यवसायी स्थानीय तहकाे चुनाव लड्ने लविङमा

A+ A A-

नजिकिँदाे स्थानीय तहकाे चुनावमा म्यानपावर व्यवसायीहरूकाे उम्मेदवारीमा अघिल्ला निर्वाचनमा भन्दा पल्लाभारी हुन सक्ने देखिएकाे छ । ३० वैशाखमा हुने स्थानीय तहको चुनावमा ३० जनाभन्दा धेरै म्यानपावर व्यवसायी पालिकाकाे टिकट लिन आफूनिकट दलहरूसँग चर्काे लविङमा लागेकाे नेपाल वैदेशिक रोजगार व्यवसायी संघका महासचिव सुजित श्रेष्ठले दाबी गरे ।

शिलापत्रसँग कुराकानी गर्दै श्रेष्ठले भने, 'अनाैपचारिक रूपमा हामीसँग आएकाे सूचनाअनुसार यसपालिकाे स्थानीय चुनावमा कम्तीमा पनि तीन दर्जन साथीहरू टिकटका लागि दाैडिरहेका छन् ।' वैदेशिक रोजगारीमा कामदार आपूर्ति गर्दै आएका म्यानपावर व्यवसायीहरू पछिल्लाे कालखण्डमा राजनीतिमा सहभागिता बढाउन थालेका छन् । पार्टीको भ्रातृ संगठन नै बनाएर व्यवसायीबीच राजनीतिक प्रतिस्पर्धा चल्ने गरेकाे छ ।

कांग्रेसनिकट नेपाल लोकतान्त्रिक वैदेशिक रोजगार व्यवसायी एसोसिएसन, एमालेनिकट प्रगतिशील वैदेशिक रोजगार व्यवसायी मञ्च र माओवादीनिकट गणतान्त्रिक वैदेशिक रोजगार व्यवसायी संघमा आवद्ध म्यानपावरका सञ्चालक स्थानीय तहको चुनावमा उम्मेदवारी दिने तयारी स्वरुप आफू आवद्ध पार्टीमा लविङ गरिरहेका छन् ।

अघिल्लो स्थानीय चुनावमा इलामको सूर्योदय नगरपालिकामा रोजगार व्यवसायी आरबी राई एमालेबाट मेयरमा निर्वाचित भएका थिए । उनी पुन: मेयरमा दोहोरिने कसरतमा छन् । राई आरबी रिक्रुटमेन्ट प्रालिका सञ्चालक हुन् ।

यस्तै, फिचर म्यानपावरका सञ्चालक एवं संघका पूर्वउपाध्यक्ष हरि पाण्डेले आसन्न चुनावमा एमालेबाट तनहुँको भानु नगरपालिकाकाे मेयरमा उठ्ने तयारी गरिरहेको प्रगातिशील मञ्चका ‍‍‍‍‍अध्यक्ष राजेन्द्र भण्डारी बताउँछन् । नुवाकाेटकाे विदुर नगरपालिका–६ काे वडाअध्यक्ष रहेका राजु सडाैला उक्त नगरपालिकाकाे मेयरका लागि लविङमा छन् । सडाैला एमाले आबद्ध हुन् । सडाैलाकाे काठमाडाैंमा एक्टिभ ओभरसिज छ ।

अनमाेल म्यानपावर चलाउने नगेन्द्र राउत पनि उदयपुरकाे चाैदण्डी नगरपालिकाकाे मेयरमा उठ्ने दाउमा छन् । राउत एमालेबाट टिकट पाउन दाैडधुपमा छन् । तर, शिलापत्रसँगकाे सम्पर्कमा आएका यी सम्भावित उम्मेदवारले टिकट नपाउञ्जेल केही नबाेल्ने भन्दै प्रतिक्रिया दिन मानेनन् ।

पछिल्ला चुनावमा म्यानपावर व्यवसायीहरूलाई दलहरूले उम्मेदवारी बनाउने क्रम बढेकाे छ । खासगरी ०७० काे संविधासभा चुनावपछि म्यानपावर व्यवसायीहरू राजनीतिक दलमा छिरेर टिकट हात पार्न सफल भएकाे देखिन्छ । उक्त चुनावमा म्यानपावर व्यवसायी टेकबहादुर गुरुङले कांग्रेसबाट उम्मेदवार बनेका थिए । मनाङबाट संविधानसभा सदस्य बनेका उनी श्रम राज्यमन्त्रीसमेत बनेका थिए ।

२०७४ सालमा भएको स्थानीय, प्रदेश र संघीय तहकाे चुनावमा त उम्मेदवारी बन्ने म्यानपावर व्यवसायीकाे संख्या बाक्लियाे । उक्त चुनावमा तीनवटै तहमा गरी नौ जना म्यानपावर व्यवसायीले दलकाे टिकट पाएका थिए । जसमा झापाबाट एलपी साँवा र तनँहुबाट कृष्णकुमार श्रेष्ठले संघीय चुनाव जिते । दुवै जना एमालेबाट जितेका हुन् । हाल नेकपा एकीकृत समाजवादीमा रहेका श्रेष्ठ श्रम, रोजगार तथा सामाजिक सुरक्षामन्त्री छन् । साँवा संघका पूर्वअध्यक्ष समेत हुन् ।

म्यानपावर व्यवसायी सीता देवकोटालाई ०७० को निर्वाचनमा कांग्रेसले पाल्पाबाट टिकट दिएकाे थियाे । यद्यपि उनी पराजित भइन् । म्यानपावर व्यवसायी राजनीतिमा सहभागी हुनु वैदेशिक रोजगार क्षेत्रका लागि सकारात्मक पक्ष भएको प्रगातिशील मञ्चका अध्यक्ष राजेन्द्र भण्डारीकाे तर्क छ । तर, पैसाकाे आडमा व्यवसायीहरूले चुनावमा टिकट हत्याउने क्रम बढ्दा दीर्घकालमा प्रजातान्त्रिक अभ्यासमा नै आँच आउन सक्ने जाेखिम रहेकाे राजनीतिक विश्लेषकहरू बताउँछन् ।

म्यानपावर व्यवसायी संघमा दलहरूकाे रुचि र स्वार्थ कति गहिराे छ भन्ने बुझ्न गत असाेजमै भइसक्नुपर्ने नेपाल वैदेशिक रोजगार व्यवसायी संघको साधारणसभा अहिलेसम्म हुन नसक्नुले देखाउँछ । एमाले, कांग्रेस र माओवादीनिकट व्यवसायीका प्रतिस्पर्धी दलले छान्न खाेज्दा साधारणसभा नै राेकिएकाे छ ।

०७६ मा संघको साधारणसभा भएको थियो । साधारणसभा दुई वर्षभित्र गर्नुपर्ने व्यवस्था छ । नियमअनुसार गत असोजमा साधारणसभा भएर नयाँ कार्यसमिति आइसक्नुपर्ने थियाे । हाल वैदेशिक रोजगारीमा कामदार आपूर्ति गर्दै आएका ७ सय ५४ वटा म्यानपावर कम्पनी वैदेशिक रोजगार विभागमा दर्ता भएर सञ्चालनमा छन् । सबै म्यानपावर कम्पनी पार्टीनिकट व्यवसायी संघसँग आबद्ध छन् ।

रोजगार व्यवसायी नेपालीहरूको रोजीरोटी र आर्थिक पाटोसँग जोडिएको विषय भएका कारण स्वच्छ रूपमा व्यवसाय गर्ने वातावरण हुनुपर्ने संघका पूर्वअध्यक्ष रोहन गुरुङ बताउँछन् ।

प्रकाशित मिति: शुक्रबार, चैत १८, २०७८ १२:३५