चिकित्सा शिक्षाको प्रवेश परीक्षा: अब गलत उत्तर दिए अंक काटिने

A+ A A-

चिकित्सा शिक्षा आयोगले प्रवेश परीक्षामा ‘नेगेटिभ मार्किङ’को व्यवस्था गर्ने भएको छ । विद्यार्थीले अनुमानका भरमा उत्तर दिने प्रवृत्ति बढेपछि यो वर्षबाट नेगेटिभ मार्किङको व्यवस्था गर्न लागिएको हो ।

नेगेटिभ मार्किङको व्यवस्थामा परीक्षार्थीले गलत उत्तरमा चिह्न लगाएमा अङ्क काटिनेछ । आयोगका सूचना अधिकारी सेमन्तराज कोइरालाकाअनुसार चिकित्सा शिक्षा आयोगको परीक्षामा प्रत्येक गलत उत्तरमा ० दशमलब २५ अङ्क घटाइने छ । यस वर्षबाट हुने परीक्षाका लागि यस्तो व्यवस्था गरिएको हो ।

चैत १८, २० र २१ मा हुने परीक्षाबाटै यो नियम लाग्नेछ । एमबीबीएस, बीडीएस, बीएस्सी नर्सिङलगायतका विषयको प्रवेश परीक्षा हुँदैछ । ‘विद्यार्थीले अनुमानका भरमा चिह्न लगाए । हचुवाको भरमा उत्तर दिनेले पनि नम्बर पाउनसक्ने स्थिति थियो,’ कोइरालाले भने, ‘त्यसैले गुणस्तर कायम गर्न नेगेटिभ मार्किङ सुरु गरेका हौँ ।’

यो व्यवस्थामा विद्यार्थीले कुनै पनि चिह्न नलगाएको अवस्थामा भने अङ्क काटिने छैन । त्यसैले नजानेको प्रश्नमा हचुवाको भरमा जवाफ दिनुभन्दा खाली छोडिदिन विद्यार्थी बाध्य हुनेछन् । यसले परीक्षा प्रणालीमा केही सुधार हुने कोइरालाको भनाइ छ ।

चिकित्सा शिक्षाको विद्यार्थी छनोटका लागि हुने वस्तुगत परीक्षा २ सय पूर्णाङ्कको हुनेछ । २ सयवटा प्रश्नको उत्तर दिन परीक्षार्थीलाई ३ घण्टाको समय दिइनेछ । आयोगले १८ गतेबाट सञ्चालन गर्ने परीक्षामा करिब ३४ हजार ६ सय परीक्षार्थी सहभागी हुनेछन् ।

सूचना अधिकारी कोइरालाकाअनुसार १८ चैतको परीक्षामा १९ हजार ५ सय ८ परीक्षार्थी सहभागी हुनेछन् । त्यस्तै, २० चैतमा १२ हजार २ सय ६२ र २१ चैतमा २ हजार ८ सय ९५ प्रतिस्पर्धी सहभागी हुँदैछन् । यस वर्ष भने आयोगले अहिलेसम्म विद्यार्थीको कोटा निर्धारण गर्न सकेको छैन । गत वर्ष भने सबै विषयका कोटा ८ हजार २ सय ५१ थियो भने एमबीबीएस कोटा १ हजार ८ सय ३५ थियो ।

तर, गत शाल धेरै विद्यार्थीहरू उत्तीर्ण हुननसक्दा कलेजहरूले कोटाअनुसार विद्यार्थी पाएका थिएनन् । प्रवेश परीक्षाबाट क्षमताभन्दा थोरै विद्यार्थी उत्तीर्ण हुँदा गत साल पुन: परीक्षाको मागसमेत भएको थियो । विद्यार्थीले मुलुकभित्र अध्ययनको अवसर नपाई विदेश जाने परिस्थिति हुने भएको भन्दै विद्यार्थी संगठनहरूले पुन: परीक्षाको माग नै गर्नुपरेको थियो । त्यसैले यसपटक अहिलेसम्म विषयगत कोटा छुट्याइएको छैन । यद्यपि नतिजा सार्वजनिक हुनुअघि नै कोटा निर्धारण गरिने कोइरालाले बताए ।

त्यस्तै, यो पटक ‘पर्सनटायल’ विधिबाट नतिजा सार्वजनिक गरिने भएको छ । गत वर्ष उत्तीर्णाङ्क न्यूनतम ५० प्रतिशत कायम गरिएकोमा यो पटक उक्त नियम हटाइएको छ । ‘पोहोर उत्तीर्ण भएका विद्यार्थी अपुग हुँदाहुँदै पठनपाठन थाल्नुपरेको थियो । त्यसैले यो पटकबाट उत्तीर्णाङ्क विधि हटाएर, पर्सनटायल विधिमा नतिजा सार्वजनिक गर्ने भएका हौँ,’ कोइरालाले शिलापत्रसँग भने ।

कोइरालाकाअनुसार यो पटक परीक्षा केन्द्र समेत काठमाडौं उपत्यकाभित्र कायम गरिएको छ । जबकि गत वर्ष कोभिड-१९ का कारण बाहिर पनि परीक्षा केन्द्र तोकिएको थियो ।

प्रकाशित मिति: बुधबार, चैत १६, २०७८ १६:०४