तुलसीपुरकाे जित जोगाउन एमालेलाई धौ-धौ, कांग्रेसलाई उम्मेदवार छान्नै सकस

A+ A A-

२०७४ सालकाे चुनावमा लुम्बिनीका चारमध्ये तीन उपमहानगर जितेकाे एमालेलाई आगामी निर्वाचनमा त्याे वर्चस्व जाेगाउन कठिन हुने देखिएको छ । एमाले विभाजन र सत्ता गठबन्धनबीच चुनावी तालमेल हुने भएपछि दाङकाे तुलसीपुर उपमहानगरमा पनि यसपटक एमालेलाई चुनाव जित्न सजिलाे नरहेकाे विश्लेषण भइरहेकाे छ ।

२०७४ काे स्थानीय चुनावमा कांग्रेस र माओवादी केन्द्रले देशभर तालमेल गरे पनि तुलसीपुरमा सबै दल एक्ला एक्लै भिड्दा एमालेले बाजी मारेकाे थियाे । यहाँ कांग्रेस र माओवादी क्रमश: दाेस्राे र तेस्राे भएका थिए ।

एमालेका घनश्याम पाण्डे २२ हजार ८५७ मत ल्याएर तुलसीपुरकाे मेयरमा विजयी भएका थिए । उनका निकटतम प्रतिद्वन्द्वी कांग्रेसका गेहेन्द्र गिरीले १८ हजार ९३० मत पाएका थिए । माओवादी केन्द्रका उम्मेदवार शेषुराम भण्डारीले ८ हजार ६९३ मत पाएका थिए ।

त्यतिबेला तुलसीपुरमा एमालेभन्दा कांग्रेसको मत ४ हजार मात्रै कम थियाे । तर, कांग्रेसले एमालेभन्दा बढी वडा जितेको थियो । तुलसीपुरका १९ वडामध्ये १० वडामा कांग्रेसका उम्मेदवार विजयी भएका थिए । एमालेबाट मेयरमा विजयी भएका पाण्डेले पाँच वर्षमा कुनै उल्लेखनीय काम गर्न नसकेकाले पनि एमालेकाे जनाधार तुलसीपुरमा कमजाेर बनेकाे अरु पार्टीका नेताहरूकाे दाबी छ । चुनावी प्रतिबद्धताअनुसार कुनै पनि काम हुन नसकेपछि एमालेसँग जनता रुष्ट रहेकाे विपक्षी नेताहरू बताउँछन् ।

तर, मेयर पाण्डे भने विपक्षीकाे आराेप स्वीकार्दैनन् । बरु काेराेना महामारीका बेला समेत सन्ताेषजनक काम गरेकाे उनले बताए । कोरोना महामारीलगायतका कारणले अपेक्षाकृत काम हुन नसकेकाे गुनासाे स्वाभाविक भए पनि चुनावी प्रतिबद्धता अनुसारका काम आफूले गरेकाे उनकाे दाबी छ ।

कांग्रेसमा आकांक्षी धेरै

नेपाली कांग्रेस तुलसीपुर उपमहानगरपालिका बलियो उम्मेदवार छानेर जित सुनिश्चित गर्ने योजनामा छ । कांग्रेसका निवर्तमान जिल्ला सभापति कीर्तिबहादुर खड्का, पूर्वसभापति घनश्याम रेग्मी, नगर सभापति सुरेश हमाल र व्यवसायी विमल रिजालले मेयरकाे दाबी गरिरहेका छन् । खड्का र रेग्मी संस्थापन पक्षका नेता हुन् भने हमाल र रिजाल इतर समूहका ।

आफूले पार्टीमा पुर्‍याएको योगदानको मूल्यांकन गर्नुपर्ने निवर्तमान सभापति खड्का बताउँछन् । उनले यो पटक आफूलाई टिकट दिएमा नमुना नगर बनाउने बताए । ‘यसपटक पार्टीले टिकट दिए तुलसीपुरलाई कांग्रेसको ‘गढ’ बनाएर नमुना नगर बनाउने छु’, उनले भने ।

अर्का दाबेदार रेग्मीले पार्टीमा आपसी मेलमिलाप गरेर चुनाव लडे दाङका कुनै पनि क्षेत्रमा चुनाव जित्न कांग्रेसलाई समस्या नभएको बताए । उनले पार्टीमा अन्तर्घात नभए कांग्रेसकाे जित सुनिश्चित रहेकाे बताए । आकांक्षी धेरै भएपछि कांग्रेसमा उम्मेदवार छान्न सकस भएकाे छ ।

नगर सभापति हमालले आफूले टिकट पाए जित सुनिश्चित हुने बताए । शिलापत्रसँग कुराकानी गर्दै नगर सभापति हमालले भने, 'नगर सभापति भएकाले पनि मेरो दाबी स्वाभाविक हो । लामो समयदेखि सामाजिक काममा सक्रिय रहेको र युवा पुस्तालाई आकर्षण गर्न सक्छुजस्तो लाग्छ । युवा पुस्तालाई तान्न सके सहज जित हात पार्न सक्छौँ ।'

टीकारामलाई टिकट दिने एमालेको तयारी

अघिल्लो पटकको जितलाइ दाेहाेर्‍याउने दाउमा एमाले छ । बहालवाला मेयर घनश्याम पाण्डेले नदोहोरिने घाेषणा गरिसकेकाले नयाँ आकांक्षी धेरै छन् । आफ्नाे नेतृत्वमा तुलसीपुरमा मातृ मृत्युदर शून्य, सामुदायिक अस्पताल, मेट्राे कलेज लगायतका सामाजिक विकासका काम भएकाले एमालेका उम्मेदवारलाई चुनाव जित्न गाह्राे नहुने पाण्डेकाे दाबी छ ।

'एक्लाएक्लै लड्दा सहजै जित्छाैँ । गठबन्धन भए केही मेहनत गर्नुपर्छ', उनले भने । तुलसीपुरकाे मेयरका लागि एमालेले निवर्तमान जिल्ला अध्यक्ष टीकाराम खड्कालाई अगाडि सार्ने तयारी गरिरहेकाे विषय चर्चामा छ । महासचिव शंकर पोखरेलले उनको टिकट सुरक्षित रहेको स्रोतकाे दाबी छ ।

एमालेका तत्कालीन वरिष्ठ नेता माधवकुमार नेपालको पक्षमा रहेका खड्का पार्टी विभाजन हुँदा एमालेमै बसेका थिए । खड्का एकीकृत समाजवादीमा गए पार्टीमा ठूलो क्षति हुने देखेर पोखरेलले उनलाई टिकट दिने बाचा गरिसकेको जिल्लाका नेताहरू नै बताउँछन् । यता बहालबाला उपप्रमुख माया आचार्य शर्माले पार्टीले अगाडि सारे नेतृत्व लिन तयार रहेकाे बताइन् ।

माओवादीबाट भण्डारी र केसीको दाबी

नेकपा माओवादी केन्द्रबाट यज्ञबहादुर केसी र शेषुराम भण्डारीले मेयरको दाबी गरेका छन् । केसी तुलसीपुर क्षेत्रमा लोकप्रिय छन् ।

माओवादी जिल्ला समिति सदस्य तथा उद्योग विभाग प्रमुख समेत रहेका उनी तुलसीपुर नगर विकास समितिका पूर्वअध्यक्ष पनि हुन् । व्यवसायी केसी पार्टीले आफ्नो योगदानलाई मूल्यांकन गरेर टिकट दिनुपर्ने बताउँछन् । 'मैले लामो समयदेखि यो क्षेत्रमा क्रियाशील रहेर पार्टी र जनताको काम गरिरहेको छु', उनले शिलापत्रसँग भने, 'त्यसैले पार्टीले मलाइ मेयरको टिकट दिन्छ भन्नेमा ढुक्क छु ।'

अघिल्लो पटकमा मेयरमा पराजित भण्डारीले पनि आकांक्षा व्यक्त गरिरहेका छन् । गठबन्धन हुँदा तुलसीपुर र घोराही उपमहानगरपालिकामध्ये एक माओवादीले पाउन सक्छ । माओवादीले २ उपमहानगरमध्ये १-१ वटा कांग्रेस र माओवादीले तथा लमही एकीकृत समाजवादीलाई दिएर भागबण्डा गर्नुपर्ने बताएको छ ।

प्रकाशित मिति: बिहीबार, चैत १७, २०७८ ०९:४३