ओलीसँग हित्तचित्त मिलेका महन्थ फेरि देउवाकै क्याम्पमा

A+ A A-

चुनावतर्फ डोरिएको सत्ता गठबन्धनलाई एमाले अध्यक्ष केपी ओलीले ‘एक-एक किलाका ढक’ भनेको मान्दिने हो भने प्रधानमन्त्री शेरबहादुर देउवाले आफ्नो पल्लामा अर्को एउटा ढक थपेका छन् । त्यो हो, महन्थ ठाकुर नेतृत्वको लोकतान्त्रिक समाजवादी पार्टी (लोसपा) ।

हिजो बुधबार प्रधानमन्त्री तथा कांग्रेस सभापति शेरबहादुर देउवा र लोसपा अध्यक्ष महन्थ ठाकुरबीचको निर्णायक छलफलले गठबन्धनको आयतन विस्तारको बाटो खुलायो । त्यसअघि सञ्चारमन्त्री ज्ञानेन्द्रबहादुर कार्की तथा लोसपा नेताहरू सर्वेन्द्रनाथ शुक्ल र लक्ष्मणलाल कर्णबीच छलफल भएको थियो ।

अहिलेकै सहमति कायम रहे आसन्न चुनावहरूमा ठाकुरले कांग्रेस, माओवादी केन्द्र, नेकपा (एस) सहितको गठबन्धनमा अर्को सदस्यको भूमिका निभाउनेछन् । संघीय संसदमा ठाकुरको दल लोसपामा १३ सांसद छन् । पछिल्ला राजनीतिक घटनाक्रमहरूमा ठाकुर एमाले अध्यक्ष ओलीसँग घनिष्ट सहकार्यमा थिए ।

ओलीका दुवै संसद विघटन निर्णयलाई ठाकुरले निसंकोच साथ दिएका थिए । भर्खरैको राष्ट्रियसभा उपचुनावसम्म समेत एमाले र लोसपाको तालमेल कायमै थियो । पछिल्ला दिनमा ओलीले तराई मधेसका जिल्ला घुमेर फुतुफुतु आफ्ना नेता-कार्यकर्तालाई एमाले प्रवेश गराउन थालेपछि भने ठाकुर झस्किए ।

अनि ठाकुरलाई देउवासँग एउटा गुन तिर्नु थियोः उपेन्द्र यादवको जसपा फुटाउँदा बेला चाहिनेजति सांसद संख्या उनीसँग थिएन । त्यसैले देउवाले उनका लागि ‘चाहिनेजति’ दल फुटाउ अध्यादेश ल्याइदिए । ठाकुर पक्षका नेताहरूको राजनीति बच्यो । अन्यत्र आफ्नै ताकतले लड्ने बताइरहेको एमालेले आफ्नो तुलनात्मक कम प्रभाव रहेको मधेस प्रदेशमा लोसपासँग मिलेर चुनाव लड्ने रणनीति बनाइरहेको थियो । देउवासँग जाने लोसपाको नयाँ निर्णय एमालेका लागि स–सानो स्केलको अर्को धक्का हो ।

एमसीसी पास गर्न चाहिने निर्णायक सांसद जुटाइदिएकामा देउवाले ठाकुरलाई धन्यवाद दिइसकेका छन् । ठाकुरले भने देउवासँग तीन शर्तहरूको पुलिन्दा तेर्स्याएका छन् ।

पहिलाे, मुद्दा फिर्ता । बालुवाटार बैठकमा सहभागी ठाकुरनिकट नेताका अनुसार मधेस आन्दोलनका क्रममा मुद्दा लागेका कतिपय नेता कार्यकर्ता ओली सरकारले रिहा गराए पनि कतिपयको मुद्दा अझै फिर्ता भएको छैन । मुद्दा खेपिरहेकामा कतिपय प्रदेश सांसद, मेयर, गाउँपालिका अध्यक्षहरूसमेत छन् । देउवाले तिनीहरू माथिको मुद्दा ‘फिर्ता गरिदिन्छु’ भन्ने बचन दिएका छन् ।

दाेस्राे, चुनावी तालमेल । लाेसपालाई अब जसपासँग पनि डर छ । देउवाले लोसपाको पकड भएका ठाउँमा कांग्रेसले चुनावमा सघाउने बचन दिएका छन् ।

तेस्राे, नागरिकता विधेयक । नागरिकतासम्बन्धी अड्चन सुल्झाउन मन्त्री ज्ञानेन्द्रबहादुर कार्कीसहित नेताहरू सर्वेन्द्रनाथ शुक्ल, लक्ष्मणलाल कर्णको संयुक्त कार्यदल बनेको छ । ‘प्रधानमन्त्रीज्यूले हिजोको बैठकमा हाम्रा अध्यक्षजीसँग अबको संसद बैठकमा त्यो विधेयक अनुमोदन गराउँछु भन्नुभएको छ,’ ती नेताले भने ।

‘ओलीजीसँग अस्तिसम्म हाम्रो सहकार्य भएकै हो, अहिलेको खास कुरा चैं देउवालाई हामीले पालाको पैंचो तिरेजस्तो पनि भयो,’ लोसपा नेता सुरेन्द्र झाले भने, ‘आखिर जे भए पनि उहाँले हाम्रो दल नै जोगाइदिएको हो नि । हामीले पनि एमसीसी पास गर्न सघायाैं ।’

झाले देउवाकाे भारत भ्रमण अगावै सत्ता गठबन्धनमा लाेसपा जाने, मन्त्रिपरिषद् विस्तार हुनसक्ने बताए ।

प्रकाशित मिति: बिहीबार, चैत १७, २०७८ १४:२७